يَا مالكي اعفو
يَا مالْكِي اعْفُو يَا غُوثْ مَنْ يَتْوَسَّلْ **---** بَرْضَاكْ جُودْ وَ ارْحَمْنَا يَا مُتْعَالْ
مَنْ جُورْ ذَالزَّمَانْ نَجِّينَا يَا عَادَلْ **---** وَ الطُفْ فِي قَضَاكْ يَا نِعْمَ الجَلاَلْ لاَ تْوَلِّي علِينَا الظَّالَمْ وَ الجَاهَلْ **---** وَ مَنْ لاَ خْشَاكْ وَ لاَ حْشَمْ بْمُوحَالْ يَا سَامَعْ الدُّعَاء يَا فَكَّاكْ الواحَلْ **---** فُكْ القُيُودْ حَرَّرْنَا مَنْ الاغْلاَلْ دَنْيَا اتْخَلْطَتْ الحَابَلْ بَالنَّابَلْ **---** مَا اتْفَرَّقْ الحْرَامِي مَنْ وَلْدْ حْلاَلْ اتْعَمَّرْ المِدَانْ عُكَلَى وَ حْثَايَلْ **---** لاَ نِيفْ لاَ حْيَاء لاَ نَخْوَةْ رِجَالْ افْعَالْهُمْ مُحَالْ يَقْبَلْهَا عَاقَلْ **---** حَيَاتْهُمْ فُوْضَة وَ جْيَاحَة وَ اهْبَالْ وُحُوشْ هَامْلاَ فِي بَعْضَهَا تَتَّاكَلْ **---** العنْفْ وَ الخْصَامْ وَ اللالْفاضْ جْدَالْ لاَ عِلْمْ لاَ فْهَامَة بَالبُهْتْ يْجَادَلْ **---** وُ تَلْقَاهْ يَفْتِي فِي كُلْ امْجَالْ و ايْأيَّدْ الضُّالَمْ اعْدِيمِ الأصَلْ **---** كُلْ شئ بَالوُجُوهْ وَ المْعَارَفْ وَ المَالْ ايْكَذْبُو الصِّادَقْ وُ يَامْنُو بَالبَاطَلْ **---** هَمْهُمْ وْ اشْغَالْهُمْ القِيلْ وَ القَالْ لاَ عَاهَدْ لاَ اوْفَاء مَا انْعَرْفُو بَخْصَايَلْ **---** يُوعَدْ وَ يْدُورْ كِيمَا يْدُورْ الحَالْ احْذَرْ يَا اوْخِي مَنْ ذَالقُومْ السَّافَلْ **---** بَلغَدْرْ يَسْتَلَذُّوا دَايْرِينُوا فَالْ سَمْحُو فِي الدِينْ اجْفَاوَهْ بَالكَامَلْ **---** تَبْعُو الفُسْقْ وَ المْعَاصِي وَ الضَّلاَلْ لاَ إمَامْ يَنْصَحْ لاَ قَاضِي عَادَلْ **---** لاَ مَنْ يَقُولْ هَذا عِيبْ وْ مُوحَالْ يَدَّعُو الإمَانْ وْ دَايْرِينْ ازْبَايَلْ **---** نَاسْيِينْ الحِسَابْ وُ يُومْ السُّؤال وَاجْبِي اليُومْ نَبْكِي عَلَى الدَّهْرَ اتْبَدَّلْ **---** أهْل الفْجُورْ وَ الفُسْقْ وَلاَّوْ ابْطَالْ وُ لَبْطَالْ الفْحُولَا اقْدَرْهُمْ في النَّازَلْ **---** لاَ مَنْ عَبَّرْهُمْ وَ لاَ مَنْ سَالْ سَابْ المِدَانْ وَ اصْبَحْ مَرْتَعْ زْوَايَلْ **---** وُ شِينِينْ اطْبَايَعْ شَلَّة الارْذَال النَّذْلْ مَنْ احْمَاقُه شَافْ نَفْسُه راجَلْ **---** فِي أخْرِ الزَّمَانْ كِي فَسْدَتْ لَحْوَالْ اسْلِيسْلَة وَ مَنْقُوشَة وْ زَادْ خْلاَخَلْ **---** الشّْعَرْ شَعْرْ قَرْدْ وَ امْهَبَّطْ السَّرْوَالْ وَ يْجِي بْلاَ حْيَاء عَلَى اسْيَادُه يَطَّاوَلْ **---** عَدِيمْ الاخْلاَقْ يَسْوَى مَلْخَةْ نْعَالْ وْ يَغْتَبْ فِي الخَلاَيَقْ جَاهَلْ بَنْ جَاهَلْ **---** عُرَّةْ العِبَادْ ايْقَطَّعْ فِي الافْضَالْ كَثِيرْ العُيُوبْ لاَهِي بِينَا مُنْشَاغَلْ **---** وُ هُوَ مْنَ العْيُوبْ حَامَلْ ثُقْلْ جْبَال نَاسِي فْضَايْحُه ابْوَجْهْ صْحِيحْ ايْقَابَلْ **---** كِي اعْطَاهْ الدَّالَة الدَّهْرْ البَدَّالْ السّْفِيهْ بَانَتْلُو اشْطَارَة يَتْحَايَلْ **---** وَ امْشَا مْعَ ابْليسْ زَيَّنْلُو الافْعَالْ وَ إذَا كُنْتْ تَاقِي ايْقُولُوكْ فَاشَلْ **---** وْ ايْدِيرُوا الشَّانْ لَلْفَاسَقْ المُحْتَالْ وَ اللِّي اسْتْحَى عَلَى عَرْضُه قَالُوا غَافَلْ **---** مَا فَادْ مَا اسْتَفَادْ فِي الدَّنْيَا مَا نَالْ قُولُوا للزُّغْبِي اللِّي بْغَى يَتْرَجَّلْ **---** فْرَاعَلْ الظْبَعْ مَا تَشْبَهْ لَشْبَالْ اتْرُكْ العْنَادْ رَاكْ تَتْعَبْ فِي بَاطَلْ **---** الرُّجْلَة اخْصَايَلْ مَاهِيشْ اقْوَالْ مَاهِيشْ غِيرْ أجِي وُ قُولْ انَا رَاجَلْ **---** الرُّاجَلْ لاَزَمْ يَشَّهْدُولُو الرّْجَالْ الرَّاجَلْ لاَزْمُه ايْكُونْ صَافِي مَنْ دَاخَلْ **---** وَ أخْلاَقْ عَالِيَة وُ عِفَّة وَ اعْتِدَالْ مَنْ لاَ جَالَسْ رْجَالْ مَا نَالْ افْضَايَلْ **---** غُرِّي غْشِيمْ غَافَلْ بَاقِي مَازَالْ مَنْ لاَ شُيُوخْ قَرَّاوَهْ يَبْقَا جَاهَلْ **---** وِالُو ايْكُونْ يَمْدَحْ قُولُو يَبْسَالْ مَا لُو عِلْمْ لاَ فَهْمْ لاَ بَاهْ ايْقَابَلْ **---** لاَ دَرْعْ يَقِيهْ مَنْ طَعْنَاتْ الانْبَالْ وَ ادْخَلْ بَحْرْ هَايَجْ يَحْسْبُه سَاهَلْ **---** غُرِّي غَشِيمْ يَغْرَقْ غِيرْ فِي فَنْجَالْ ارْجَعْ رَاكْ تَنْدَمْ انْتَبَهْ يَا غَافَلْ **---** بَالْكْلْخْ مَا تْبَارَزْ حَامَلْ انْصَالْ رَاكْ تَعْدَمْ وَ تَصِيرْ بَاجْرَاحَكْ عَاطَلْ **---** إذَا اطَمَعْتْ تَنَّجَا طَلْبْتْ المُوحَالْ الشِّي صْعِيبْ وَ انْتَ ظْعِيفْ مَا تَتْحَمَّلْ **---** هَذَا البَحْر غَرَّقْ عِيطَا جُهَّالْ مَا لَكْشِ بِيهْ دِرَايَة الوَايَنْ دَاخَلْ **---** رَاهِي اتْصَادْفَكْ امْصَاعَبْ وَ اهْوَالْ وَ انْتَ بْغِيرْ زَادْ لاَ سْلاَحْ بِيهْ اتْقَاتَلْ **---** لاَ عِلَمْ لاَ دِرَايَة بْفَنْ القِتَالْ ارْجَعْ رَاهْ يَجَّرْفَكْ مَاهْ السَّايَلْ **---** الشَّبْكَة مَا تْسَدْ النَّهْرْ إذَا سَالْ احْشَمْ تُوبْ لله مَنْ ذَنْبَكْ وَ اخْجَلْ **---** وَ اطْلُبْ العَفُو مْنَ الرَّحِيمْ المُتْعَالْ خَلِّي عْبَادْ رَبِّي ابْعِيبْهَا تَتْكَفَّلْ **---** كُلْهَا يْشُوفْ فَعْلُو يُومْ السُّؤَالْ انْهِيتْ ذَالكَلاَمْ وَ ابْعْثْتُه رَسَايَلْ **---** وَ رْمُوزْ فِي حَشَاْهْ وَ مْعَانِي لَقْوَالْ تَحْفَة انْحَتْهَا مَا لِيهَاشْ امْثَايَلْ **---** تَشْفِي غَلِيلْ مَنْ هُو مَثْلِي مَعْلاَلْ الصَّلاَةْ وَ السَّلاَمْ عَلَى الهَادِي المُزَمَّلْ **----** سِيدْ العِبَادْ جَمْلَة خَاتَمْ لَرْسَالْ بَالمَسْكْ وَ العَنْبَرْ سْلاَمِي وَاصَلْ **---** للْفَاهْمِينْ سَرْ المَعْنَة لَفْضَالْ وَ اللِّي جْحِيدْ فِي قُبْحْ افْعَالُو حَاصَلْ **---** مَا تَابْ مَا نْتَهَى عَنْ فَعْلَ المُحَالْ اعْمَاهْ غُلْ حُقْدُه عْلَى العِيبْ امْعُوَّلْ **---** مَا فَادْتُه نْصِيحَة مَا سْمَعْ عُقَّالْ جُرُّه ابْلِيسْ لَهْوَاهْ وَ ادَّاهْ امْسَلْسَلْ **---** زَيَّنْلُو المَعَاصِي وْ قُبْحْ الأعْمَالْ لَلْعَارْفِينْ نَشْهَرْ أسْمِي بَالكَامَلْ **---** مُحَمَّدْ مَا اخْفَى وْ أسْمْ الجَدْ ريَالْ نَطْلُبْ خَالْقِي يَمْحِي كُلْ ازْلاَيَلْ **---** وَ يْجَاوَزْ عَنْ خْطَانَا نِعْمَ الجَلاَلْ وَ يْحَسَّنْ الخَاتِمَة كِي يُوفَى الأجَلْ **---** وَ الثَّبَاتْ لَلْإجَابَة عَنْدْ السُّؤألْ تمت بعون الله نظم محمد ريال |
الساعة الآن 10:35 AM. |
Powered by vBulletin
قوانين المنتدى