يا الجبار

[محمد سعيد ريال]

يا الجبار


كُونْ حَذْرِي يَا غُرِي مَنْ اصْحَابْ ذَالْجِيلْ * مَا مْعَاهُمْ نَيَّة لَا صِدْقْ لَا خْصَايَلْ

لَا وْفَاء لَاكَلْمَة لَا عَدْلْ فِي الكِيلْ * لَا صْدِيقْ تْصِيبُو سَنْدَة فِي الوْحَايَلْ

تْكُونْ وَاقَفْ يَمّدْحَكْ بَالثّنَاء وَ التّهْلِيلْ * وْكِي تْطِيحْ يْشُوفَكْ وَيْهَبْطْ النَّوَاجَل

يَا الجَبَّارْ اجْبَرْ الاحْوَالْ دِيرْ تَوِيلْ * لَا تْصَلَّطْ عَنّا مَنْ لَا خْشَاكْ جَاهَلْ

يَا سْنِيدْ المَضْيُومْ فِي سَايْرْ الوْسَايَلْ

*عروبي*

إذَا كُنْتْ فِي الخِيرْ يَكَّثْرُو الاحْبَابْ * يَجّعْلُوكْ سُلْطَانْ وَ الكُلْ ايْطِيعُوكْ

يْصَدْقُو مَا تْقُولْ وَلُو انْتَ كَذّابْ * احْذَرْ قُومْ النِّفَاقْ رَاهُمْ يَغَدْرُوكْ

فِي وَقْتْ الشّدَة يَغّلْقُو الابْوَابْ * يَعْطولَكْ بَالقَفَا يْصَدُّو وَ يْخَلّوكْ

رَدْ بَالَكْ يَا غْشِيمْ طْرِيقْهُمْ فِيهْ الشّوكْ

*مطلع*

اجْتَانَبْ خُلْطَتْهُمْ وَ اكْمِي السّرْ تَرْتَاحْ * وَ لْسَانَكْ شَدّو تَنْجَا مِنَ المَتَاعَبْ

فَاتْ وَقْتْ النّخْوَة وَ مْضَا زْمَانْهَا رَاحْ * مَنْ تْضَنّو صَافِي تَلْقَاهْ سَمْ عَقْرَبْ

لَا رْفِيقْ تْقُولْ نْصِيبُو رْشِيدْ نَصّاحْ * إذَا ضْيَاقَةْ الامُورْ عْلِيكْ وَ المَصَايَبْ

*بيت*

هَاكْذَا طْبَايَعْهُمْ مَعْرُوفِينْ مَنْ قْبِيلْ * كَانْ دَرْتْ النّيَة يَسْقُوكْ سَمْ قَاتَلْ

وَارْثِينْ الغَدّرْ وَالخَدْعَة جِيلْ عَنْ جِيلْ * وْحَاسْبِينْ الرّجْلَة كِي يَلْبْسُو السّرَاوَلْ

يَا الجَبّارْ اجْبَرْ الاحْوَالْ دِيرْ تَوِيلْ * لَا تْصَلّطْ عَنَّا مَنْ لَا خْشَاكْ جَاهَلْ

يَا سْنِيدْ المَضْيُومْ فِي سَايْرْ المْسَايَلْ

*عروبي*

إذَا ضْيَاقَتْ بِيكْ عَييّطْ يَا مُتْعَالْ * مَنْ لَا غِيرُه تْصِيبْ سَنْدَة لَكْتَافَكْ

حَاظَرْ نَاظَرْ قْرِيبْ يُوجِيبْ السُّؤالْ * يَعْلَمْ مَا جْهَرْتْ بِيهْ وَ مَا فِي ادْخَالَكْ

الرَّزَاقْ الكَرِيمْ مَا يَبْخَلْ مُحَالْ * بَصِيرْ يَرَى الكُونْ فِي اللِّيلْ الحَالَكْ

تْظَرَّعْ وَارْفَعْ الكْفُوفْ وَاسْئَلْ يُوعْطَى لَكْ

*مطلع*

نَالْ مَنْ يَطْلُبْ المُولَى حْلِيمْ مَنَّانْ * سَرِيعْ المَعْطَي مُجِيبْ كُلْ طَالَبْ

إذَا جَارَتْ لِيّامْ عْلِيكْ هَمْ وَ احْزَانْ * قُولْ حَسْبِيَ الله نِعْمْ الوَكِيلْ رَاقَبْ

الغِي دْصَارَتْ ذَالجِيلْ قْوَاتْ فِيهْ لَفْتَانْ * الغَدْرْ وَ الخَدْعَة وَ الغُشْ وَ المْقَالَبْ

*بيت*

البُخْلْ بَاحْ وَ فَعْلْ الخِيرْ نَادَرْ قْلِيلْ * مْتَبْعِينْ الدُّنْيَا يَجْرُو مْرَا وْ رَاجَلْ

لَا هَنَا لَا رَاحَة الشّقاء النّهَارْ وَ اللّيلْ * القُلُوبْ قْصَاحَتْ وَ اشْيَانْتْ الفْعَايَلْ

يَا الجَبَارْ اجْبَرْ الاحْوَالْ دِيرْ تَوِيلْ * لَا تْصَلّطْ عَنّا مَنْ لَا خْشَاكْ جَاهَلْ

يَا سْنِيدْ المَضْيُومْ فِي سَايْرْ المَسايَل

*عروبي*

اصْغَى لِي يَا لْبِيبْ وْكُونَ وَاعِي نُوصِيكْ * مَنْ خَلْطَتْ ذَالرّهُوطْ احْذَرْبَالَكْ

رَاهُمْ يَغّدْرُوكْ وْ يَرْمُو اللُّومْ عْلِيكْ * يَعَمْلُوا العَمْلَة وْ يَنْسَبُوهَا لَكْ

وَقْتْ انْ تَحْتَاجْهُمْ يَسّمْحُوا فِيكْ * اللِّي تْلَاقِيهْ تْقُولْ عُمْرُو مَا شَافَكْ

وَيَنْسَا مَا دَرْتْ فِيهْ مَنْ خِيرْ افْضَالَكْ

*مطلع*ْ

إذَا تْبَسّمْلَكْ وْ مَدْحَكْ بِقُولْ مَعْسُولْ * رَدْ بَالَكْ مَنُو اعْرَفْ شئِ في بَالُو

يَخّذْلَكْ عَنْدْ الحَزّة وَ شْدَايْدْ الهُولْ * هَاكْذَا رَاهْ الوَقْتْ وْ هَاكْذَا رِجَالُو

صَاحْبْ الحُرْمَة وَ النّخْوَة صَارْ مَعْزُولْ * وَ الحْثَايَلْ فِي المِدَانْ صَالُو وْ جَالُو

*بيت*

يَدَّاعُوا المَحِبَّة وَ يْدَرْقُو التَّتْبِيلْ * وَ القُلُوبْ مْلَانَا بْقَطْرَانْهَا الْدَاخَلْ

فِي الألَفْ تَلْقَا وَاحَدْ يَصْلَحْ اصِيلْ * لَا زْعَامَة قَعْدَةْ لَا مَنْ تْقُولْ رَاجَلْ

يَا الجَبّارْ اجْبَرْ الاحْوَالْ دِيرْ تَوِيلْ * لَا تْصَلّطْ عَنّا مَنْ لَا خْشَاكْ جَاهَلْ

يَا سْنِيدْ المَضْيُومْ فِي سَايْرْ المَسَايَلْ

*عروبي*

ظَاعَتْ عُقُولْ النّاسْ فَسْدَةْ يَا لَطِيفْ * لَا ضْمَايَرْ حِيَّ وَ لَا عَاهَدْ وَافِي

لَا مُرُوئَة بْقَاتْ لَا كَلْمَة لَا نِيفْ * مَنْ تَعْمَلْ فِيهْ خِيرْ بَالشّرْ يْكَافِي

وَ اللّي تْقُولْ فِي ذِيقْتِي نَلْقَاهْ حْلِيفْ * يَنْعَرْنِي وَ يْكُونْ سَنْدَة لَكْتَافِي

يْبِيعَكْ بَا لرّخِيسْ وَ الخِيرَكْ نَافِي

*مطلع*

يَنْكَرَكْ وْ يَلْقَالَكْ سَبَّة يْعَادِيكْ * بَعْدْ انْ نَجّيتُو مِنَ الغَرْقْ وَالمَهَالَكْ

انْتَبَهْ يَا رَاسِي مَنْ ذَالمَنَامْ يَجْزِيكْ * يَا الغُرِّي اسْتَيْقَظْ فِيقْ مَنْ مْنَامَكْ

فِي ذِيقْتَكْ تَبْقَا وَحْدَكْ حَدْ مَا يْجِي لِيكْ * مَا يَنْفَعَكْ صَاحَبْ لَا خُوكْ لَا قْرِيبَكْ

*بيت*

اقْنَعْ بَنْصِيبَكْ وَلُو كَانْ شِئ قْلِيلْ * القَنَاعَة سَمَّاوْهَا كَنْزْ يَا العَاقَلْ

دِيرْ تَكْلَكْ فِي الوَهَّاب الغَنِي الوَكِيلْ * وْاصْبَرْ لَقْضَاهْ سُبْحَانُه القَوِي العَادَلْ

يا الجبار اجبر الاحوال دير تويلْ * لا تْصَلّطْ عَنَّا مَنْ لَا خْشَاكْ جَاهَلْ

يَا سْنِيدْ المَضْيُومْ فِي سَايَرْ المْسَايَلْ

*عروبي*

اصْبَرْ رَاهْ الصّبْرْ لَلْفَارَجْ مَفْتَاح * وَ اللِّي صَبْرُوا جْمِيعْ نَالُوا مُبتغاهم

دِيرْ تَكْلَكْ في الله الغني الفَتّاحْ * وَالغِي قُومْ الجُحُودْ مِنَ البَالْ انْسَاهَمْ

اخْطِي دْصَارَتْهُمْ تَتْهَنّا تَرْتَاحْ * كُلْ مَا كُنْتْ بَعِيدْ تَنْجَى مَن بْلَاهُمْ

جَانَب شَلّةْ الفَسَادْ وَ ابْعَدْ عَنْ هْوَاهُمْ

*مطلع*

خُوذْ مَنِّي نَصِيحَة يَا كْثِيرْ الاصْحَابْ * صُونْ سَرّكْ وَاحْظِيهْ تْفُوزْ فِي النّْهَايَة

إذَا فْشِيتْ عُيُوبَكْ لاَ تْلُومْ حَدْ مَنْ عَابْ * لَا تَكْشَفْ اسْرَارَكْ لَلْوَرَى مْرَايَا

مَنْ اسْتَرْ عْيُوبُو يَبْقَا عَزِيزْ مُوهَابْ * وَ مَنْ كْشَفْهَا يَتْلَقّا دَقّتْ الرّمَايَة

*بيت*

سَدْ وَذْنَكْ لَا تَسْمَعْ لَحْمَقْتْ هْبِيلْ * وَ لَا تْأَمَنْ وَاشِي كَانْ جَاكْ يَتْحَايَلْ

وَاللِّسَانْ كَانْ طْلَقْتُو يَرْمِيكْ فِي الوِيلْ * وَاعْلَمْ أنّكْ قَدْ مَا عَشْتْ رَاكْ رَاحَلْ

يَا الجَبّارْ اجْبُرْ الاحْوَالْ دِيرْ تَوِيلْ * لَا تْصَلّطْ عَنّا مَنْ لَا خْشَاكْ جَاهَلْ

يَا سْنِيدْ المَضْيُومْ فِي سَايْرْ المْسَايَلْ

*عروبي*

يَا فَاهَمْ ذَالكْلَامْ وَ سَرْ مْعَانِيهْ * هَذِه لِيكْ نَصِيحْتِي لَا تَنْسَاهَا

اتْرَكْ غِيرَكْ فِي مَا اكْتَبْلُو الله خَلّيهْ * قَادَرْ مَنْ بْلَى العِبَادْ يعَجّلْ بَدْوَاهَا

الحِيْ الجَبّارْ فَوّضْ امْرَك ْ لِيهْ * تْعِيشْ فِي أمَانْ وَ الهْناَء وَ انْزَاهَا

فَعْلْ الخِيرْ مِنَ الكُرْمْ وَ الشّرْ سَفَاهَا

* مطلع*

كُلْ مَنْ دَارْ الخِيرْ يَلْقَا ثَوَابْ لَحْسَانْ * وْ صَاحَبْ الشّرْ يَلْتَقَى شَرُو خْصِيمُو
العَفَيفْ التّاقِي فِي الهَنَاء وْ الامَانْ * مَنْصُورْ بِإذْنْ الله مْثَبْتَا اقْدَامُو

رَاهُ الله حَسِيبْ رَقِيبْ يا الغَفْلَانْ * كُلْ غَدّارْ فِي النَّهَا يَة يَنْسَقَى بَسَمُّو

*بيت *

اجِيرْنَاوَاحْفَضْنَا فِي حْمَاكْ يَاالجَلِيلْ ** عِينْنَا عْلَى الأُمُورْالصّاعْبَةوْسَهّلْ

غِيثْنَا يَا سْرِيعْ المَعْطَة بِدُونْ تَعْطِيلْ ** فَكْ وَحْلَتْنَا يَا فُكّاكْ كُلْ حَاصَلْ

نَجِينَا يَا مَنْ نَجِيتْ مْنَ اللّضَى الخَلِيلْ ** صَارَتْ بَرْدًا بَعْدْ انْ كَانَتْ نَارْ تشْعَلْ

وَانْصَرْنَا عَلَى القُومْ العَابْدِينْ التّهْوِيلْ ** بْلَا مْحَارَمْ يَشّطْحُو لِكُلْ مَنْ يْطَبّلْ

مَا يْخَافُوا مْنَ الله مَا اسْتَحَاوْ بَتْبَهْدِيلْ ** كُلْ مَنْ دَارْ العِيبْ وَاجَبْ عَلِيهْ يَخْجَلْ

قولُ لِمَنْ بْغَا يْمَثّلْ شَمْعَتُو لْقَنْدِيلْ ** إذَا هَبْ عْجَاجِي مَا بْقَالْهَاشْ تَشْعَلْ

الزّعَامَة مَاهِيشْ بَالنّفْخْ وَ التّْهَرْوِيلْ ** يَا مَنْ مَثّلْتْ الفُوقِي لَلْمَقَامْ الاسْفَلْ

اخْتَمْتَهَا بَالصّلَاةْ عَلَى النَّبِي الفَضِيلْ ** حُلّة نَتْبَاهَا بِيهَا فِي المْحَافَلْ

وْالسَّلَامْ على الشُعَرَاء وَ لَشْيَاخْ وَصِيلْ ** اهْلْ العُقُولْ الأُدَبَاء فِي المَقَامْ الاوَّلْ

اسْمِي مَا يَخْفِيهْ إلّا جَاحَدْ بَخِيلْ** حَاء وْمِيمِينْ وْ دَالْ يُوفَا الأسْمْ كَامَلْ

قَالْ رِيّالْ يَا خَالِقِي دِيرْ تَوِيلْ ** لا تُشَفِّي فِينَا اللأرْذَالْ وَ الحِثَايَلْ

يَا الجَبّارْ اجْبَرْ الاحْوَالْ دِيرْ تَوِيلْ ** لا تْصَلّطْ عَنّا مَنْ لَا خْشَاكْ جَاهَلْ

يَا سْنِيدْ المَضْيُومْ فِي سَايْرْ المَسَايَلْ **

* تمت بعون الله *

*محمد ريال*