حِسْبِيَ الله
حِسْبِيَ الله يَا خالَقْ الاكْوَانْ يَا الهَادِي اهْدِينَا *** اسْتَرْنَا وَ أقِينَا شَرْ البْلاَء وْ لَفْتَانْ نَزَّلْ رَحَّمْتَكْ يَا خَالْقي عَلِينَا *** ثبَّتْنَا وَ انْصَرْنَا عَنْ كِيدْ كُلْ فَتَّانْ * اعفُو وَ اغْفَر يَا المُولَى إذَا خْطِينَا *** ادَّاتْنَا ااالهَاوِيَة وَ حْلَى لَنَا العُصْيَانْ غِيثْنَا يَا غُوثْ المَغْبُونْ مِنَ الغْبِينَة *** مَنّْ عَلِينَا بْعَطْفَكْ وَ ارْضَاكْ يَا المَنَّانْ يَا البَاصِيرْ بْعِينْ اللُّطْفْ شُوفْ لِينَا *** قُوِّينَا عَنْ مَنْ وَقْفُوا لْنَا خْصُومْ عَدْيَانْ * لاَ اتْؤاخَذْنَا بَذْنُوبْنَا إذَا اسْهِينَا *** لِأنَكْ غَافُورْ رَحِيمْ احْلِيمْ رَحْمَانْ* هَذا الزَّمَانْ التَّالِي مَنْ امْصَايْبُه اعْيِينَا *** قَلِيلْ فِي ذَالوَقْتْ اللِّي اتْدِيرْ فِيهْ الأمَانْ * لَا اوْفَاء لاَ صَدْقْ لاَ نِيَّة ابْقَاتْ فِينَا *** البَلاَء ايْصُبْ هَطِيلْ كِمَا تْصُبْ لَمْزَانْ قُلْ حِسْبِيَ الله عَنْ كُلْ مَنْ ظْلَمْنَا *** وَ نِعْمَ الوَكِيلْ مَنْ لاَ تَرَاهْ لَعْيانْ مَنْ تَوَكَّلْ عَالله مَا خَابْ يَا الغَفْلاَنْ *عروبي* اتْوَكَّلْ عَالله وَ اسأَلْ لِيسْ اتْخِيبْ *** وَعْدٌ مِنَ الله يُوجِيبْ الدَّاعِي الحَيْ الجَلِيل مْنَ المَظْلُومْ قْرِيبْ *** رَاؤُوفٌ بَالعِبَادْ مَا ايْخَيَّبْ سَاعِي مَا يَبْخُلْ رَاجِي سَمِيعْ وْ مُوجِيبْ *** مَنْ تَوَكَّلْ عَالله نَالْ فَضْلْ وَ ارْفَاعِي اهْجَرْ قُومْ النِّفَاقْ وُ مَيَّزْ يَا وَاعِي *مَطْلَعْ * اجْتَانَبْ قُومْ الفِتْنَة وَ النِّفَاقْ وَ الجُورْ*** دَايْرينْ النَّمِيمَة وَ الغَتَبْ حِرْفَة يَحْلَفْ لِيمِينْ وُ يَشْهَدْ اشْهَدتْ الزُّورْ*** مَا ايْخَافْ مِنَ الله مَا يَستَحِي بْكَشْفَة لاَ اوْفَاء لاَ عَاهَدْ و إذَا وَاعَدْ ايْدُور*** رَدْ بَالَكْ مَنُّو عَنْدُه امْيَاتْ صِيفَة * بيت * يَنْقَلَبْ كِي الافْصَالْ وَ اتْلَذْ لُو الخِيَانَة *** يَعْمَلْ اعْمَايَلْ مَا اعْمَلهُمْشْ شِيطَانْ ايْبَيَّنْ اسْنانُه وْ يَتْبَسَّمْ فِي اوْجَهْنَا *** وْ فِي اقْفَانَا انْوَلُّوا عَنْدُه حْنَا العَدْيانْ قُلْ حِسْبِيَ االله عَنْ كُلْ مَنْ ظْلَمْنَا *** وَ نِعْمْ الوَكِيلْ مَنْ تَرَاهْ لَعْيَانْ مَنْ تَوَكَّلْ عَالله مَا خَابْ يَا الغَفْلاَنْ *عَرُبِي* اتْرَكْ قُومْ الغَدَرْ و النَّصْبْ وَ التّْلْفِيقْ *** كْلاَمهُمْ كُلُّه كَذُوبْ احْذَرْ يَا غَافَلْ مَا فِيهُمْ مَنْ تْقُولْ يَصْلَحْ لِيكْ اصْدِيقْ *** مَا عَنْدْهُمْ نَخْوَة مَا فِيهُمْ رَاجلْ يَغَدْرَكْ وَ ايْخُونْ فِي سَاعَةْ الذِيقْ *** يَهْرُبْ وَ يْخَلِّيكْ في غَرْقَة حَاصَلْ يَنْسَا افْضَالَكْ عْلِيهْ جَاهَلْ بَنْ جَاهَلْ *مَطْلَعْ* يَنْسَاكْ مَنْ بَالُه عَنْدُه الأمْرْ عَادِي *** مَهْمَا سَلَّكْتُه مِنَ الذِّيقْ الشّْدَايَدْ إذا ايْكُونْ فِي ورْطَة تَلْقَاهْ جَايْ غَادِي*** ابْلاَ حَيَاء يَتْذَمَّمْ لَكْ كِيمَا امْعُوَّدْ امْوَلَفْ بَالكَشْفَة مَا دَارْشْ غِيرْ هَاذِي*** أنْشَهَرْ بْمَكْرُه يَدْرِيهْ كُلْ وَاحَدْ *بِيتْ* كُلْ مَرَّة ايْعَاوَدْ افْعَايْلُه الشِّينَة *** وَيَحْسَبْهَا اشْطَارَة وَ الغِيرْ رَاه غَفْلاَنْ لُو مَا خُوفْ الله وَ الحَيَاء امْكَتَّفْنَا *** ذَالطّْبُوعْ يَنْحَجْبُوا فِي الدّْيُورْ كِي النَّسْوَانْ قُلْ حِسْبِيَ الله عَنْ كُلْ مَنْ ظَلَمْنَا *** وَ نِعْمْ الوَكِيلْ مَنْ لاَ تَرَاهْ لَعْيَانْ مَن تَوَكَّلْ عَالله مَا خَابْ يَا الغَفْلاَنْ *عروبي* الخُوفْ مِنَ الله وَ الحَيَاء ايْكَتَّفْ الرّْجَالْ *** وَ مَنْ لاَ ايْخَافْ مَا يسْتَحِي اعَّرْفُو هامَللْ مَا يَحْشَمْ بَالعِيبْ مَا اخْجَلْ بَالمُوحَالْ *** أحْذَرْ مَنْ مَكْرُه وْ خُبْثُه يَا عَاقَلْ فِي الغَتْبَة تَلْقَاهْ نَاشَطْ وْ عَمَّالْ *** وَ ايْقُولْ كْلاَمْ زُورْ وَ بَالبُهْتْ ايَقَابَل هَذَاكْ مَا فِيهْ خِيرْ مَا عَنْدُه أصَلْ *مطلع* لاَ أصَلْ عَنْدُه لاَ نِيفْ لاَ اشْهَامَة *** لاَ اخْلاَقْ لاَ أدَبْ مَثْلْ البْهِيمْ زَادَمْ لاَزْمُه يَتْلَجَّمْ بَالجَامْ وَ الصّْرِيمَة *** مَعْدُومْ الفَهْمْ اتْرَبَّى مْعَ البْهَايَمْ مُحَالْ فَرْخْ البَازْ يَشْبَهْ فَرْخْ بُومَة ***وْ لاَ يَشْبَهْ جَرْوْ الظَّبْعْ لأشْبَالْ الذّْرَاغَمْ (بيت) جِيرْنَا مَنْ افْعَالْ بُو وَجْهِينْ كَانْ جَانَا *** ؤُ رَايْدْ ايْنَكَدْ عْلينَا ايْرُوحْ نَكْدَانْ هَذَا الطّْبُوعْ مَا لاَزَمْشْ ايْجَمْعُوا امْعَانَا ***عِيبْ يَحَّظْرُوا وِينْ ايْجَّمْعُوا الفُرْسَانْ قُلْ حِسبِيَ الله عَنْ كُلْ مَنْ اظْلَمْنَا *** وَ نِعْمَ الوَكِيلْ مَنْ لاَ تَرَاهْ لَعْيَانْ ** مَنْ تَوَكَّلْ عَالله مَا خَابْ يَا الغَفْلاَنْ *عروبي* كَايَنْ اللِّي ايْجِيكْ يَتْذمَمْ وَ اذْليلْ *** امْخَبِّي مَكْرُه ؤُ قُبْحْ احْتِيَّالُو يَتْكَلَّمْ بَالدِينْ اتْقُولْ عَالَمْ جَلِيلْ *** ؤُ هُوَ شِيطَانْ كِي اتْشُوفْ افْعَالُو رَافَدْ اعْيُوبْ مَا تَنْعَدْ حَمْلْ اثْقِيلْ *** وَ النِّفَاقْ وَ الغْدَرْ دَارْهُمْ رَاسْ مَالُو شُوفْ لْذَاكْ الزّْمَانْ رَانَا الحَقْنَا لُو *مطلع* شُوفْ يَا خُويَا الهَاذْ الوَقْتْ كِي اتَّقْلَبْ *** هُوَّلْ اعْقُولْ النَّاسْ مَنْ بَمْصَايْبُه وَ تَعْبُه كُلْ شِئ رَادِي مَا ابْقَى فِيهْ وَاشْ يَعْجَبْ *** مَنْ ثْقْلْ اهْمُومُه اذْرَارِي اصْغَارْ شَابُوا الأسُودْ انْذَلُّوا وَ اتْرَجْلُوا الأرَانَبْ *** وَاشْ نَحْكِيلَكْ يَا خُويَا القُلُوبْ طَابُوا *بيت* كُلْ عُكْلِي حَابْ يَتْرَجَّلْ كِي احْشَمْنَا *** حَسْبُونَا خُفْنَا وَ اتْطَاوْلُوا الرَّعْيَانْ ابْكُلْ انْعُوتْ وَ اوْصَافْ اقْبَاحْ وَصْفُونَا *** وَ ايْقُولُو عْلِينَا فِي كْلامْ جُورْ بُهْتَانْ قُلْ حؤسْبِيَ الله عَنْ كُلْ مَنْ اضْلمْنَا *** وَ نِعْمَ الوَكِيلْ مَنْ لاَ تَرَاهْ لَعْيَانْ **مَنْ مَنْ تَوَكَّلْ عالله مَا خَابْ يَا الغَفْلاَنْ *عروبي* كَايَنْ اللِّي اتْقُولْ عَالَم مَنْ الافْضَالْ **** يَتْكَلَّمْ بَاكْلاَمْ افْصِيحْ وْ مَعْسُولْ يَعْرَفْ فَنْ النَّصْبْ وَ المَكْرْ وْ الاحْتِيَّالْ **** يَغَدْرَكْ بَمْهَارْتُه تَبْقَى مَذْهُولْ هَذَاكْ دِينُه وُ عاقِيدْتُه يَجْمَعْ المَالْ **** مَا يَعْرَفْ فِي احْيَاتُه مَعْنَ الأُصُولْ كُونَكْ لَبِيبْ افْطِينْ يَا سَامَعْ ذَالقُولْ *مطلع* كُونَكْ لَبِيبْ ؤُ ذَاكِي لاَ اتْطِيحْ فِي اشْبَاكْ *** اهْلْ الغَدَرْ نَصْبُوهَا فِي الدّْرُوبْ وَالمْسَالَكْ اللِّي تَامَنْ فِيهْ اتْصِيبُه لاَئِيمْ أفَّاكْ *** فِي وَجْهَكْ احْبِيبْ و فِي القْفَا ايْبِيعَكْ فِي الرَّخَاء يَصَّحْبَكْ و فِي الذِّيقْ يَنْسَاكْ *** يَهْرُبْ ايْخَلِّيكْ وُ يَنْسَى افْضَالَكْ *بيت* انْتَ بَالنِيَة وُ هُوَ بَالمَكْرْ وَ الخِيَّانَة *** رَدْ بَالَكْ مَنُّه وَ احْذَرْ رَاهْ ثَعْبَانْ إذَا لَذْغَكْ لُذْغَة وَ انْجِيتْ مِنَ الفَنَاء *** مَنْ سَمْ انَيَابُه يَبْقَى الجَرْحْ تَبْيَانْ قُلْ حِسْبِي الله عَنْ كُلْ مَنْ اظْلَمْنَا *** وَ نِعْمَ الوَكِيلْ مَنَ اتْرَاهْ لَعْيَانْ مَنْ تَوَكَّلْ عَالله مَا خَابْ يَا الغَفْلاَنْ *عروبي* كَايَنْ اللِّي ايْجِي فِي صِيفَةْ خُوكْ احْمِيمْ *** يَتْغَبَّنْ عَنْ حَالْتَكْ وْ يَتْألَّمْ وُ هُوَ احْقُودْ اتْقُولْ شَادْلَكْ ثَارْ اقْدِيمْ *** إذَا ظَنِّيتْ الخِيرْ فِيهْ انْتَ وَاهَمْ اتْصِيبُه يَبْحَثْ عَالبْلاَء ايْحَبْ التَّحْطِيمْ *** رَاحَةْ بَالُو كِي ايْفَرَّقْ وَ ايْحَطَّمْ أحْذَرْ مَكْرُه السّْفِيهْ عَمْرُه مَا يَحْشَمْ *مطلع* احْذَرْ غَدْرُه الوَاطِي السّْفِيهْ خَدَّاعْ *** كِي ابْلِيسْ وِينْ يَحْظَرْ ايْفَرَّقْ الجْمَاعَة لَعْنُه مُلانَا وْ مَسْخُه شِينِ لَطْبَاعْ *** مَا التَهَى بَاهْمُومُه وَ لاَ التْهَى ابْطَاعَة مَا تَسْمَعْ مَنْ عَنْدُه قُولْ ايْصَرْ لَسْمَاعْ *** مَا تَابْ مَنْ ذَنْبُه رَاهِي الحَيَاةْ سَاعَة *بيت* مَا اسْكَتْ وَ اتْرَكْنَا فِي حَالْنَا اخْطَانَا *** مَا خَافْ ايْجِي يُومْ وَ ايْصِيرْ فِيهْ نَدْمَانْ الدّنْيَا اقْصِيرَة وْ أخْرَتْهَا الفَانَاء *** وَ الحْسَابْ يَرْجَانَا وَ المَقَصْ وَ المِيزَانْ قُلْ حِسْبِيَ الله عَنْ كُلْ مَنْ ظَلَمْنَا *** وَ نِعْمْ الوَكِيلْ مَنْ لاَ تَرَاهْ لَعْيَانْ مَنْ تَوَكلْ عَالله مَا خَابْ يَار الغَفْلانْ *عروبي* أحْفَضْنَا يَا إلَهِ مَنْ هُولْ الزَمَان *** عَنْ كِيدْ الحَاقْدِينْ انْصَرْنَا يَا غَانِي يَا عَالَمْ مَا اجْهَرْتْ بِيهْ وَ مَا فِي لَكْنَانْ *** يَا مَنْ لاَ اخْفَاكْ حَالْ فَكْ قَيْدْ العَانِي ارْفَقْ ابْحَالْتْ الظَّعِيفْ الوَقْتْ اشْيَانْ *** مُولْ النَّخْوَة اليُومْ اصْبَحْ بَرَانِي وْ خَرْجُو المَتْخَنْثِينْ لَلْبْلاَء عِينَانِي *مطلع* اخْرَجْ غِيرْ اللِّي ايْجِيكْ الغَثْيَانْ إذَا اتْكَلَّمْ *** العْفَانَة وَ الاقْذَارْ اتْشَمْهَا مَنْ فَمُّه مَا عَنْدُه أصَلْ لاَ عَرْضْ عْلِيهْ يَحْشَمْ *** امْخَبِي مُورْ اسْيَادُه يَسْتَحِي بْأسْمُه لَقِيطْ احْرَامِي وْ مَا عَنْدُوشْ أسَمْ *** لَعْنَاتْ الله عْلِيهْ الدَّانِي اوْلِيدْ أُمُّه *بيت* إذَا اسْألْتْ عْلِيهْ يْقُولُو لَكْ بَنْ فْلاَنَة *** حَامَلْ أسَمْهَا وْ عَاجْبُه الحَالْ فَرْحَانْ الله يَبْعَدْهُمْ قَدْ بُعَدْ السَّمَاء عْلِينَا *** مَا يَشَرَّفْنِيشْ ايْكُونُوا لِي اقْرَابْ جِرَانْ اعْيُبْهُمْ نَاسْيِينْهُمْ وَ التَّلْهَاوْ بِينَا *** الدَّنِي يَغْتَبْ وْ هُوَ بَالعُيُوبْ مَلْيَان وِينْ كَانْ مَعْيُوبْ احْلاَلُو الكْلاَمْ فِينَا *** البُغْضْ وَ الحَسَدْ هَذُو سِيمَةْ كُلْ فَشْلاَن انْهِيتْ قُولِي وُ صَلَّى الله عْلَى نَبِينَا *** الشّْرِيفْ المَكِي طَهَ اسْرَاجْ الاعْيَانْ و اسْلاَمْنَا الاشْيَاخْ مَنْ دَرْكُوا المَعْنَة *** وَ المَاهْرِينْ الشُّعَارَة ارْبَابْ الاوْزَانْ سُوَّلْهُم عْلِينَا ايْدَلُوكْ عَارْفِينْنَا *** إذَا اذْكُرْتْ اسْمْ رِيَّالْ يَفَّشْلُوا العَدْيَانْ بَالنّْصَرْ وَ النَّجَاحْ مُولاَنَا اكْرَمْنَا *** وَ العْدَاء الله لاَ ايْرِيلْهُمْ يُومْ سَلْوَانْ تمت بعون الله ..محمد رِيَّالْ |
رد: حِسْبِيَ الله
مشاء الله شيخنا كل شاعر يؤرخ لجيله الله أبارك و يحفظك أن شاء الله
|
رد: حِسْبِيَ الله
اقتباس:
تقبل مني تحياتي الخالصة |
الساعة الآن 10:34 PM. |
Powered by vBulletin
قوانين المنتدى