منتديات الشروق أونلاين - يا الفتاح بلا مفتاح

يا الفتاح بلا مفتاح

يَا الحَيْ المُوجُودْ مَن قَبْلْ كُلْ مُوجُودْ ** يَا دَايْمْ البَقَاء اْعْفُو عَلَى اعْبَادَكْ

انْصَرْنَا عَنْ كِيدْ الظّلَامْ يَا المَعْبُودْ ** يَا مُوجِيبْ الدَّاعِي غِيثْنَا بْجُودَكْ

يَا المُوصُوفْ بَالرَّئْفَة وَالكَرَمْ وْ الجُودْ ** يَا المَنَّانْ ادْعِيتَكْ بَمْلاَكْ عَرْشَكْ

اقْبَلْ دُعَايَا وْ وْفِيلِي المَقْصُودْ ** يَا سْرِيعْ المَعْطَى لِمَنْ جَاء لْبَابَكْ

انْتَ القَوِي وَ انْتَ الرّحِيمْ يَا الوَدُودْ ** وَانَا العَبْدْ الظَّعِيفْ رْجَايَا في عَطْفَكْ

يَا الفَتَّاحْ بْلاَ مَفْتَاحْ كُلْ مَسْدُودْ ** لَا تَسَدْ بَابْ رْضَاكْ لِمَنْ سْعَى وَطَلْبَكْ

* بِجَاهْ خَاتَمْ الأرْسَالْ الهَاشْمِي حْبِيبَكْ *

* عروبي *

اطْلَبْتَكْ يَا إلَهْ يَا نِعْمْ الرَّؤُوفْ ** يَا عَالَمْ كُلْ حَالْ الظَّاهَرْ وَالخَافِي

يَا مَنْ هُو بَالجُودْ وَ العَطَاء مَعْرُوفْ ** مَنّْ عَلِينَا بْكُرْمْ فَضْلَكْ الكَافِي

انْقَذْ الأُمّة مِنْ الظُّلْمْ وَ مْنَ الخُوفْ ** وَعَجَّلْ لَلْمُسْتَغِيثْ بَدْوَاكْ الشّافِي

وَ اهْدِينَا لَلصَّلَاحْ وَ النّهْجْ الصّافِي*

*مطلع*

غِيثْ هَذْه الأمَّة بَعْفُوكْ يَا الرّحْمَانْ ** وَ الطَفْ بِينَا عَنْدْ قَظَاكْ حِينْ يَنْزَلْ

لَا تْصَلّطْ عَنَّا قُومْ عَابْدِينْ لَفْتَانْ ** جِيرْنَا مَنَ مْكَايَدْ مَنْ لَا خْشَاكْ جَاهَلْ

مَنّْ عَلِينَا بِرَحْمَةْ اعْفُوكْ يَا المَنَّانْ ** وْ فُكْ وَ حْلَتْنَا يَا فُكّاكْ كُلْ حَاصَلْ

* بيت*

سَرَّحْ اوْثَاقْ اعْبِيدَكْ مَنْ غْلَالْ لَقْيُودْ ** لَلصّْلَاحْ اهْدِينَا نَنْجَاوْ مْنَ المَهَالَكْ

لَا تْذَيّقْهَا يَا وَاسْعْ العطَى الوَدُودْ ** يَا مَنْ وَعَدْتْ تَسَتَجِيبْ لِكُلْ مَنْ يَطَّلْبَكْ

يَا الفَتَّاحْ بْلَا مَفْتَاحْ كُلْ مَسْدُودْ ** لَا تْسَدْ بَابْ رِضَاكْ لِمَنْ سَعَى وْ طَلْبَكْ

* بِجَاهْ خَاتَمْ الارْسَالْ الهَاشْمِي حْبِيبَكْ*

*عروبي*

يَا سَامَعْ مَنْ دَعَاكْ يَا نِعْمْ المُتْعَالْ ** يَا غُوثْ الوَاحْلِينْ فَكَّاكْ الحَاصَل

اهْدِينَا لَلصّلَاحْ مَنْ بَعْدْ الضَّلَالْ ** وَ يَسَّرْ بَعْدْ الذِّيقْ فِي كُلْ مْسَايَلْ

فَرَّجْ عَلَى المَضْيُومْ كِي يَذْيَاقْ الحَالْ ** وْ ارْحَمْ المُومْنِينْ يَوْمْ انْ تَتْقَابَلْ

حَمْلْ ذْنُوبِي ثْقِيلْ طَايَحْ عَلَى الكَاهَلْ *

*مطلع*

لُو مَا رَحَّمْتَكْ وَ عْفُوكْ يَا التُّوَابْ ** مَنْ يَنْجَدْ العَاصِي إذَا ثْقَالْ ذَنْبُو

يَا سْرِيعْ الإجَابَة مَنْ دَعَاكْ مَا خابْ ** انْقَذْ الظَّعِيفْ مَنْ دَارْ فِيكْ حَسبو

لَا تَجْعَلْ بِينْ طَلْبِي وَبِينْ قْبُولَكْ حِجَابْ ** انَا مَالِي غِيرَكْ نُوقَفْ عَنْدْ بَابُو

*بيت*

ثَبَّتْنِي يُومْ انْ نَمْسَى فِي الكُفَانْ مَمْدُودْ ** مَعَ نَاكَرْ وَنَكِيرْ نَرْجَى افْضَالْ عَفْوَكَ

كِيفْ نَلْقَاكْ وَ انَا زَادِي قْلِيلْ مَحْدُودْ ** تُوبْ وَ اعْفُو عَنِّي لِأنِي عْصِيتَكْ

يَا الفَتَّاحْ بْلَا مَفْتَاحْ كُلْ مَسْدُودْ ** لَا تْسَدْ بَابْ رْضَاكْ لِمَنْ سَعَى وْطَلْبَكْ

بِجَاهْ خَاتَمْ الأرْسَالْ الهَاشْمِي حْبِيبَكْ

*عروبي*

تُوبَة يَا خاَلْقِي مَنْ ذَنْبِي نَرْتَاحْ ** خَاطْرِي يَتْهَنّا وَ يَبْرَدْ تَلْحَاحِي

جَاوَزْ عَنْ مَا عْصِيتْ يَا نِعْمْ الفَتَّاحْ ** وَ اهْدِينِي يَا إلَهْ لْنَهْجْ صْلَاحِي

لأَنَكْ غَفورْ جُوَّادْ وْ سَمَّاحْ ** سَمِيعْ لِمَنْ دَعَاكْ نَدْعِيكْ سْمَاحِي

يَا رَبُ الكَائِنَاتْ يَا نِعْمْ المَاحِي

*مطلع*

اهْدِينِي يَا مُولَايَا لَصْلاَحْ لَعْمَالْ ** وَ الطّرِيقْ المُسْتَقِيمَة يَا العَالِي

بِجَاهْ طَهَ وَ اصْحَابُو انْصَارْ وَ الآلْ ** وَ الأزْوَاجْ وَالأحْفَادْ وَبْجَاهْ كُلْ وَالِي

بَجَاهُمْ نَتْوَسّلْ كُلْ مَا طْلَبْتْ يُوقْبَالْ ** ظَمِيرِي يَتْهَنَا وَ يَتْفَاجَا خْبَالِي

*بيت*

بِجَاهْ مَنْ زَارُو بِيتَكْ افْرَادْ وْ وُفُودْ ** وَ وَقْفُو فِي عَرَفَة وْ كَمْلُو المَنَاسَكْ

حُجَاجْ وَ مُعْتَمِيرِينْ جُمُوعْ وَ حْشُودْ ** وْ كُلْ مَنْ هَلّلْ وَ لَبّى وَ لْغَى بْإسْمَكْ

يَا الفَتَّاحْ بْلَا مَفْتَاحْ كُلْ مَسْدُودْ ** لَا تْسَدْ بَابْ رِضَاكْ لِمَنْ سْعَى وْ طَلْبَكْ

* بِجَاهْ خَاتَمْ الارْسَالْ الهَاشْمِي حَبِيبَكْ *

*عروبي*

بِجَاهْ مَنْ حْرَمْ وْ لَبَّى وْ طَافْ بَالْبِيتْ ** رَاجِي مِنَ المُولَى يَمْحِيلُو سِيَاتُو

وَ كُلْ مَنْ تْمَنَّى يَزُورْهَا كِمَا تْمَنِّيتْ ** كِيفْ زَرُوهَا اقْوَامْ مَنْ قَبْلِي فَاتُو

جَاوَزْ عَنْ ذَنْبِي وَ اصْفَحْ كَانْ اخْطِيتْ ** بْحَقْ مَا فِي الكِتَابْ اسْوَارُو وْ ايَاتُو

يا مَنْ لاَ يْضَرَكْ مَنْ اعْصَاكْ وَلَا تَنْفَعَكْ تُبَاتُو **

*مطلع*

يَا مَنْ لَا ظَرَّكْ عَاصِي وْمَا غْنَاكْ مَنْ تَابْ** لُو اجْتَمْعُو عِبَادَكْ جَمْلَى وْ تَابُو

مَا زَادُو فِي مُلْكَكْ مِثْقَالْ جَنَاحْ ذُبَابْ ** وَ لَا يَنْقَصْ مَثْلُو مِثَقَالْ كَانْ ذَنْبُو

لِأنَكْ غَانِي عَنْ مَنْ عَصَى وَ مَنْ تَاب ** لَا تْخَيّبْ رَجَاء مَنْ دَارْ فِيكْ حَسْبُو

*بيت*

أ جِيرْنَا يَا رَبِّي مَنْ هُولْ يَوْمْ مُوعُودْ** يُومْ لَا ضَلًا فِيهْ مَنْ خْلَافْ ضَلّكْ

يُومْ انْ تُوقَفْلُو لَلْعَبْدْ أعْظَاهْ شُوهُودْ** مَنْ يْنَجِّنَا لُومَا تْعُمْنَا بْعَطْفَكْ

يَا الفَتّاحْ بْلَا مَفْتَاحْ كُلْ مَسْدُودْ ** لَا تْسَدْ بَابْ رْضَاكْ لِمَنْ سَعَى وْ طَلْبَكْ

* بِجَاهْ خَاتَمْ الأرْسَالْ الهَاشمِي حْبِيَكْ *

*عروبي*

يَا مَنْ فَضْلَكْ عَمّْ كُلْ المَخْلُقَاتْ ** وَ عْفُوكْ عَنْ مَنْ عَصَى تَمْحِي سِيَّاتُو

بْرَحَّمْتَكْ الوَاسْعَة ارْحَمْتْ العُصَاتْ ** وْ جَوَزْتْ عَلِّلي اخْطَا وْ بانَتْ زَلّا تُو

خَايَفْ افْعَالْ نَفْسِي وَ مَا عَبّاتْ ** اغْفَرْلِي يَا غَفُورْ ازْلَالِي اللِّي فَاتُو

بِجَاهْ الصَّالْحِينْ حَيِّينْ أوْ مَاتُو *

*مطلع *

يَا الله ثَبّتْ لِسَانِي فِي لِيلْتْ قَبْرِي ** وَاشْرَحْلِي صَدْرِي وَ انْعَمْ لِي بْتِيسِيرْ

لِيلْتْ سُؤالْ المَلَكِينْ يَا الوَارِي ** خَفَّفْ مَنْ رَوْعِي يَا ذَالْغَنِي القَدِيرْ

مَا خْفِيتْ وَ دَسِّيتْ انْتَ بِيهْ دَارِي ** تَعْلَمْ احْسَاسِي وَ مَا خْفَا الظَّمِيرْ

*بيت*

جُودْ عَنِّي بَسْمَاحْ يَا ذُو الفَضْلْ وَ الجُودْ ** يَا مَنْ لَا لَكْ ثَانِي فِي شُؤونْ مُلْكَكْ

السَّعِيدْ تَجْعَلْ مْقَامُو رَفِيعْ مَرْفودْ ** تَغْفَرْ سِيَّاتُو وَ تْقَرْبُو لْعَنْدَكْ

ادْعِيتَكْ وَ رْجَايَا القَبُولْ يَا المَعْبُودْ ** تَجْعَلْنِي بْجْوَارْ خِيرْ الوَرَى حْبِيبَكْ

نْجَاوْرْ المُصْطَفَى مُولْ اللّوَى المَعْقُودْ ** وَ مَنْ تْحَبُّو يَا خَالِقِي وَ مَنْ يْحَبّكْ

لَا تَحْشَرْنِي مْعَ مَنْ خَالْفُو العُهُودْ ** بْجَاهْ اهْلْ الله الصَّلِحِينْ مَنْ عْبَادَكْ

وَبْجَاهْ الرَّبْعَة الرَّشِدِينْ ذُوكْ الأسُودْ ** اجْعَلْ بُويَا مَعَ أمِّي قْرَابْ عَنْدَكْ

خُوذْ يَا رَاوِي ثَمْرَة مَنْ ثْمَارْ عَنْقودْ** لْذِيذَة وَ مَحْلَاهَا وَ مَطْيَبْهَا فِي حَلْقَكْ

منْ عَنْدْ سَايَغْ التّبْرْ اسْمُو ايْهَزْ لَجْحُودْ** قُولْ قَالْ الأدِيبْ رِيَّالْ وْ هَزْ رَاسَكْ

لَلْوَغَى مَتْحَزَّمْ دِيمَا السِّيفْ مَجْبُودْ** مْوَّجْدُو لَرْقَابْ الجُحّادْ فِي المَعَارَكْ

عْمَرْهَا مَا تْطِيقْ زَوْبَعَة تْزَعْزَعْ الطُّودْ** لُوْ عَصْفُو لَرْيَاحْ السَّبْعْ مَا تْحَرَّكْ

يَا الفَتّاحْ بْلَا مَفْتَاحْ كُلْ مَسْدُودْ** لَا تْسَدْ بَابْ رْضَاكْ لِمَنْ سَعَى وْ طَلْبَكْ

بجَاهْ خَاتَمْ الأرْسَالْ الهَاشْمِي حْبِيبَكْ

تمت بعون الله و فضله

تاليف محمد ريال ......... مسجلة لدى الدوان الوطني لحقوق المؤلف

والحقوق المجاورة...تحت رقم 124/2014