اتلموا ليوم جيتكم بحكاية زمان فيها عبرة و ان شالله تعجبكم : وآآآاش نطيــــــح ؟.
16-08-2021, 03:40 PM
اتلموا ليوم جيتكم بحكاية زمان فيها عبرة و ان شالله تعجبكم : وآآآاش_نطيــــــح ؟


حكاية اليوم قالوا عليها حقيقية وصرات في زمان غير الزمان ، كيما حكاوهالي نقصها عليكم... باسم الله بديت و على النبي صليت ، صلوا عليه يا عباد الله و سلموا... هذا يا حباباتي واحد السيد تزوج شحال من امرأة. و امرأة و اللي يجيبها تروح و تخليه .... و تقولو طلقني والله ما راني قاعدتلك فهاذ الدار و ما راني والدة معاك ولاد. .. و منين يسقسيهم على الاسباب كيف الاولى كيف الثانية.. كيف الخامسة ، نفس الجواب يقولولو "غير تخرج آسيدي المحجوب من الدار و نبدا نسمع صوت تاع راجل غريب ينادي باعلى صوتو و يصرخ (وآآآاش نطيــــــح ؟ وآآآآآآآآش نطـــــــــيــــــــــــــــــــــــــــــــــــــ ـــــــح ) " ، و هذا كان سباب طلاقو من كل زوجة اتزوجها ، الى ان تزوج للمرة السادسة و قرر يصارح زوجتو و يخبرها بالقصة و قالها" ما عندي ما نخبي عليك آمولاتي هاذشي اللي كاين و ها انا حكيتولك و ظركا انتِ تقرري واش حبيتي يااااا تبقاي معايا و تكوني مراتي و ملكة داري او نعيشوا حياتنا على المرة و الحلوة ؟" يا كل واحد يشد طريقو
قالتلو زوجتو: " و الله انا هاذ الدار يا ما نخرج منها و اللي بغا يطيح يطيح! "
خرج سيدي المحجوب لخدمتو كيما العادة و منين بقات مراتو وحدها بدات تسمع : "وآآآآآآآآش نطـــــــــيــــــــــــــــــــــــــــــــــــــ ـــــــح ؟ "
و هي تجاوب : الا بغيت تطيح غير طيح !!
قالها الصوت ثاني : وآآآآآآآآش نطـــــــــيــــــــــــــــــــــــــــــــــــــ ـــــــح ؟
جاوبت : راني قلتلك الا بغيت تطيح غير طيح !!
قالتلو الصوت ثاني : وآآآاش نطيــــــح ؟!! وآآآآآآآآش نطـــــــــيــــــــــــــــــــــــــــــــــــــ ـــــــح ؟!
جاوبت : راه الطريق قدامك يالاه طيح !!
فجأة سمعت صوت حاجة ثقيلة طاحت من السقف في قاع المراح و حاجة تكسرت ... خرجت تجري تشوف واش كاين ، و اللي كان ما هو غير صندوق عامر باللويز و المجوهرات طاح في وسط الدار ، و الصوت ما كان غير ملوك الكنز اللي كانو حارسينو و حبوا يعطوه ل للي يستاهل و حتى حد ما عرفلو قد الزوجة السادسة . جمعت الذهب و خباتو و منين جا سيدي المحجوب واش كشما سمعتي صوت بلا ما تهدر راحت طوووول جبدتلو هاذاك الذهب و الخير ، دهش و بقا غير يشوف و من بعد سقساها "واش هاذ الشي ؟" ، قالتلو " هذا هو (وآآآاش نطيــــــح؟) قلتلو طيح الا بغيت تطيح !! رزق من عند الله و طاح"
و هكذا سيدي المحجوب اصبح من اكبر الاغنياء في القبيلة و عاش حياة هايلة مع زوجتو السادسة اللي دخلت عليه مباركة و مسعودة و دارها في عنيه.
و هنا خلصت حكايتي مع "وآآآاش نطيــــــح" ، خليتلكم الهنا و راحت البال..
التعديل الأخير تم بواسطة دائمة الذكر ; 22-08-2021 الساعة 07:44 PM