الحاج بوجمعة والحاج السعدى

[zohier]

http://im13.gulfup.com/2012-08-02/1343905046421.bmp (http://www.gulfup.com/show/X2chy6wfy2osg0)



شوف يالحاج بوجمعة الاسلام نتاع الصح مابقاش في بلاد المسلمين
-كيفاه مابقاش يالحاج السعدى مافهمتش
السعودية عندهم الحرمين بصح ماعندهمش الاسلام دخلتهم المريكان هما وقطر وكويت والعراق شيعة ولبنان مخلطين ومصر غلبوهم الاقباط الاسلام نتاع الصح بقي غير في الموغريب العربي
-يالطيف الطف في هذي عندك الحق
هاك كول
رانى كليت
رانى سبعتلك
بصح في الموغريب العربي متشي قاع مسلمين نتاع الصح المغرب عندهم السحر وموريتانيا خلاو كتاب ربي وقاعدين مع الشعر وتونس مرا دايرتلها حق كى الراجل وليبيا راه الناطو يتحكم فيهم الاسلام بقي غير في الدزاير
-في هذي عندك الحق الاسلام بقي غير في الدزاير
اخرج من طريق الوسط راك تحوس تطبل الداما ضرك نبدا نحسبلك
لوكان رانا نلعبو الدومين ماشي خير
بصح في الدزاير ماشي قاع عندك في الغرب عندهم الاولياء نهار كامل يزوروهم هذا سيدى هواري وهذا سيدى بن خلوف وهذاسيدى بومدين
وفي الصحراء عندهم التيجانية والقادرية والعيساوية وناس الشرق يسبو ربي بزاف اسلام نتاع الصح باقي في الوسط
-يالطيف يالطيف الطف بينا والله لا عندك الحق
نطبلوها ونعاودو بارتية جديدة على حساب الشوفة ماراكش خارج من طريق الوسط
-كملى حكايتك اليوم راك تهدر مليح
بصح الوسط ماشي قاع مسلمين نتاع الصح عندك في العاصمة النساء يمشو سفيليزى لا حايك لا عجار وذاك نهار في جنازة نتاع الحاج السنوسي جاو 10 للجنازة ومالقيناش لى يحفر القبر حتى روحت شريت تشابا وبالة وقالولى ماتحفرش البلدية هى لتحفر واستنى مكتا البلدية تجى تحفرلك
-يالطيف اعوذ بالله من غضب الله
وزيد في تيزى وزو الذر ياكلو رمضان والشراب والخمور يبيعوها في الطريق
يالطيف الطف
اسلام نتاع الصح باقي غير في بومرداس
-في هذي عندك الحق
بومرداس وماشي قاع عندك بودواو ودلس وزموري وبرج منايل ضربتهم الزنزلة وهذا من غضب الله لو كان كانو مؤمنين مايعضبش عليهم ربي الاسلام نتاع الصح باقي غير في يسر
-في هذي عندك الحق راك تهدر صواب
يسر وماشي قاع مسلمين عندك صحاب السوق يسرقو في الميزان وكارطى تحتانى يديرو ديسك جوكى في العراس وخلى وخلى
بقي غير هذا الكارتى نتاع الجامع لى مسلمين نتاع الصح.....
-راك تهدر صواب وكى تكون تهدر صواب ماعندى مانقول...
وكارتى نتاع الجامع وماشي قاع مسلمين نتاع الصح شوف في الفجر رانا غير انا وانت لى يصلوه ولى مايصليش الفجر ماشي مسلم..
-في هذي عندك الحق الاسلام راه قاع قي صلاة الفجر
بصح قولى يالحاج بوجمعة عندك زوج سمانات ماراكش تجى للفجر غير الخير علاش ماراكش تجى


الملون بالاخضر خارج الموضوع لانه هنا راهم يلعبو الداما

[قلم التاريخ]

الحاج بوجمعة ماشي مسلم تاع الصح

هه

بارك الله فيك على الكلام الزين الي فيه معاني كبيرة

والي يقراه مايمل منه

[انا هي]

السلام عليكم
.
.
.
.
بقى فيها غي الحاج السعدي اللي مسلم هههه

[مايا علاق]

ههههههههههههههههههههههه والله غير حكاياتك هايلين وعندهم معنى كبير شكرا لك

[يوسف جزائري]

صح اليوم أدركت انه بإمكانكـ تدمير العالم

واصل يازهير تحسن ملحوظ في نمطكـ القصصي المميز

تحيات معجب هه

[Samia fr]

ma fhmate walouuuuuuuuuuuuuuuuuuuuuuuuuuuu hhhhhhh

[Abdelbasset Kab]

اللهم متعنا بعقولنا أبدا ما أحييتنا

[عمر القبي]

اللهم متعنا بعقولنا أبدا ما أحييتنا


أضحكتني أضحك الله سنك.

[zohier]

قلم التاريخ

انا هى

مايا علاق

عمو يوسف


سامية مازال مافهمتنيش

عبو

عمى عومار


شكر لمروركم الطيب تقبلو تحياتى

[LILI.nas]

بارك الله فيك
مشكورررررر

[zohier]

بارك الله فيك
مشكورررررر

هذا مكان بارك الله ومشكور منين شرقتى هذا الرد رانى قريته بزاف في منتدى

[إخلاص]

سرد قصصي شيّق منك يا سي زهير:11:
يحمل بين طيّاته معان عميقة لواقع معاش
اللّهمّ احفظ لنا إسلامنا:11:
تحيّة تليق

[zohier]

سعدت جدن بمرورك اخلاص دمتى بود