بَسْمِ الله عَالْمْ الخَفِية
بَسْمِ الله عَالْمْ الخَفِية قَصِيدْ فِي المَدْحْ ل... الِّشِّيخْ. مُحَمّدْ بَنْ مْسَايَبْ ظَيْفًا جَانِي اوْقَفْ عْلِيَّ **** حَيِّيتُه بَالسَّلاَمْ وَ جْلَسْ قَبَّلْتْ ايْدُه وْ قُلْتْلُه أيَّا **** جُوزْ العَنْدِي بَنْعَالَكْ اعْفَسْ بَسْمِ الله عَالْمْ الخَفِية **** وَاسْمْ احْمَدْ خَاطْرِي امْوَنسْ ******** قَبَّلْتْ ايْدُه وَ دَرْتْ خِّدِي **** تَحْتْ اقْدَامُه عْفَى وسَامَحْ قُلْتْ اليُومْ اسْتَقَامْ سَعْدِي **** رُوَّحْ لِمَنْ هَوِيتْ رَايَحْ جَانِي زَايَرْ وَ بَاتْ عَنْدِي **** وَ اسْقِيتُه سَابْغْ اللُّوَامَحْ مَنْ حُسْ بْهَاهْ نَلْتْ قًصْدِي **** بَاتْ امْسَلِّي وَ بَتْ فَارَحْ ارْفَدْ عِينُه وْ شَافْ لِيَا **** بِيهْ انْمَرْحَبْ وقَطَعْ الحَسْ اتْقَدَّمْ قالْ لِي شْوِيَا **** العَبْ وَ اضْحَكْ وْزِيدْ نَفَّسْ بَسمْ الله عَالْمْ الخَفِيَة **** وَاسْم احْمَدْ خَاطْرِي مْوَنَّسْ ******** قابَلْنِي مَنْ هَوِيتْ وَقْعَدْ **** يَنْظَرْ لِيَ وْ نَنْظَرْ لُو مَرَّة مَرَّة مْنِينْ يَرْفَدْ **** فِيَّا عِينُه نَنْتَبَهْلُو تَبَسَّمْ لِي مْنِينْ عَاهَدْ **** يَدُّه لِيَدِّي و نَلْتْ شُغْلُو نَلْتْ المَطْلُوبْ لله الحَمْدْ**** عَلِيَا اليُومْ بَانْ فَضْلُو احْمَدْ سِيدِي رْضَا عْلِيَا **** أعْطَفْ لِي مَنْ هَوِيتْ وَغْرَسْ فِي القَلْبْ مْحَبْتُه قَوِيَا **** وَضْحَى رَوْضِي اخْضَرْ مْنَعَسْ بِسْمِ الله عَالْمْ الخَفِيَّة **** وَاسْمْ احْمَدْ حَاطْرِي امْوَنَّسْ اصْبَحْ رُوضِي اخْضَرْ مْنَعْنَع **** مَتْزَخَفْ زَهِيَة اغْصَانُه بَنْوَاوَرْ كُلْ نُورْ يَصْطَعْ **** بِينْ اشْجَرْ والوَرَاقْ بَانُوا اسْغَى لِي يَا لَبِيبْ وَ اسْمَعْ **** وَ افْهَمْ قُولِي عْلَى تْقَانُه وَ احْكِيهْ لِكُلْ مَنْ تْوَلَّعْ **** يَتْسَلَّى بِيهْ فِي زْمَانُه أذْكُرْ رَزَّاقْ كُلْ حِيَّا **** مُجَبَّرْ عَظْمْ مَنْ تَهَرَّسْ بَسْمُه وَ اسْمْ الرَّسُولْ تَحْيَا **** الارْوَحْ وَقَلْبْ كُلْ كِييَّسْ بِسْمِ الله عَالْمْ الخَافِية **** وَاسْمْ احْمَدْ خَاطْرِي امْوَنَّسْ ******** بَاتْ مْلِيحْ المِلاَحْ عَنْدِي **** زَاهِي لاَعْبْ ضَحِيكْ فَارَحْ هُوَ وَ انَا وَ كَاسْ خُلْدِي **** مَكْتُوبْ عْلِيهْ عَبْدْ صَالَحْ مْلاَهُ لِي وْ جَاء فِي يَدِّي **** كِالثَّلْجْ ابْيَضْ بْيَاضْ نَاصَحْ حِينْ شْرَبْتُه سْرَى فِي جَسْدِي **** ذَهَبْ عَقْلِي وَ جِيتْ طَايَحْ اخْذَا بِيدِي و قَالْ لِيَ **** اتَّاكَلْ يَا فلآَنْ وَ اجَلَسْ تَغْنَمْ مَا فَاتْ لِيكْ فِيَا **** مَا دَامْ الصُّبْحْ مَا تَنَفَّسْ بِسْمِ الله عَالْمْ الخَفِيَّة **** وَاسْ احْمَدْ خَطْرِي مْوَنَّسْ ******** ضَيْفًا جَاء زَارْنِي وَ زُرْتُه **** فِيهْ البَارَحْ اشْفَاتْ عِينِي افْرَحْ قَلْبِي مْنِينْ رِيتُه **** زَالْ غْيَارِي وْزَالْ حُزْنِي أعْطَانِي الاوَّلْ شْرَبْتُه **** وَ الثَّانِي قُلْتْلُه امْهَلْنِي وَ الثَّالَثْ منْ يَدُّه اخْطَفْتُه **** زَادْ قْوَى فِيهْ حُسْنْ ظُنِّيً كْمَلْ الفرْحْ وَ الهَنِييَة **** خَمْرَة تُوهَجْ اوْهِيجْ كِالشَّمْسْ تَظْهَرْ فِي الكَاس مُذْهَبِيَّة **** تَضْوِي تَشْعَلْ شْعِيلْ يبْرَسْ بَسمِ الله عَالْمْ الخَفِييّة **** وَاسْمْ احْمَدْ خَاطْرِي مْوَنّسْ مَحْبُوبًا كُنْتْ بِيهْ نَهْضُو **** جَاء عَنْدِي وزَارْني البَارْحْ صَابْ أهْلِي و الحُسُودْ رَقْدُوا **** وَ اللَّيلْ امْطَرَّخْ الجُوَانَحْ بَتْنَا فِي قَصْرْ رَفِيعْ مَجْدُه **** مَكْمُولْ بَالزَّهْوْ وَ الفْرَاوَحْ المَنَاشِي وَ الشُّمُوعْ يُوقْدُوا **** فُوقْ الحَسْكاتْ وَ المْصَابَحْ وَ الكَاسْ ايْدُورْ بَالحُمِييَّة **** مُلاَت الزَّهْوْ لاَ تْنَقَّسْ حْلاَوَتْهَا عْسَلْ زَكِييَّة **** مَطْيَبْهَا فِي الحْلُوقْ تَغْرَسْ بَسْمِ الله عَالْمْ الخَفِييَّة **** وَ اسْمْ احْمَدْ خَاطْرِي مْوَنَّسْ ******** كِسَانْ الوَدْ لاَ تْمَثَّلْ **** حْلاَوَتَهَا حَلِيبْ حَلْوَة كثَّرْ مَنْهُمْ وَ لاَ اتْقَلَّلْ **** فِيهُمْ تَحْقِيقْ كُلْ نَشْوَة مَغْرُومْ العَشْقْ لُو اتْخَلْخَلْ **** عَقْلُه وَ دَهَاهْ وَاشْ يَسْوَى لَلْقَلْبْ دْوَى وَ كُلْ مَفْصَلْ **** شَرْبَهُمْ لُو هْنَاء وْ سَلْوَة عَنْدْ اهْلُه كُلْ عَرْقْ بَمْيَة **** شْعَرْ بَالألْفْ المْدَنَّسْ وَ الِّلي سَايَبْ بْألْفْ دِييَّة **** بَعْدْ انْ يَتْبَاع بِيعْ مُرْخَسْ بِسْمِ الله عَالْمْ الخَفِييّة **** وَ اسْمْ احْمَدْ خَاطْرِي امْوَنَّسْ ******** وَاحَدْ عِيشُه عَلَى شْفَاقَة **** وَ الاَخُرْ غَلْبُه مْعَاشْ عِيشُه وْ وَاحَدْ مَكْرُوبْ تَعْبْ وَاشْقَاء **** وْ لاَخُرْ رَاقَدْ فِي قَلْبْ فْراشُه وْ وَاحَدْ ذاقَتْ عَلِي حَلْقَة **** لَبْدَا مْغَلَّبْ عْلِيهْ عَطْشُه وْ وَاحَدْ سَاعَتْ عَلِيهْ وَ بْقَى **** يَتْمَتَّعْ فِي طِيبْ عِيشُه وْ وَاحَدْ رَزْقُه بْكُلْ سِييَّة **** لاَبَدْ كِالطِّيرْ المُقَرْنَصْ بَمْخَالَبْ مَا يْهَابْ حِيَّة **** شَاايْئًا شَافُه عَلِيهْ يَدْنَسْ بِسْمِ الله عَالْمْ الخَافِييَّة **** وَ اسْمْ احْمَدْ خَاطْرِي امْوَنَّسْ نَطْلَبْ رَبُ البِصَاطْ الاعْلا **** يُوفِيلِي كُلْ مَا طَلَبْتُو نَرْجَا بِفَضْلْ عَاسَى وَ عَلاَّ **** يَجْمَعْ شَمْلِي بِمَنْ هَوِيتُه قَادَرْ فُكَّاكْ كُلْ حَصْلَة **** يَرْحَمْنِي بَعْدْ مَا عْصِيتُه يَغْفَرْلِي ذَنْبْ كُلْ زَلَّة **** صَدْرَتْ مَنَّي وَ مَا فَعَلْتُه يَوْمْ انْ تُبْعَثْ كُلْ حِييَا **** لَلْمَحْشَرْ كُلْهَا تُتَارَسْ النَفْسْ تَقُولْ ذالقَضِيَّة **** مَا اعْضَمْ اهْوَلْهَا يْهَرَّسْ بِسْمِ الله عَالَمْ الخَفِييَّة **** وَ اسْمْ احْمَدْ خَاطْرِي ******** رَبّي بَالمُصْطَفَى اسْئَلْتَكْ **** و الأنْبِيَاء وَ كُلْ مُرْسَلْ وَاهْلْ التَّقْوَة وَ مَنْ يَحَبَّكْ **** و تْحَبُه لَلْجَنَانْ يَدْخُلْ وَ اللِّي طَافُوا مَقَامْ بِيتَكْ **** شَايَبْ وَ شَبَابْ كَهْلْ وَطْفَلْ تَعْتَقْنِي لِأنِي عَصِيتَكْ **** حَرْتْ وَلاَ صَبْتْ كِيفْ نَعْمَلْ نَرْجَا بُو فَاطْمَة الزَّكِييَّة **** مُحَمَّدْ عَزْ كُلْ مَجْلَسْ يَشْفَعْ يَوْمْ الحِسَابْ فِييَّا **** يَوْمًا فِيهْ العَزِيزْ يَرْخُسْ بِسْمِ الله عَالْمْ الخَفِيَّة **** وَاسْمْ احْمَدْ خأطْرِي امْوَنَّسْ ******** سَيدْ السَّدَاتْ بُو فَاطِمَة **** صَاحِبُ الجُودْ وَ الكَرَايَمْ صَلَّى اللهَ عْلِيهْ دِيمَا **** مَا دَامْ المُلْكْ بِيهْ قَايَمْ وَمْيَاتْ الْفْ صْلَاة عْمِيمَة **** وَ مْيَاتْ الَفْ سَلاَمْ دَايَمْ مَا دَامَتْ حُكَّمْتُه مُقِيمَة **** فِي قْيَامْ الخُلْدْ وَ النَّعَايَمْ الخُلْدْ فِي وَسْطَهَا هَنِييَّا **** وَ الحُورِيَاتْ كَا عْرَايَسْ وَ نْسَاء الدُنْيَا حُلَلْ و حُلْيَا **** شَايْئًا فِيهَا اشْتَهَاتْ تَلْبَسْ بِسْمِ الله عَالَمْ الخَفِييَّة **** وَاسْمْ احْمَدْ خَاطْرِي امْوَنَّسْ تَمْ نْظَامِي الْبَدِيعْ لَزْهَرْ **** مْصَنَّفْ بَمْحَاسْنُه السَّعِيدَة مَنْ عَنْدْ مُحَمّدْ بَنْ مْسَايَبْ ظَهَرْ **** جَابُه فِي تْمَامْ ذَالقَصِيدَة بَعْدْ السَبْعِينْ عَامْ وَ شْهَرْ **** وَ مْيَة وَ ألَفْ سْنَة عْدِيدَة يَسْتَسْلَمْ لَلْقَضَاء وَ يَصْبُرْ **** مَنْ جَاتُه زُورْتُه بْعِيدْة يَا رَبِّي بَلَّغْ المْنِييَّة **** وَ ابْعَثْنِي لَلْحَبِيبْ نَقْبَسْ مَنْ نُورُه خِيرْ البَرِية **** يَتْهَنَا خَاطْرِي وَ يَانَسْ بْسْمِ الله عَالَمْ الخَافِيَة **** وَاسْمْ احْمَدْ خَاطْرِي امْوَنَّسْ تَمَّتْ بِعَوْنِ الله وَفَضْلِهْ.. |
الساعة الآن 01:15 PM. |
Powered by vBulletin
قوانين المنتدى