يــا سمــرة.......*بقلمـــــــــــــــي*
23-03-2017, 05:27 PM
أهلك يا سمرة هُم خيار الناس......النّسب اللّي بيه نفخر

معروفين بطال قياد و رياس......و أنا فيكم جاي نشكر

خيمتكم ڤارح متينة ف السّاس......مليانة بالخير و آكثر

بيت السّعد عاليت الڤنطاس......مشهورة بالجود تـعمر

جيتك قاصد يا كحيلة لنعاس......الطّيب اللّي فيه عنبر

بنت آصّيل اللي معبّر بالتقياس......سبحانو من فيه صوّر

ڤلبي عنها راه آمڤطع بآمواس......ڤولو لي كيفاش نصبر

غرامك يازايخة في ڤلبي غاس......مشعالو قاوي آمجمّر

مانعرفش النوم ملكني هوداس......كل ليلة بهواك نسهر

و العاشق مثلي ما يڤطع لياس......ما يسمح فالزّين لعطر

نصحى و نغيّم كيلي شارب كاس......ڤداش آنوبات نسكر

نمشي كل يوم لشوارك مهساس......متوحش حالي آمقيثر

ولّيت آنهوَم راكبني وسواس......عنتيرك ڤاسي معزبر

ماتدمع عينو مايرحمش خلاص......ما حنش عني مدكتر

خلاني معطوب مرمي في مرداس......نتلاوح عظمي مكسّر

ما نصبرش عليك يا قد الميّاس......يا كحل الدّاعج لسمر

ڤولي لماليك عنك شاب الراس......شيبني تخميم يقهر

كل ليلة قلبي آمسرّيني حواس......عنك يا سمرة اِيدَوَر

ما هــو صابر ما يــجيه نـعاس......للــڤمرة يبـات يــخزر

آنحس بروحي مباصي وسط آحباس......و الباب عليا آمزيّر

عيشي راه سماط من كثر آتهواس......وفضحني دمعي يشرشر

هاذ الضر معاشراتو ڤع لجناس......ولاّ غير آنـا آمحرحر؟

عييت نساعف فيك ونحلل بسياس......ما حنّش ڤلبك آمحجّر

بعدن كنت عزيز في أهلي لباس......ڤــدّام العديان نصغر

ماللّي كان ڤبيل بارودي قرطاس......مڤروني ديمة آمعمّر

على عودي شايش ولجامو بڤاس......ماهوشي حافي آمسمّر

آنقــاوم لــعدى و سيفــي نحّــاس......ڤــداش آنرڤبــات نـزبـر

من حقك ضركة تهينيني وخلاص......نستاهل مانيش نشوَر

آكـسرتي الخاطر يا بنت الناس......ما ضنيت اليوم يجبر

شكيتـك طينـة عـزيزة للـتمـلاس.....و ترابك غـالي آمعبّر

بـدلّهني زينـك إشـهي لآنفــاس......آثمارك كي طاب نوَّر

ڤلت آنايـا فـال و عليـه العسّاس......عزّيني زهري آمحصّر

أبيَك معروف من بكري تـرّاس......بن بيت كبيرة آمخيّر

تاريخو مشهور م لغواط الفاس......ها هو باين لي آمسطّر

صّلاة على النبي ضاوي للباس......بـدر النصفية آمنوّر

ألف سلام عليه بن عم العباس......كون شفيعي يوم نحشر

بقلمي: chawki dz
مواضيع العضو مشاركات العضو
من مواضيعي 0 سالـــــــــــــــــــــــــــــــــــــــــــــــ ــــــــوني.......بقلمي
0 مانسطيب عيش.....بقلمــــــــــــــــي
0 طيــــــــــــر الهدهد........بقلمــــــــــــــــــــــــــــــــ ــي
0 آنت بهلولة............بقلمــــــــــــي
0 طوفي... طوفي...-بقلمي-
0 يـــــــا بنتي... -بقلمي-
التعديل الأخير تم بواسطة chawki dz ; 23-03-2017 الساعة 05:34 PM