كنت صغيرة كنت نفرح في لَعْيادْ..
23-05-2020, 12:39 PM
كنت صغيرة كنت نفرح في لَعْيادْ..
و كان العيد يْبانْلي حلوة و ثيابْ
و كان العيد يْبانْلي لَمّةْ لبْعادْ..
وْ كان العيد يْبانْلي جَيَّةْ لَنْسابْ
وْ كان العيد يْبانْلي ضحكة لَولادْ..
و دعوة شيخ كبيرْ يتْصَفَّحْ لكتابْ
وْ كان العيد يْبانْلي نطْوي لبْلادْ..
و كان العيد يبانلي صُحبة لُعْقابْ
كُنت نْحس دْروبْنا لينا سجَّادْ..
وْ كنت نحس كْفوفنا تلمس لسْحابْ
و كنت نْشوفْ عيون بويا كيف الوادْ..
كي يَحْمَلْ تتخلط حجارو بتْرابْ
و كنت نحس العيد في لمّة لَكبادْ..
و كنت نشوف العيد في رجعة من غابْ
و كنت نْشوف العيد يتعاد و يتعادْ..
بْدَخْلة بويا اذا وْقفْ في فم البابْ
و ضَرْوَكْ عاد العيد بارد مثل رمادْ..
و ضروك عاد العيد عندي غير سرابْ
و ضروك عاد العيد في صدري تنهادْ..
و ضروك عاد العيد يكويني مشهابْ
كانت تحلى مع "احمد"جملة لعيادْ..
و مات العيد نهار صد و صد البابْ
للامانة الأبيات منقولة،،،،،، راقت لي