منتديات الشروق أونلاين - يا لاهِي بَالنَّاس

أسْتَخْلَصْ الدَّرْسْ يَا دْمَاغِي من الوَقْتْ وْحَالُه * كُونْ لْبِيبْ وْ خَدَّمْ العْقَلْ

احْذَرْ بَالَكْ ذَالزَّمَانْ رَاهِي كَثْرَةْ اهْوَالُه * وَ الدَّهْرْ رَاهْ يَغَرْ بِمَنْ غْفَلْ

مَا تُوْجَدْ فِي وَقْتْنَا صَاحَبْ لاَ خُو تَلْجَاء لُه * لا من تْقُولْ يَخفْفْ الثَّقلْ

زْمَانْ النَّخْوَة رَاحْ وَ مْضَى وَ مشَاتْ رْجَالُه * من يَصْحَبْ في جِيلْنَا اهْبَلْ

حرْفَتْهُمْ الغَدْرْ وَ الخْدَعْ وَ الغُشْ و َ يَحْتَالُو * وَ اللِّي يْدِيرْ العِيبْ مَا خْجَلْ

وَإذَا صَحْبُو حَدْ أعْرَفْ صَحْبُوهْ على مَالُه * وَ ايْعاَدُوهْ إذَا المَالْ قَلْ

يَنْسَاوْ وَاشْ كْلَاوْ وَاشْ شَرْبُو مَنْ خِيرْ افْضَالُه * وَ يَتْفَكْرُو لُه سُوءْ مَا عْمَلْ

وَ يَحَّسْدُوهْ إذَا فَازْ وَ انْجَحْ وَ الله اعْطَى لُه * ؤُ يَفَّرْحُولُه إذَا فْشَلْ

يا لاهِي بالنَاسْ التْهَا بَعْيُوبَكْ اثْقَالُو * يَا مَنْ دَرْتْ اعْيُوبْنَا اشْغُلْ

اللِّي مَا يَعْنِيكْ غِيرْ تَتْعَبْ مَنْ ثُقْلْ احْمَالُو * مَا تَدِّي فَايْدَة وْلاَ افْضَلْ

يَا رَاسِي ذَالْقُومْ إذَا ضْحَكْ لَكْ حاَجَة في بَالُه * يَقْضِيهَا وَ ايْرُوحْ يَنْجَفَلْ

وَإذَا قَصْدَكْ في صَالْحَة وَ طَلْبك تَقْضِيهَا لُه * يْبُوسْ الصُّبَاطْ في الرّْجَلْ

وَقْتْ أنْ يقْضِي الصّالْحَة في وَجْهَكْ ايْسَدْ اقْفَالُه * بَزْكَارَمْ و َ يَمَتّنْ الْقُفَلْ

يَا رَاسِي ذَالْقُومْ إذَا صْحُبْتُه مَا تَرْبَحْ وَالُو * كِي اللِّي يَبْنِي صُورْ بَالرّمَلْ

المَظْهَرْ يَغْوِي تْقول هَذَا مَا كَانْشْ بْحَالُه * احْذَرْ رَاهْ مَبْنِي على الدّغَلْ

إذَا تْحَدَّث كَذّابْ رُدْ بَالَكْ تَامَنْ اقْوَالُه * في جَبْحُه لَا انْحَلْ لا عْسَلْ

في شْدَايَّدْ الحَزّاتْ مُسْتَعَدْ يَسَلّمْ في أهْلُه * رَاضِي دِيُّوتْ وَ يَبْغِي الذّلْ

· لَا كَلْمَة عَنْدُه لَا عَاهَدْ لاَ نِيفْ ابْقَى لُه * غِيرْ اللِّسَانْ طْوِيلْ كِي الحَبَلْ

يَا لاهِي بَالنّاسْ التْهَا بَعْيُوبَكْ اثْقَالُو * يَا من دَرْتْ اعْيوبْنا اشْغُل

اللِّي مَا يَعْنِيكْ غِيرْ تَتْعَبْ مَنْ ثُقْلْ احْمَالُو * مَا تَدِّي فَايْدَة وْ لاَ افْضَلْ

يَغْتَبْ في الأشْرَافْ وَ يْقَطّعْ كِمَا يَهَوالُه * مَا يَخْجَلْ مَا يَكَلْ مَا ايْمَلْ

اعْيِينَا انْوَصُو فِيهْ انْهِينَاهْ وَ قُلْنَا لُه * عِيبْ النَّاسْ انْسَاهْ يَا طْفَلْ

وَهًوَ زَايَدْ في عْمَاهْ وَ حْمَاقُه وَ هْبَالُه * شَبّهْنَاهْ لَلْوَجْقْ في المَثَلْ

مَطْلُوقْ دُونْ اوْثاقْ يَنْبَح حَتّى في خْيَالُه * هَذِه سِيرَةْ بُوهْ من قْبَلْ

هَيِّيتْلُه نَبْلاَتْ من اقْوَاصِي نرْسَلْهَا لُو * نَخْرَقْ ذَاتُه تَالفْ العْقَلْ

الغُرِي من جَابْتُه الحْمَاقَة وَ اعْمَاتْ انْجَالُو * وَ حَبْ يْعَانَدْنَا وْ مَا اخْجَلُ

قُولُولُه بَرْكَاكْ ذَالْبَحَرْ مَثْلَكْ مَا يَقْوَالُه * دِير لِجَامْ ؤُ زَمْ يا ابْغَلْ

مُولْ الكَلْخَة مُحَالْ مَا يْبَارَزْ من سَلْ انْصَالُه * وَاشْ ايْجِيبْ الفُوق لَلسَّفَلْ

وِينْ تْبَانْ الشَّعْبَة بِينْ الانْهَارْ اذَا سَالُو * يَا مَنْ مَثّلْتْ البُومْ لَلْحَجَلْ

نَخْتَمْ بالصّلَاةْ على من لَا فِي الخَلْقْ بْحَالُه * وَ الفِينْ سْلاَمْ لِيهْ مُرَتَسَلْ

يَا لَاهِي بَالنّاسْ ألْتَهَا بَعْيوبَكْ اثْقَالو * يا دَرْت عْيوبْنَا شْغُلْ

اللِّي مَا يَعْنِيكْ غِيرْ تَتْعَبْ مَنْ ثُقْلْ احْمَالُو * مَا تَدِّي فَايْدَة وْ لاَ افْضَلْ

وَ الرِّضَا على الأصْحَابْ وَالانْصَارْوالأزواج وألُه * بَفْضَلْهُمْ ماَ طْلَبْتْ يَنْقَبَلْ

وَسْلَامِي على الاشْيَاخْ كَافَّة و اللِّي عْلِينَا سَالُ * وَ الحَاسَدْ خَلِّيهْ في السَّفَلْ

لا اوْقَرْ لاَ قِيمَة لا خْصَايَلْ مَطُمُوصْ انْجَالُه * مَنْ احْمَاقِو فِي شَبْكَتِي احْصلْ

جَاء يْعَانَدْ الفُرْسَانْ وَ الخِيَالَى زَادَمْ بَبْغَالُو * غْرَابْ وْ حَبْ يْعَانَدْ الْحَجَلْ

انْهِيتْ المَنْظُومْ بَالْقُوَافِي رَتَّبْتْ اشْغَالُه * تَمِيتُو في لِيلْتُو اكْمَلْ

لَلْحَافَظْ اشْهَرْتْ اسْمِي وَ القَارِئ مَا يَخْفَالُو * مِيمِينْ حَاء وَ الدّالْ مَتّصَلْ

رِياْل ما يَخْفَاشْ ظَاهْرَة عَنْدْ الاشْيَاخْ خْصَالُه * ما يَجْحَدْنِي غِيرْ من بْخَلْ

مَا نَصْحَبْ نَمَّامْ وَ مَنْ غْتَبْ مَا نَسْمَعْ لَاقْوَالُو * نَتْصَرَفْ بْحِكْمَةْ العْقَلْ

يَا لَاهِي بَالنّاسْ الْتَهَا بَعْيُوبَكْ ثْقَالُو * يا مَنْ دَرْتْ عْيُوبْنَ اشْغَل

اللِّي مَا يَعْنِيكْ غِيرْ تَتْعَبْ مَنْ ثُقْلْ احْمَالُو * مَا تَدِّي فَايْدَة وْ لاَ افْضَلْ

تمَّتْ بِعَوْنِ الله وِقُوَتِه

مٌحَمّدْ رِيالْ.---في يوم 8 رَمَضَانْ 1433 .هجري