طَالْ هَذَا الوعْد عَلِيَا

[محمد سعيد ريال]

طَالْ هَذَا الوَعْدْ عَلِيَا اعْييتْ نَرْجَى **** آشْ مَنْ يُومْ اتْجِينِي يَا إيمَامْ لَبْنَاتْ

يَا دْرَى نَغْنَمْ شِي سَاعَة معَكْ فَرْجَة **** نَنْضَرْ فِي اخْيَالَكْ يَا تَاجْ كُلْ مِرَاتْ

مَا امْشَاوْ فِي سَطْوَتْ زِينَكْ بْنَاتْ بَهْجَة **** لِيسْ مَثْلَكْ فِي الدُنْيَا وَ الزّْمَانْ هَيْهَاتْ

نَجْمَكْ اطْلَعْ وَ شَعْشَعْ فِي النَّهَارْ وَ ادْجَا **** وَ ارْتَقَى عَلَى نَجْمِي تَلَّفْتْ بِهْ لُوقَاتْ

كِيف تَرْبَحْ مَنْ ذَنْبِيي كِيفْ عَادْ تَنْجَا **** انْحَاسْبَكْ قُدَّامْ الله يَا ظَرِيفْ لَنْعَاتْ

كِيفْ تْكُونْ مَنْ رَبِّي فِي مَحْشْرُه بِمَنْجَا **** المْقَصْ وَ المَلاَيْكَة شُهُودْ خُوجَاتْ

كُلْ مَا فُوَّتْ عْلِيَا جْفَاء وَ امْلاَجَة **** دَخِيلْ عَرْضَكْ كَفِينِي بَاللِّقَاء وُ لَمْبَاتْ

نَرْتَحَمْ بُوصَالَكْ فِي مَا امْضَا وُ مَا جَاء **** مَا ايْخَيَّبْشِي ظَنِّي رَافْعْ الدَّرْجَاتْ

يَنْشَرَحْ صَدْرِي وَ انْجَدَّدْ فِي النّْسَاجَة **** انْرَصَّعْ ذْهَبْ وُ فُجْرَة طْرِيزْ لَبْيَاتْ

نَنْسَجْ قُمَاشْ مْسَجَرْ صَنْعَتِي ابْهِيجَة **** مْرَمْتِي امْرَكَّزْهَا مَا بِينْ زُوجْ نَخْلاَتْ

اوْصَافْ هَذِه العَذْرَة عَالْيَا بِألْفْ دَرْجَة **** بَنَاتْ هَذْا الجِيلْ ايْطِيعُولْهَا خْدِيمَاتْ

الحُوَاجَبْ نُونِينْ مْعَرْقِينْ بَهْجَة **** بِينْ قَابَ قَوْصِينْ امْطَلْعِينْ حَرْبَاتْ

الثّْيُوثْ اسْوَادُوا عَنْ طُولْهَا امْدَجَّة **** وَ الجَبِينْ وَ الغُرَّة زُوحَلْ بِينْ نَجْمَاتْ

الشَّفْرْ امْغَنَّجْ وَ اعْيُونْهَا ادْعَاجَة ****وَ الخُدُودْ امْصَابَحْ شَعْلُوا مْعَ الفْنَارَاتْ

الشّفَايَفْ وُ مَبْسَمْ وَ فِي الثِّغْرْ فَلْجَة **** وَ الرَّقْبَة فُجْرَة يَا عَاشْقِينْ بَهَّاتْ

وَ الزّْنُودْ سْيُوفْ الطُوغَاتْ مِنَ العْلُوجَة **** وَ النُّوَابَغْ فُوقْ الصَّدْرْ البَهِيجْ رَنْجَاتْ

تَحْتْهُمْ يَقُوتَة مَسْبُوكَة فْرِيجَة **** تْشَابَهْ الزَّهْرَة وَ المَرِّيخْ طَالَعْ ضْوَاتْ

لَرْفَاغْ اشْوَابَلْ يَتْقَلْبُوا فِي مُوجَة **** كَأنَّهُمْ مِنْ الجَنَّة خَرْجُوا لْوَادْ فُورَاتْ

السِّيقَانْ مِنَ العَاجْ يُوهْجُوا فِي طَهْجَة **** وَ الرّْدِيفْ وَ اخْلاَخَلْ ايْتِيْهُوا تِيهَاتْ

قَدْهَا كَالصَّارِي جَابْ الغْنَايَمْ وُ جَاء **** عَلَى الجَزَايَرْ رَصَّا يَا عَارْفِينْ لَشْيَاتْ

كَفْ نَظْمِي يَا حَفَّاظِي خُوذْ قُوجَة **** سَلْسَلَة مِنْ لُوجِينْ مَا سَاوْمُوهَا قِيمَاتْ

رَحَّمْ عَلَى قَدُّورْ إذَا بْغِيتْ تَنْجَا **** قُولْ الله يَجْمَعْنَا فِي قُصُورْ لَتْقَاتْ

وَ اتْهَلَّا فِي ذَ الحُلَّة فِي كُلْ حُوجَّة **** تَنَالْ بِهَا سَطْوَاتْ العَزْ عَنْدْ السَّدَاتْ

اصْنَعْتْهَا فِي نَدْرُومَة البَاهِيَة فْرِيجَة **** جُوهْرَة مَبْشُورَة فِي تَاجْهَا اتْعَلاَّتْ

امْكَلّْلَة بَعْقِيقْ وُ عُقْيَانْ سَرْ حَاجَة **** بَرْهُمَانِيَة مَنْ آرَامْ نُوحْ أتَاتْ



تَمت بعون الله . الشيخ قدور بن عاشور الزرهوني.