تسجيل الدخول

-تعرف يالحاج بوجمعة نزار عندو الحق كى قال متى يعلنون وفاة العرب
-شكون نزار لى خلاصلو الكارتوش نتاع بلاستيك في سانك اكتوبر
-لا لا قصد نتاعى نزار قبايلى نتاع لبنان لى قالتلو قزانة الطريق امامك مسدود
-علاش في لبنان يغلقو الطريق كيما احنا
-لا ياالحاج كمل القصيدة تفهم
-واش نفهم
-تفهم القصيدة
-يالحاج السعدى بيناتنا انت كى تكون تهدر تفهم روحك واش راك تهدر انا والله مانفهمك فهمنى ديريكت وماتلعبهاش تسمع الرديو بزاف
-نفهمك كى راك حاب تفهم, تسمع بيه الغاز الصخري
-ايه نسمع بيه داير كى الفحم الحجري ويشعلو بيه الافران نتاع الحجار رانى شفتهم يجيبو الفحم من الترك في البور بصح الترك رابلهم المنجم
-لا لا ماشي هو هذا مازال ماخرجوهش بصح كى يخرجوه يعلنون وفاة بلادنا
-علاش بلادنا تموت فرنسا ضربتها بنكليار نتاع نووى ورانا لباس بلادنا مسقية بدماء شهداء مرقية من عند ربي مايقيسها والو
-لا كى يخرجو غاز هذا اكثر من تضرب بلادك بنكليار نتاع بومبة توميك نعطيك تمثيل بسيط فقاقير لى يدخلو للسبيطارت ويديرولهم سيروم فيه فيروس يبراو
-لا مايبراوش يموت
-هكذاك الغاز الصخري تدير سيروم مفيروسي في باطن الارض باش الماء ومواد الكيماوية تخترق طبقة الصخرية ويخرجو الغاز
-فهمت فهمت راك تحكى علا طبقة الاوزن لى الامة المتحدة راهى تدير اجتماع كل عام عليه يسموه يوم الارض
-لا ماشي كيف كيف طبقة الازون كى نثقبت الاشاعات نتاع الشمس يقيسونا بصح هذى اشاعات البونادم هو لى يديرهم في الارض الشمس تضرنا احنا واحنا نضرو الارض
-وانت علاش راك مقلق يالحاج السعدى انت تفهم خير من الحكومة هى تعرف صلاحنا خير منا
مانيش مقلق روحت للبوسطة الصبح لقيت الميكرو حابس قلت نجيب معاك شوية وقت ايا ابقي على خير نعاود نروح للبوسطا


-