|
مذكّرات مراهقة....
مذكرات مراهقة...........
المذكرة تقول... كان واقفلي كي لمسمار ملي نخرج حتى نولي لدار وين نروح نصيبو بين عينيا و يلحقني حتى لثانوية يوقفلي قدام الباب و يعيط يا لحلو يا الشباب جازو اليامات و الشهور و هو مازالو بيا يدور حتى نهار جاء هدر معايا و قال نتي عمري و نتي هوايا تبعتك هادو يامات و عوام و لقيت بلي نتي فتاة الأحلام عماني بكلامو المعسول و فيه مالقيتش واش نقول وليت نشوفو كول يوم حتى رجع قلبي بيه مغروم ولى يطلب مني الخرجات نروحو للجناين و السينيمات نباتو نهدرو في التيليفون على لي كان و لي راح يكون طمعني نولي حلالو و حلفلي بربي جل جلالو ضيعت قرايتي و المستقبل ديالي صفار وجهي و تبدل حالي كي يزعف عليا نحس روحي ضايعة على جالو روحي و عمري بايعة و كي حس بلي قلبي راهو ليه و بلي ما نقدرش نعيش بلا بيه بدا يجبد في لسباب كي بداو يخرجولو لنياب حبني نروح معاه للأماكن الخالية و يطلب مني غير لحوايج الغالية و كي نرفض ديك الأمور عليا يبدا يدور يقول ما تخافيش نتي ديالي و راني ناويك حلالي تبعيني و ما تندميش أنا من غيرك ما عنديش كلام يجيب كلام حتى قريت على الدنيا السلام في دقيقة كلشي راح و قعدلي غير لبكا و التنواح قال السمانة الجاية نجيب مالييا غير ما تخافيش يا عينييا و ملي جاز هداك النهار ما زدت سمعت عليه حتى خبار التيليفون ديالو خارج التغطية و أنا نار قلبي مقديّا ساقسيت عليه صحابو ناسو و كامل حبابو كامل يقولو ربي يعلم و أنا كل شي فيا محطم كي تبعتو و دخلت معاه للغار و جبت لوالديا العار غير نروح ندفن روحي قبل مايسيل دمي و يزيدو جروحي جازو اليامات و الشهور و عقلي بدا يدور نحس حاجة داخلي تتحرك يا ربي غفرانك راني نطلب سترك علاش تبعت هذاك الذيب و درت لروحي العيب جازو يامات و شهر و كل حاجة فيا بدات تتغير واش نقول و واش نهدر و أنا كرشي بدات تكبر كي يفيقو والديا واش نقول واش راح نعمل و واش المعمول نروح نرفع عليه قضية و نبين بلي أنا لي رحت ضحية و لّا نهرب من هاد الدار قبل ما يلحق مالييا العار و قبل ما يزيد الحال و يكترو عليا لقوال خرجت وحدي هايمة البرد و لمطر و السماء غايمة قاعدة وحدي ندور و نهوم و الديابة عليا بدات تحوم لوكان غير يولي الوقت بيا كنت راح نقرا حدري من هاد الدنيا و مانزيدش ندير النية و نآمن الذئاب البشرية هذي حكايتي يا ناس خلو قلبكم بيا حساس وليت أم و أنا مينور مرمية و الديابة عليا أدور واحد عليا ماراهو يشفق نترامى وحدي في وسط الزنق حكيت حكايتي هادي باش نوصيكم يا ولادي قصتي هادي كي كنت دراري و اليوم راني كبيرة و الشيب في شعري جاري لي جاز ..راح و فات و نخلي و صيتي لكامل لبنات هادي حالة لي يتبع هواه يآمن قلبو و يمشي موراه ما تآمنوش غير ألي يجيكم خطاب و يقصدكم حتى للباب... نقلت لكم مذكرة هذه المرأة في شكل قصيد أتمنى أن تنال إعجابكم كما أتمنى أن نأخذ العبر من تجارب الآخرين .. أسأل الله و إياكم العفو و المغفرة... |
رد: مذكّرات مراهقة....
هذا العنوان ..
واقع متكرر للأسف اختي سعاد أعجبني جدا ما نثرت وايصالكـ الفكرة في القصة بهذه الطريقة بوركت |
رد: مذكّرات مراهقة....
شكرا لك أخي الكريم
أسعدني مرورك كثيرا كما أان كلامك يشجعني دمت |
رد: مذكّرات مراهقة....
اللّي راشدة و بعقلها تخمم مليح
قبل ما يريب عرشها و يدّيه الرّيح هذي نصيحة وحدة مجربة لحياة خوذوا منها العبرة و فيقوا يا لبنات محال الذيب يتبدّل و يولّي خروف يكّلحك و يدّي لك الغالي و عينك تشوف ما تصدقي لكلام المزوّق و المعسول راه يبان الصح و يتكشف و ما يطول ولد لحلال يعرف البيبان و يقصدها و نيتو الزينة عمرو ما يفسّدها وعلاش تبعت خطوات الشيطان و نسيتي شرفك و طريق الرحمــن و اليوم راه ما ينفعك حزن و ندامة ودّعت لحياة الكريمة بالسلامة و أنت يا الغافلة ما تروحي برجليك لجهنمّ و تخلّي بليس ينسّيك و حافظي على عزّك و شرف والديك قبل ما تطيحي في وحل العار و يدّيك و تقولي يا ريتني فهمت النصيحة و ما عشت حياتي حزينة و جريحة |
رد: مذكّرات مراهقة....
أعتذر عن الصراحة
ما أتى في الموضوع قد أسميها خاطرة شعبية لا تتميز بالقافية و الوزن لكنها محاولة طيبة ننتظر جديدكم تحياتي |
رد: مذكّرات مراهقة....
كلمات رائعة وموضوع في القمة وقصة منها ناخذ العبرة
راح زمان النية عندك الحق بارك الله فيك وسدد خطاك ربي يبعد اولاد الحرام على كل البنات قولوا امين |
رد: مذكّرات مراهقة....
تميز واضح في سرد مذكرات هاته المراهقة واتمنى ان لا تكون كل ذكريات المراهقين امثالها اللهم استر شباتنا وشبابنا واحفظهم شكرا لك " دمعة حزين " كذلك الشكر موصول للأخ " أبو عبد الصّمد " الذي أبدع في رده على الموضوع تحياتي وتقديري |
رد: مذكّرات مراهقة....
يعطيك الصحة أختي، والله غير موضوع في محله وموضوع الساعة، نسأل الله العفوة والعافية، وربي يهدينا ويهدي شباب هذه الأمة بإذنه تعالي.
|
رد: مذكّرات مراهقة....
اقتباس:
جميل ما نثره قلمك من حروف سعدت بمرورك أخي نورت صفحتي |
رد: مذكّرات مراهقة....
اقتباس:
العفو...أهلا بك دائما سعدت بمرورك أخي الكريم |
| الساعة الآن 03:29 AM. |
Powered by vBulletin
قوانين المنتدى