حرام عليك عيب وعار...... من كلماتي
14-10-2009, 03:23 PM
أود أن أهدي هذه الكلمات المتواضعة لجميع الأمهات اللواتي
تتوجدن في ديار الشيخوخة وأطلب من الله عز وجل شأنه
أن يلهمهن الصبر
دون أن أنسى نصيحتي لكل من غرته نفسه
وانكر البطن الذي سهر الليالي من أجل تربيته.
إليكم الأبيات
حرام عليك
حرام عليك عيب وعار
يا عاجبة واش صرالك
الله يسطر يا سطّار
تنكر يمّاك اللي ولداتك
انسيت ياما ذاقت لمرار
وسهرت الليالي في جالك
وكيما انكرتها يا نكّار
غدوى ينكروك ولادك
_ _ _ _
انسيت كيكانت حاملة بيك
في شهور الحمل ياما قاسات
فالنهار وفالليل خايفة عليك
وصابرة لهاذوك الوجعات
جابتك لدنيا وبقات فيك
اترّبي وزادت مع اليامات
أتنّحي من لحمها وتعطيك
غير باه أتكبرك هذا ما نوات
_ _ _ _
فاتوا عوام وبديت تكبر
عمرها ما قالت بركاني
اتوكّل تغسل او تسهر
أستعرف وكونك حقاني
حنّن قلبك لا يكون حجّر
كل شيء امسجّل عند الفوقاني
قادر يبليك بدعوة الشّر
الدايم ربي و كل شيئ فاني
_ _ _ _
يا حسراه ليلة زواجك
دموع الفرحة بين عينيها
كانت خايفة لا تحضر لك
لكن الله استاجب ليها
قدّرها المولا وزوجاتك
ودارت الملزوم اللي عليها
وتمنات تشوف ولادك
أنكرت الخير وغدرت بيها
_ _ _ _
كبرت وخانتها الركبة
قلالت صحتها ونحانت
ولاّت ما تعّديش العتبة
عيانة في مكانها سكنت
يا حسراه نهار كانت لبّة
كانت تاكلة عليك او طمعت
ما درات تلعب لها اللعبة
بسبابك أنت اللي انظلمت
_ _ _ _
كذبت عليها وخرجتها من الدار
ما درات راك غادي بيها لوين
دهشانة وغابوا لها لفكار
ودموع عيونها مجريين
كافيتها بغرفة في سبيطار
بين قراينها منسيين
يدها على خدها ليل ونهار
تستنى في وليدها لحنين
_ _ _ _
أدي كلامي نصيحة وافهم
ولا تنسى واش جا فالسورات
قول النبي في حديثه اتكلّم
الجنة تحت قدام الأمهات
بعد صلاتي على النبي نختم
سليمان فطان كاتب لبيات
عافينا يا الله ما نشوفوا هّم
وخفف عاينا يوم المامات
_ _ _ _
حرام عليك عيب وعار
يا عاجبة واش صرالك
الله يسطر يا سطّار
تنكر يمّاك اللي ولداتك
انسيت ياما ذاقت لمرار
وسهرت الليالي في جالك
وكيما انكرتها يا نكّار
غدوى ينكروك ولادك
_ _ _ _
تحياتي
سليمان فطان
(coeur_tendre)
للإستماع من تحت
من مواضيعي
0 حرام عليك *** من كلماتي
0 غزة أرض الأسود والعزة *** تصميم جديد
0 تصميم جديد مني لكم *** حسبي الله ونعم الوكيل
0 تصميم جديد مني لكم جميعا
0 لمن يريد معرفة coeur_tendre أدخل ;)
0 مونتاج فيديو من تصميمي هدية لكل الجزائريين والجزائريات
0 غزة أرض الأسود والعزة *** تصميم جديد
0 تصميم جديد مني لكم *** حسبي الله ونعم الوكيل
0 تصميم جديد مني لكم جميعا
0 لمن يريد معرفة coeur_tendre أدخل ;)
0 مونتاج فيديو من تصميمي هدية لكل الجزائريين والجزائريات
التعديل الأخير تم بواسطة coeur_tendre ; 19-10-2009 الساعة 12:21 AM
