صباح الخير عليكم
انا متزوجة وعندي 3 ولاد عايشا الحمد لله لاباس عليا حاجا متخصنيش وراجلي عمرو ما شك فيا ولا عسني ولا قلبلي تليفوني عندي 3 سنين ملي حليت الفايسبوك ودائما مخلياتو محلول وهو عمرو ما هز التليفون وقلبلي الفايسبوك داير فيا ثقة كبييييييرة
انا نحكي مع لبنات برك ومنكسيبتيش الرجال كامل وأي وحدة تبعثلي ميساج نحكي معاها عادي في رمضان بعثتلي وحدة ميساج حكيت معاها تعرفت بيها تعرفنا ملييييح ولينا كل يوم نحكو مع بعض وراتلي واش طيب واش شرات حوايج للعيد واش خدمت قاطو كل حاجة توريهالي حكاتلي على دارهم ومدتلي أسمائهم وحتى تصاورهم وانا ثان مديتلها اسمي واسم راجلي وولادي ولينا حبابات حاجا منخبوهاش على بعضانا ومور العيد الكبير بعثتلي تصويرتها هي وقاتلي راني متمنيا نشوفك ابعثيلي تصويرتك بعثتلها درت فيها ثقة كبييييييرة وكنت نحبها
في الأخير قاتلي انا مشي مرا انا راجل وووووووووووووو خلعتني ولا خلعني
بدات المشاكل معاه كل يوم يقولي اخرجي معايا اخرجي نشوفك وانا رفضت محبيتش
كي محبيتش نخرج معاه ولا يهدد فيا بالمعلومات الي مديتهملو والتصاور وخاصة تصويرتي قالي نحطها في كامل المجموعات و بالطبيعة راجلي ثان عندو فايسبوك خفت تلحقو تصويرتي دبرت عليا وحدة قاتلي قولي لراجلك بيراطاولي الفايسبوك وانت كنتي باعثتها لختك ولقاوها حطوها شديت في كلمتي وقتلو متشوفني ما نخرج معاك ودير واش تحب
قالي كي معجباتكش واش قتلك نبدلك وانت خيري
قالي مديلي دراهم مليون متزيديش تسمعي كامل بيا وانا مكانش كيفاش نخرج مالدار وحدي ومعنديش واش نرسل
حبيت نحكي لخاوتي خفت قلت نمدلو مليون ويروح يهنيني برك مديتلو وين نسكن جا مديتلو الدراهم وراح نسيت مقلتلكمش كنت مالقبل قبل ما نعرف الي هو راجل كيما كنت حاسبات طفلة مديتلو رقم الهاتف نتاعي
كي مديتلو المليون غير دار فالدورة عيطلي قالي صحيتي على المليون وصحيتي على العنوان قالي نمدلك سمانة في يدك اذا مخرجتيش معايا نجي نوري تصويرتك لراجلك ونقولو خرجت معايا وووووووووووووو انا خفت ومكان عليا غير ندير واش قالي ولا نخسر ولادي وحياتي وكلش
هذي مشي قصتي هذي من واش رانا نعيشو كاااامل وغلطات كيما هذي تديك وتديني للهاوية ولاد الحرام بزااااف وربي يبعدهم من طريقنا حبيت ننصحكم بالاك تبعثو تصاوركم للناس وديرو الثقة في أي مخلوق مرأة ولا رجل والو ثيقتك في ربي سبحانو ووالديك بصح خفت الميساج نتاعي متاخذوهش بعين الاعتبار وتقولو هذي مزالت ديمودي كيما علابالي بلي كاااااامل نحبو حكايات ونموتو على التقرعيج نسجتلكم قصة من الخيال نتاعي وخليتكم تتخيلو لوكان تتحطو في هذا الموقف كيفاش راح يصرالكم مالا ردو بالكم خاصتا الي صغارات مساكن ميعرفوش الذيابا الي معانا