يَا زَهْوْ الحَاضِي*

[محمد سعيد ريال]

يا زَهْوْ الْحَاضِي ** فَاقْدِ المُوضْنَى يَا زَهْرْ الرِّيَاضْ
بَرَّدْ تَشْوَاضِي ** اتْنَالْ أَجْرْ اللِّي زَارْ امْرِيضْ

رَاهْ نَبْلَكْ خَاضِي ** فِي احْشَايَا اظْرَبْنِي ظَرْبْ البْغَاضْ
كَالسِّيفْ المَاضِي ** خَلَّى دَمِّي مَسْفُوكْ ايْفِيضْ

وَ اشْتَدْ امْرَاضِي ** مَرْضْ خَافِي مَا بَانَتْ لُو اعْرَاضْ
الحَاضَرْ وَ المَاضِي ** حَارُوا فِيهْ ارْبَابْ التَّمْرِيضْ

كَفْ ارْتِفَاضِي ** انْعَمْلِي بَالزُّورَة نَقْضِي اغْرَاضْ
يَصْفَى تَخْوَاضِي** يَا مَنْ زِينَكْ فَتَّانْ ابْهِيضْ

يَا زَهْوْ الحَاضِي ** فَاقْدِ المُوضْنَى يَا زَهْرْ الرِّيَاضْ
بَرَّدْ تَشْوَاضِي ** اتْنَالْ أَجْرْ اللِي زَارْ امْرِيضْ

اسْتَشْفَى بَغَّاضِي ** فِي مَا جَرَى لِي وَ جْرَحْنِي بَالْفَاضْ
زَادْ اغْتِيَّاضِي ** رَاهْ قَلْبِي يَغْلِي بالغِيضْ

مَا اقْدَرْتْ انْحَاضِي ** بَاحَتْ اسْرَارِي ابْدَمْعْ العِينْ فَاضْ
قَرَّحَتْ اغْمَاضِي ** احْقُودْ قَاسِي جَبَّارْ ابْغِيضْ

رَايْدْ اخْتِفَاضِي ** وَ انَا ارْفَعْتُه بَعْدْ انْ طَاحْ نَاضْ
علَى العَاهَدْ مَاَضِي ** انْقَدَمْ النَّصْحْ مْعَ التُّوْعِيضْ
يَا زَهْوْ الحَاضِي ** فَاقْدِ المُوضْنَى يَا زَهْرْ الرِيَّاضْ
بَرَّدْ تَشْوَاضِي ** وَ اتْنَال أَجْرْ اللِّي زَارْ امْرِيضْ

بَعْذَابُه رَاضِي ** امْنِينْ حُوَّطْ بِيَّا حُبُّه وْ هَاضْ
وَ اعْدَمْ تَنْوَاضِي** وَ الجَفْنْ اجْفَاهْ التَّغْمِيضْ

قُلْتْ يَا عَرَّاضِي ** افْنِيتْنِي بَسْهَامْ اشْفَارْ اللّْحَاضْ
وَ اذْبَالْ ارْيَاضِي ** بَعْدْ طِيبْ انْسِيمُه البَهِيضْ

خَفَّفْ تَهْيَاضِي ** بَالقَاكْ فِي رَصْمِي يَصْفَى الخُوَاضْ
يَنْدَمَرْ بَغَّاضِي** وْ كُلْ مَنْ هُو حَاسُودْ ابْغِيضْ

يَا زَهْوْ الحَاضِي ** فَاقَدِ المُوضْنَى يَا زَهْرْ الرِّيَاضْ
بَرَّدْ تَشْوَاضِي ** وَ اتْنَالْ أجْرْ اللِّي زَارْ امْرِيضْ
كَمَّدْتْ ارْضُوضِي ** وْ لَمِّيتْ الجَرْحْ اللِّي فِي الذَاتْ خَاضْ
وْ كَامِي غِيضِي ** وْ قُلْتْ عَلَى الله التَّعْوِيضْ

خُوذْ آ حَفَّاضِي ** قْصِيدْ صُونُه وَ افْهَمْ مَعْنْ اللّْفَاضْ
يظْهَرْلَكْ غَرْضِي ** اشْرِيقْ ضَاوِي يَزْنَدْ كِالْمِيضْ

قُولْ لْعَرَّاضِي ** مَا ايْقَرَّبْ لنَهْرِي كَانْ فَاضْ
مَنْ هُوَ فَاضِي ** الخْفِيفْ يَجَّرْفُه سِيلْ الفِيضْ
يَا زَهْوْ الحَاضِي ** فَاقْدِ المُوضْنَى يَا زَهْرْ الرِّيَاضْ
بَرَّدْ تَشْوَاضِي ** اتْنَالْ أجْرْ اللِّي زَارْ امْرِيضْ

تَمِّيتْ الفَاضِي ** انْهِيتْ ذَالْمَنْظُومَة بْعُسْرْ المَخَاضْ
مَنْ بْغَا اعْتِرَاضِي ** ايْفَتَّشْ عَنْ عْيُوبِي للتَّقْرِيضْ

يَظْهَرْ لَكْ مُوضِئ** اسْمِي إذَا ذْكَرْتُه عْدُويَا اغْتَاضْ
مَصْقُولْ وْ مَاضِي** سِيفِي لِرَقْبَتْ كُلْ ابْغِيضْ

نَحَّمْدُه وْ رَاضِي** بِمَا اقْسَمْلِي رَبِّي مَالِي اعْتْرَاضْ
بَعْدْ الاغْتِيَّاضِي** ايْجُودْ فَضْلُه وَ الخِيرْ ايْفِيضْ

يَا زَه,ْ الحَاضِي ** فَاقْدِ المُوضْنَى يَا زَهْرْ الرِّيَاضْ
بَرَّدْ تَشْوَاضِي ** اتْنَالْ أجَرْ مَنْ زَارْ امْرِيضْ
بَالعَدْلْ ايْقَاضِي ** إذَا قَضَا أمْرُه مَا عْلِيهْ إعْتِرَاضْ
بَعْدْ الاخْتِفَاضِي ** يَرْفَعْ اعْبِيدُه مَنْ لَحْضِيضْ

ابْجَاهْ المُرْتَضِي ** شَفِيعْ الأمَّة طَهَ شْعَاعْ الحَاضْ
مَنْ جَانَا حَاضِي ** جَعْلُو مُولاَنَا احْجَابْ اغْلِيضْ

رَبِّي يَا حَاضِي ** احْضِي اعْبِيدَكْ مَنْ الهُولْ وَ مْنَ المْرَاضْ
جَاوَزْ وْ غَاضِي ** وَ اغْفَرْ لَرِيَّالْ ذَنْبُه لَغْلِيضْ

يَا زَهْوْ الحَاضِي ** فَاقْدْ المُوضْنَى يَا زَهْرْ الرِّيَاضْ
بَرَّدْ تَشْوَاضِي ** اتْنَالْ أجْرْ اللِّي زَارْ امْرِيضْ
تمت بعون الله.
محمد ريَّال.