.الضَّادِية
. شُوقْ مَنْ كَنَهْوَى لَهْوَاهْ سَاكْنِي رَاضْ **** مَنْ هَوَاهْ سُفُونِي بَحْرْ الهُوَالْ خَاضُوا كِيفْ يَهْنَاوْ اخْلاَقِي وَ الجُوَارَحْ مْرَاضْ **** وَ القْرَايَحْ مَنْ وَكْدْ مْحَبْتُه اغْتَاضُوا هَزْنِي حُبْ حْبِيبْ القَلْبْ بَعْدْ مَا هَاضْ **** بَاحَتْ اسْرَارِي وَ دْمُوعْ العُيُون فَاضُوا *عروبي* سْكَنْ حُبْ لَحْبِيبْ فِي الجُوفْ لِيهْ حَاضْ **** وَ اسْرَى سَرْيْ الرَّحِيقْ فِي دْوَاخَلْ لَعْضَى وَ صْدُودْ البِينْ صَالْهَا فِي حْشَايْ عَاضْ **** مَنُّه سُلْطَانْ مُهْجَتِي اصْدَا وَ امْضَى طُولْ احْيَاتِي انْشَرْفُه حَتَّى يَرْضَا * *مطلع* مَا نَزُولْ فِي عَشْقْ البَدْرْ الوَسِيمْ قَابَضْ **** يَاتُرَى لَحْضِي فِي ازْمَانْ الرِّضَا يَلَّحْضُه مَنْ احْيَانِي بَالشُّوقْ الخَاشَعْ المُوَعَّضْ **** حَرْ عَطْشِي يَطْفِيهْ مَنْ سَلْسَبِيلْ حُوْضُه بَعْدْ انْ حَكْ وَ انْضَمَرْ قَلْبْ كُلْ بَاغَضْ **** نَقطَفْ زَهْرْ الحِكْمَة مَنْ بَدِيعْ رُوضُه جَارْ حُبُّه وَ ادْعَانِي لَلْوَغَى ايْشَلْضَضْ **** يُومْ حَرَّبْ قَيَّسْتْ بِينْ خَاضُوا *بيت* انْضَلْ شَايَقْ وَ انْبَاتْ بْقُرْحَتِي فِي تَيْقَاضْ **** وَكْرِي حَرَّمْتُه وْ بَصْرِي جْفَاهْ اغْمَاضُه هَزْنِي حُبْ حْبِيبْ القَلْبْ بَعْدْ مَا هَاضْ**** بَاحَتْ اسْرَارِي وَ دُمُوعْ العُيُونْ فَاضُوا *عروبي* حُبْ الحْبِيبْ دُونْ رِيبْ عْلِيا فَرْضْ **** وَاجَبْ نَهْوَاهْ نُورْ فَكْرِي وَ الحَاضِي إمَامْ لَمْلاَكْ جَمْلَة وَ اهْلْ الأرْضْ **** مَدْحُه دَرْتُه احْجَابْ لْإمَانِي حَاضِي مَنْ تَرْجَى سَرْخَتُه الخْلاَيَقْ يُومْ العَرْضْ **** حُبُه خَاذْنِي و جَاء عَلَى حُكْمْ غْرَاضْي وِينْ مَا ارْغَبْتْ كَانْصِيبُه فِي اغْرَاضِي * *مطلع* مَا اجْبَرْتْ افْكَاكَة مَنْ هَوَاهْ رَافَدْ الغِيضْ **** وَ انْتَرَكْتْ فِي شَدْ الحِيرَة انْطِيحْ وَ انُّوضْ بِينْ لَرْيَاحْ رَاكَبْ جَفْنِي فِي احْمَالَتْ الفِيضْ **** بَعْدْ مَا سَرْتْ عْلَى كَهْلْ الضّْغَامْ مَنْفُوضْ مْنِينْ شَارْ فَالجُوْ عْلَى طَعْنِي بْسِيفْ كَالمِيضْ **** انْخَجَلْ دِوَانْ ضْمِيرِي وْ رَاحْ مَبْهُوضْ * بيت* وَ اللِّي نَهْوَاهْ شَانُه ارْفِيعْ لِيسْ يُخْفَاضْ **** مَايْلِي حَدْ سْنِيدَة فِي الوَرَى اعْوَاضُه هَزْنِي حُبْ احْبِيبْ القَلْبْ بَعْدْ مَا هَاضْ **** بَاحَتْ اسْرَارِي وَ ادْمُوعْ العُيُونْ فَاضُوا * عروبي* حُبْ احْبِيَّبْ المُونْتَشِي نُورُه مَنْ مَحْضْ **** نُورْ المُولَى عَلَى الوَرَى شَالَا مِيضُه وَ اغْشَانِي بَعْدْ ارْمَانِي بَحْدِيثْ الوَعْضْ **** هَاضْ عَلِيَا وْ طَالْ فِي اهْجَايَا غِيضُه وَ ارْمَى دَمْعِي سَاحْ عَالوَجْنَة فِيضُه * *مطلع* وَ الفِرَاقْ لْتَعْبِي بَمْحَلْتُه امْعَرَّضْ **** حَازْنِي وَ اتْرَكْنِي مَا بِينْ الثَّلجْ وَ اللّضَا وَ ادْهَى دَهْنْ العَاشَقْ لُو اقْوَى ايْمَرَّضْ**** آهْ يَا وِيحِي شُخْتْ وَ لاَ اوْجَدْتْ نَهْضَة مِنْ الهَوَى وَ مْنَ الحُبْ للْجَمْرْ امْعَرَّضْ**** دُخْتْ وَاعْرُوقْ اعْضَايَا سَايْخة فِي بَهْضَة *بيت* وَ الهَبْ ادْلِيلِي مَنْ نَارْ الغَرَامْ شُوَّاضْ **** وَ الأُمُورْ اشْتَدَّتْ وَ احْجُوبْهَا اغْلاَضُوا حَمْلُونِي حَمْلْ انْ لاَ طُقْتْ لِيهْ تَنْوَاضْ **** وَ اللِّي حَمْلُوا حَمْلْ اخْفِيفْ بِيهْ نَاضُوا هَزْنِي حُبْ حْبِيبْ القَلْبْ بَعْدْ مَا نَاضْ **** بَاحَتْ اسْرَارِي وَ ادْمُوعْ العُيُونْ فَاضُوا *عروبي* فِي حُبْ النَّبِي حُكْمْ ابْعَدْ لَمْضُه **** عَلَى الحَقْ الشَّهِيرْ قَسْطَاسُه فَاضِي مَا اوْجَبْ حَدْ ذِكْرُه مَنْ غِيرْ ارْضُه **** إلاَّ مَنْ كَانْ طَاهَرْ الذَّاتْ وَ امْوَضِّي وَ جَمِيعْ مَنْ اجْرَى عَلَى سُتْرَتْ عَرْضُه **** مَنْ ذَالْمَعْنَة ايْقُولْ مَا انْزُولْ حَاضِي يَتْبَعْ نَهْجْ الفَلاَحْ يَقْضِي وْ يَمْضِي * *مَطْلَعْ* كُلْ مَنْ خَافْ الله ادْخَلْ احْمَاهْ وَ ارْضَى **** ايْنَالْ أجْرُه وْ لَحْمَى خَالْقُه فِي رِيضَا مَا انْطَمَسْ عَقْلُو وَ لاَ انْسَا مَا فَاتْ وَ مْضَا **** وَلاَ امْحَانْ مِنَ الفَحْشْ افْعَايْلُو امْرِيضَة غِيرْ مَنْ كَانَتْ ذَاتُه فَاسْدَة امْقَرِضَة **** عَلَى المَعَاصِي مَشْرَارَة طَاغْيَة افْضِيضَة *بِيتْ* يَا اللِّي فِي غُمُوقْ البُهْتَانْ طَاحْ مَا نَاضْ **** تُوبْ لاَ عَلَّا يَصْفَى مَاكْ مَنْ خُوَاضُه هَزْنِي حُبْ احْبِيبْ القَلْبْ بَعْدْ مَا هَاضْ **** بَاحَتْ اسْرَارِي وَادْمُوعْ العُيُونْ فَاضُوا *عروبي* اسْبَلْ امْرَكْ لَلْغَنِي عَلْوِي وَ احْضِيضْ **** تَتْمَتْرَكْ بَالعُفْوْ مِنَ الغِيضْ وَ اعْوَارَضْ وَ اغْبَطْ فِي البُرْهَقَانْ طَوِيلْ اعْرِيضْ **** تَدْرَكْ بِيبَانْ وَاسْعَة دُونْ امْعَارَضْ يَطْلَعْ لَكْ الفَنْ تَتْسَمَّا صَنْدِيدْ **** مَنْ خَلاَّ لَلْغَا غَزْلْ امْعَارَضْ تَخْمَدْ مَنْ النَّارْ حَامْيَة بِيهْ اشْوَاوَّضْ **** *مطلع* رَدْ بَالَكْ لَلْحَفْضْ ابْنِيَّةْ العْرَاضَة **** مَنْ اعْطَاهْ المَعْبُودْ رِضَاهْ عَادْ مُرْضِي جُولْ فِي كَلاَمِي وَ اتْأمَّلْ وْ خُوذْ رَاضَة **** إذَا اتْفَتَّشْ تُوجَدْ فِي تُوَرْخِي ألْفَاضِي كَلاَمْ رَايَقْ فِي اقْوَامْ نِهَايْتْ الرِّيَّاضَة **** لِيسْ كَتْبَتْ مَثْلُو اَقْلاَمْ فِي المَاضِي *بيت* عَلَى البَلاَغَة سَرْ القُولْ العَجِيبْ يُحْفَاضْ**** يَا مَنْ ادَّعَى ابْشِي لاَ يَنْتَهَا الفَاضُه هَاكْذَا جِيبْتْ الضَادْ امْخَوْيَة مَعَ الضَّادْ **** بَاشْ مَنْ افْرَحُه دَامْ وْ قَالْ يَا بِيَّضُه هَزْنِي حُبْ حْبِيبْ القَلْبْ بَعْدْ مَا هَاضْ****بَاحَتْ اسْرَارِي وَ دُمُوعْ العُيُونْ فَاضُه *عروبي* مَا وَدِّيتْ احْقُوقْ لَلْفَرْضْ المَفْرُوضْ **** وَ ابْقِيتْ فِي الفَضَا انْفَصَّلْ وَانْقَاضِي رِيَاحْ الهَوَى وَ الهَزْلْ حَالَكْ مَنْهُوضْ **** لاَ فَضْلْ لاَ رَاسْ مَالْ خَلَّاوَكْ فَاضِي فِيَّقْ جَفْنْ السَّهْوْ تَيَّقَضْ يَا مَبْهُوضْ **** وَ اخْدَمْ رَبِّي وْ كُونْ بالٌقَسْمَة رَاضِي وَ اتْفَكَّرْ شَايئًا كَلْفَكْ بِيهْ القَاضِي * *مطلع* جَلْ مَنْ يَرْفَعْ ابْأمْرُه مَنْ ابْغَا وْ يَخْفَاضْ **** فُوَّضْ أمْرَكْ لَلْحَاكَمْ وْ عَايَنْ القَضَا وَ احْشُومْتَكْ عَلَى المَنْهَاجْ القَوِيمْ تَعْرَاضْ **** طِيعْ لِمُولاَكْ حْسَابَكْ دَاخْلُو اتْقَاضا مَا انْفَعْ فِيكْ فِي ذِكْرْ المُمْنِينْ تُوعَاضْ **** يَا المَاحِي سُورَةْ لُوحُه بْلاَ احْفَاضَة *بيت* أوْجَهْ افْعَالَكْ يَا رْذِيلْ تَعْرَاضْ **** يَا امْتَبَّعْ شَهْوَتْ إبْلِيسْ فِي اغْرَاضُه اللَّبِيبْ العَاقَلْ مَهْمَا يْكُونْ يَلْفَاضْ**** كَا ايْلَذْ وْ يَحْلَى لَلسَّمْعْ قُولْ لَفْضُه هَزْنِي حُبْ حْبِيبْ القَلْبْ بَعْدْ مَا هَاضْ**** بَاحَتْ اسْرَارِي وَ دْمُوعْ العُيُون فَاضُوا *عروبي * انْهَايَتْ القُولْ وَ خْتَامْ اللَّفْضَة **** شْغَلْ عَبْدْ العَزِيزْ مَسْلُوكْ وْ مَعْرُوضْ عَلى الطُّلْبَا وَ كُلْ مَنْ رَبَّا وَ احْضَا **** صَابُه فِي حَدِيثْ مَنْ كَمْلَتْ بِهْ غْرُوضْ المَعْصُومْ الزَّاكِي اخْيَارْ اهْلْ الرِّيضَا**** مَن جَانَا بَالدِينْ سُونَة وْ فُورُوضْ طَهَ المَكِي الشّْرِيفْ احْمَدْ مُولْ الحُوضْ * *مطلع* مَنْ صْرُورْ فَجْرْ المَعْنَة عَلَى ارْيَاضِي **** بِيهْ مَحْتَفَلْ وَ ايْعُودْ النَّجَاحْ نَايَضْ لِأنْ سِيفْ لِسَانِي خَصَّالْ سِيفْ مَاضِي**** فِي مَدِيحْ مَنْ جَانَا بالسُّونَنْ الفْرَايَضْ *بيت* خُوذْ أبْيَاتْ الّْتّْقَاتْ يَا الحَفَّاضْ **** لَلْعَاشَقْ ذَخِيرَة إذَا كَان حَفْضُه وَ السَّفِيهْ فِي قُولُه بَعْدْ مَا ابْسَالْ يَحْمَاضْ **** جَيْحُه وَ اطْلَعْ فُوقْ ابْسَالْتُه حْمَاضُه وَ القُوَافِي مَنْ وَجْدِي امْنَضْمَة بْتَمْخَاضْ****الحَجَلْ وَطْيُورُه مَرْجُوا شَايَنْ فَاضُوا وَ الصَّلاَةْ عَلآ المَدَانِي رُمُوزْ لَلْفَاضْ****وَالرِّضَا لَهْلُه وَ ازْوَاجُه مَعَ احْفَاضُه هَزْنِي حُبْ حْبِيبْ القَلْبْ بَعْدْ مَا هَاضْ ****بَاحَتْ اسْرَارِي وَ دُمُوعْ العُيُونْ فَاضُوا تمت بعُون الله |
الساعة الآن 09:46 PM. |
Powered by vBulletin
قوانين المنتدى