هاذي المرة خلاص

[منير7]

4 عهدات يا عجابا
صبرنا رجعنا طلابا
الأحزاب ولات كذابة

ما يامنوش بالجزائر
كامل يعدو في الشكاير
الشيطان منهم يدي فكاير

4 عهدات بزاف عليك
روح داوي ربي يشفيك
يا غير اخطيك من البوليتيك

دخلتونا حارة الهبال
الجزائر رجعت بوبال
الحرام رجعتوهولنا حلال

قالوا راه لاباس عليه
يهدر يوقف و الناس تجيه
ألفوا و قالوا حاجة ما بيه

قالوا لالا جنانو ما طاب
راهو راح يديرلكم خطاب
شويا عيان هذا الجواب

كذبتوا علينا شحال من مرة
حسبتو ما كانش اللي يقرا
ما حشمتوا و قلتوا راه برا

السيد راسو في تن تن
ما جايب خبر ما يوزن
حبوها تلهب ما تهدن

رميتوا السيد في الركنا
قلتولوا اسكت و استنا
نزوروهالك باه تتهنا

قلتوا الشعب طنه ما يمرق
و الا مرق ليه المطرق
يرضى بيها و لا يحرق

شادين كروشكم من الخلعة
خفتوا الشعب يعمل بدعة
يقلب عليكم القصعة

جبتوا الدراهم آ قوقو
باه الشعب تشريه و تسوقو
ياو فاقوا بيكم و مرقو

تبعوهم الخونة
المنافقين و الجبناء
حب دزاير عندهم خانة

يشهدوا تحت السيف ذراع
و يقلبوا الفيستا في ساع
النيف عندهم في النخاع

كان داو خامس عهدة
ما بقاش في دزاير قعدة
تتباع في سوق الخردة

افطنوا يا لا جوناس
ولينا عرة لجناس
ديما نقولوا هاذي المرة خلاص

[صوفيا22]

علابالك منير لحنتها في راسي
ما شاء الله عليك روعة صح دخلونا حارة لهبال
وما خلاوش عقول في رؤوسنا
ربي يجيب الخير لبلاد

[warda22]

انا رجعتني نغني وقريب ندربك

[دمعة حزين]

رااااااااااااااااائعة جدا أخي
أنت بارع في الملحون...
راقني ما خطّه يراااعه من أول
عنقود إلى آآآآآآآآآآآآخره
دمت بكذا ألق



دمعة مرت من هنا....

[star show]

كاينة منها بزااف
وعجبتني هذيافطنوا يا لا جوناس
ولينا عرة لجناس
ديما نقولوا هاذي المرة خلاص
شكرااا

[منير7]

شكرا على ردودكن البهية

دمتن مخلصات لمتصفحي

بارك الله فيكن

[إخلاص]

منييير شاعر ملحون ما كنتش عارفة :11:
فكّرتني في بعزيز :11:
صح فاقو و فاقو
ربّي يجيب الخير و خلاص
راقني جدّا ما خطّطته
تحيّة تليق

[منير7]

منييير شاعر ملحون ما كنتش عارفة :11:
فكّرتني في بعزيز :11:
صح فاقو و فاقو
ربّي يجيب الخير و خلاص
راقني جدّا ما خطّطته
تحيّة تليق

أهلا جدتي

نورتي متصفحي

اللهم آمين

سعدت بمرورك جدتي الغالية

[ام زين الدين]

تسلم الايادي اخي

[منير7]

تسلم الايادي اخي

الله يسلمك أم زيزو