ما زْيَن اوصُولَك

[محمد سعيد ريال]

فِي اغْرَاضْ اعْذُولَكْ *------* خَابْ سَعْدِي يَا مَحْبُوبِي امْعَاكْ

وَ احْفَزْتْ اقْدُومَكْ *------* عَنْ ارْصَامِي وَ اثْقَالْ امْجِيك

يَتْسَقَّمْ شُورَكْ *------* حَتَى انْقُولْ الله عَلِيَا اهْدَاكْ

وَ اتْعُودْ الجُورَكْ *------* وَ الرّْقِيبْ انْرَاهْ امْحَادِيكْ

اشَنْ هُو مَضْنُونَكْ *------* عِيدْ لِيَّا عَوْرِيطْ اللِّي انْسَاكْ

اشَنْ هُو مَقْصُودَكْ *------* يَا اللِّي تَكْرَهْ مَنْ يَبْغِيكْ

قَصَّرْ فِي اصْدُودَكْ *------* آ مَالْكِي لاَ تَحْرَمْنِي مَنْ بْهَاكْ

لِأنِي مَمْلُوكَكْ *------* وْ لاَ ايْلِيكْ فِيَا حَدْ اشْرِيكْ

مَزْيَنْ اوصُولَكْ *------* يَا البَدْرْ السَّانِي لُوْ لاَ اجْفَاكْ

وَ كْلاَمْ حْسُودَكْ *------ * وَ الرَّقِيبْ اللِّي دَايَرْ بِيكْ

قَابَلْ بَشْرُوطَكْ *------* حَنْ وَ اشْفَقْ وَ اعْطَفْ لَلِّي اهْوَاكْ

زُورُه وَ ايْزُورَكْ *------* نَبْهُه وَ انْهِيهْ ؤ يَنْهِيكْ

سَرَّحْ مَسْجُونَكْ *------* يَا الجَافِي وَ انْعَمْ لُه بَالفْكَاكْ

وَ افْدِي مِيسُورَكْ *------* لِأنْ حَالُو مَحْسُوبْ عْلِيكْ

وَ عْلَى مَغْلُوبَكْ *------*جُودْ وَ اسْخَى وَ ارْحَمْ بَعْدْ الهْلاَكْ

وَ اطْلَقْ مَطْلُوبَكْ *------* بْأَجَرْ الكْرِيمْ إيكَافِيكْ

مَا حَدْ انْجُومَكْ *------* ضَاوِيَة وَ اهْلاَلَكْ بِينْ الفْلاَكْ

مَنْ قَبْلْ اغْيُومَكْ *------* يَنْطْفَى ضِيُّو وَ ايخَلِّيكْ

مَزْيَنْ اوصُولَكْ *------* يَا البَدْرْ السَّانِي لَوْ لاَ اجْفَاكْ

وَ كْلاَمْ حْسُودَكْ *------* وَ الرّْقِيبْ اللِّي دَايَرْ بِيكْ

لُو جِيتْ انْجُوزَكْ *------* صَبْتْ عَقْلِي يَا جَافِي مَا انْسَاكْ

بَاقِي مَحْسُوبَكْ *------* مَا اوْفَى مِيجَالْ انْبَرِّيكْ

اسْتُوَاتْ عْيُوبَكْ *------* خُفْتْ يَشْفَاوَكْ يَا وَلْفِي اعْدَاكْ

وَ اخْفِيتِ اكْذُوبَكْ *------* وَ لاَ قْدَرْتْ الكُلْ انْعَادِيكْ

وَ امْنَاشْ هُرُوبَكْ *------* عِيدْ لِي بَعْدْ نَعْرَفْ مَا انْفَاكْ

وَ احْكِي لِي قُولَكْ *------* يَا الجَافِي نَعْرَفْ مَا بِيكْ

فَاقَدْ مَهْجُورَكْ *------* مَتّْعُو بَعْدْ الهَجْرَة فِي ارْضَاكْ

وَ اللِّي مَغْلُوبَكْ *------* كِيفْ حَتَّى يَقْدَرْ يَجْفِيكْ

مَزْيَنْ اوصُولَكْ *------* يَا البَدْرْ السَّانِي لُوْ لاَ اجْفَاكْ

وَ اكْلاَمْ احْسُودَكْ *------* وَ الرَّقِيبْ اللِّي دَايَرْ بِيكْ

حَارَبْتْ اجْيُوشَكْ *------* رَاحْ مَكْسُورْ الجِيشْ اللِّي اغْوَاكْ

قَلَّعَتْ اخْيُولَكْ *------* كَانْ سِيفِي غَادِي يَبْرِيكْ

شَقِّيتْ ابْحُورَكْ *------* فِي الضَّمَا بِينْ المُوجْ اشْرَبْتْ مَا كْ

وَ اغْنَمْتْ اسْفُونَكْ *------* بَعْدْ كَانْ ارْقِيبَكْ يَحْمِيكْ

وَ اخْرَقْتْ احْجُوبَكْ *------* بْسِيفْ شِعْرِي وَ اهْوِيتْ عَلَى اسْمَاكْ

وَ ابْطَلْتْ اسْحُورَكْ *------* وْلاَ قْدَرْ مَنْ يَسْرِي يَفْدِيكْ

وَ اغْنَمْتْ سْرُورَكْ *------* يُومْ كُنْتْ دَايَرْنِي كِيفْ خَاكْ

وَلاَّ مَحْبُوبَكْ *------* صُورْتِي بَالنَّضْرَة تَسْبِيكْ

مَزْيَنْ اوصُولَكْ *------* يَا البَدْر الضَّاوِي لُو لاَ اجْفَاكْ

وَ كْلامْ احْسُودَكْ *------* وَ الرَّقِيبْ اللِّي دَايَرْ بِيكْ

زَكِّيتْ فِي نُورَكْ *------* يُومْ خَجْلُوا نَجْلاَتِي فِي ابْهَاكْ

وَ انْظَرْتْ اشْمُوسَكْ *------* كَنْ تَاجْ فِي حَضْرَةْ مَلِيكْ

وَ ابْطَالْ اجْنُودَكْ *------* بَالطّْرَارَدْ مَحْزُومْ فِي اقْفَاكْ

وَ اعْبِيدْ اصْفُوفَكْ *------* سَمْعُو بَعْدْ الطَّاعَة لِيكْ

عْرَفْ شِي ايْصِيبَكْ *------* مَنْ اذْنُوبِي وَ اسْتَحْفَظْ لانْرَاكْ

غَارَقْ فِي ذْنُوبَكْ *------* شَايَنْ بْلِتِينِي يَبْلِيكْ

لُوْلاَ مَكْتُوبَكْ *------* لاَغْنَى تَتْصَرَّفْ شَايَنْ اعْطَاكْ

مَنْ غِيمْ اغْيُومَكْ *------* رَبْنَا يَبْلِيكْ ؤ يَشْفِيكْ

مَزْيَنْ اوصُولَكْ *------* يَا البَدْرْ الضَّاوِي لُوْ لاَ اجْفَاكْ

وَ اكْلاَمْ احْسُودَكْ *------* وَ الرَّقِيبْ اللِّي دَايَرْ بِيكْ

تمت بالتوفيق من الله. (نظم). سيدي قدور العلمي

[دائمة الذكر]

~~~~~~~~~~~~~~~~