ام الغيث
25-02-2017, 11:36 PM
أنَا اللّي ابْشُوفْ الخَزْرَة انْكْوِيتْ **** وْ قَلْبِي نَارْ النُّوَاجَلْ اكْوَاتُه
أنَا اللِّي فْنِيتْ بَالهَوَى وَ امْضِيتْ **** أنَا الشَّاكِي بَالجْفَا وْ لِعَاتُه
أنَا اللِّي فِي بَحْرْ الهَوَى اتَّرْمِيتْ **** وَامْضَا جَفْنِي فِي تْخُومْ لَجَاتُه
أنَا اللِّي بْليعَةْ الهَوَى قَاسيتْ **** مَا قَسَى قيسْ الغْلاَمْ فِي احْيَاتُه
أنَا اللِّي بْخَمْرْ التِّيهَانْ ارْوِيتْ **** وَ كْمَى قَلْبِي عَنْ هْمُومْ غُصَّاتُه

أنَا اسْبَاتْنِي الغْزَالْ أمْ الغِيثْ **** مَنْ صَالَتْ عَنْ جِيلْنَا و خُودَاتُه

لَمَّا انْظَرْتْ فِي امْحَسَنْهَا وَ اشْفِيتْ **** مَلْكَتْ عَقْلِي بَالْجَمَالْ وَ اسْبَاتُه
اسْعِيتْ الذَّمَامْ وْ بَالكَسْبْ ارْضِيتْ **** وَ اتْعَافَا ضُرِّي وْ رَاع فِي ذَاتُه
وَ انْطَقْتْ قُلْتْ لِيهَا حَبِّيتْ الغِيثْ **** يَا مَنْ فَاقَتْ بَالبْهَا وْ خَطْوَاتُه
رُوفِ عَلَى العَشِيقْ ايْلُوحْ التَّمْرِيتْ **** يَنْسَا بِيكْ امْحَايْنُه وْ غُصَّاتُه
فِي الحِينْ جَاوْبَتْنِي وَلْفِي وَ اصْغِيتْ **** قَالَتْ لِي بَلْسَنْهَا وْ لُوغَاتُه
يَا عَاشْقْ البْهَا لِيكْ الرُّوحْ اهْدِيتْ **** وَ امْثَالَكْ فِي كُلْ حَالْ يُغَاثُوا

أنَا اسْبَاتْنِي الغْزَالْ أمْ الغِيثْ **** مَنْ صَالَتْ عَنْ جِيلْنَا وْ خُودَاتُه

اهْناتْ مُهْجَتِي وَ الحُسَّادْ انْكِيتْ **** وَ الدَّهْرْ انْعَمْ لِي بْجُلْ فُرْجَاتُه
مْعَ الغُزَالْ لَذْ اسْرُورِي وَ ازْهِيتْ **** وَ اغْنَمْنَا طِيبْ الزَّهْوْ وْ لَذَّاتُه
قَبَّلْتْ خَدْهَا مَنْ شُوقِي وَ اجْنِيتْ **** فِي رِيَّاضْ البَاهِي وْ طِيبْ نَسْمَاتُه
وَ اسْقَاتْنِي بْرِيقْ تِغْرَهَا وَ احْيِيتْ **** وَ اسْتَحْلِيتْ ارْحِيقْ طِيبْ نَشْوَاتُه
كَاسْ المْدَامْ مَنْ يَدِّيهَا التَقِيتْ **** وَ انْسِينَا حَالْ الجْفَا وَ شَدَّاتُه

أنَا اسْبَاتْنِي الغُزَالْ أمْ الغِيثْ **** مَنْ صَالَتْ عَنْ جِيلْنَا وْ خُودَاتُه

الشِّيخْ - سِيدِي قَدُّورْ العَلَمِي - رَحِمَهُ الله
التعديل الأخير تم بواسطة محمد سعيد ريال ; 25-02-2017 الساعة 11:42 PM