مول النية إذا ما ربح يسلك على خير,,,,,,,,,,,,,,
11-05-2021, 10:38 PM
السلام عليكم ،،،،،،،

يحكوا ناس زمان على راجل متزوج مرا على نياتها... وقلبها طيب... اللي في قلبها على لسانها و اللي على لسان الغير تصدقوا وذنيها... الراجل خدام حزام... نهار تصيب وعشرة تخيب... وماشية وحالتو كل يوم ترجع لتالي... اللي يصوروا ويحصلوا من الخدمة يشري بيه شوي زيت زيتون يجيبلها تتعشاه معاه... لكن النفس تمل... ربي يعطي لكل قلب ما يتمنى... الراجل عارف عقلها علي نيتها... قالتلوا قلبي طاب من الزيت... خاطري في لحيمة وشحيمة... قاللها هذا اللي اللي تحبيه... غدوة الحي نجيبلك هبرة لحم... ونصغرلك العظمة... ونزيد معاهم خضرة وغلة... ونشبع مولات بيتي... صبحت المرا الضحكة معبية الفم... ومشمرة الكم... تسڨم في الدار... هو فرحها بكلمة وهي فوحتها عند الجيران... راجلي اليوم يجيبلي اللحم... ووجدت البرمة... وشعلت الفحم... وقعدت تستنى فيه يدخل عليها بالخير والخمير...
عشت العشية... طاح الليل... دخل وفي يدو مغرفتين زيت قاتلوا وين اللحم... قاللها انا خممت ودورتها في راسي قلت مولات بيتي تستحق خير من اللحم... راني نويت بدل اللحم نشريلك بيهم مناڨش يستاهل الوذنين... رقدت المرا وهي فرحانة قريب طير... طلع النهار لمت الدار... ودارت على جاراتها مولى بيتي اليوم يجيبلي ذهب... وقالت لجارتها نقبتلها وذنيها... وقعدت في عتبة الباب تستنى فيه... هو جا وفي يدو قريعة زيت زيتون... قاتلوا وين الذهب... قاللها نويتها وخرجت من فمي... لكن قلت مرتي وعشرت عمري نشريلها دويرة تتوسع فيها وترتاح من العوج والضيق... مشت عليها مسكينة وقعدت لصباح مرقدتش... ضوى الفجر بدات تلم في الدبش وربطت وحزمت الصراير وطول مشت للجيران تخبر فيهم.
روحت وجات قدام الباب و قعدت تراجي فيه... المغرب أذن والراجل جاي من بعيد شافها عند الباب... ولى على طريڨو ماعرفش منين يلمها مسكين... من الدنيا... وإلا من المرا النية اللي كل شئ تصدقوا... قعد قدام الجامع يخمم... جاه واحد سقساه... حكالوا اللي صاير... مرتو كل يوم تطلب منو ويوعد فيها مسكينة... وهي موش فاهمة أنو على قد الحال... دبر عليه السيد وقالوا: "كان فديت منها أنا نعطيك الحل... في واحد يبيع في دار... لكن المشكل مسكونة... اللي يسكن فيها يهرب... وسومتها قليلة... تقدر عليها... منها توفي بكلمتك وترتاح منها...
صبح الراجل شاري الدار ورجع لمرتو وهز حويجاتو... وصلها لفم الباب قاللها خشي رتبي الحوايج... أنا راني ماشي نجيبلك وحدة تعاونك... مشى وقعد وراء الحيط يستنى في واش يصير...
مرتو النية دخلت وبدات تنظف في الدار... سمعت صوت يخوف... بسم الله الرحمن الرحيم... تلفتت تلقاها الجنية... تحسابها المرا اللي بعثها راجلها باش تعاونها... قالتها: "يعطيك الصحة... هذا وقت لعب؟! إيجي حطي ايدك وعاونيني...
الجنية عاودت عيطت بصوت أقوى... ودور ليها المرا النية بكف صرفڨتها... قالتلها بعثك راجلي تعاونيني... شمري على ذراعك... مخلصك راجلي تنظفي موش تلعبي...
الجنية خافت وبدت تسيق وترتب في الدار... تخدم وتعاون في المرا النية لين طابت وعيات... قالتلها خلاص ياسر خليني ونعطيك جرة ذهب... ضحكت المرا النية وقالتلها... باهي يا الحنانة تعطيهالي تلقي الخير"
في رمشة عين حطتلها جرة ذهب واختفت...
طلعت النية باعت من الذهب شرت اللحم وروحت قعدت تستنى في راجلها... مع المغرب قال نروح نشوفها واش صار فيها... وصل للدار ويشم ريحة اللحم... ويلقاها لابسة وفرحانة... قاتلوا 'المرا اللي بعثتها تعاوني في الدار عطتني جرة ذهب... ضحك وقاللها " بالصح... مول النية إذا ماربح يسلك على خير... وولد الاصل لوكان توكلوا زيت حافي يصونك... وقليل الأصل لوكان تعطيه لحم أكتافك يخونك"

صفي قلبك وامشي بالنية تتقضالك أمور مخفية... وإذا ماربحت مع المخلوق تربح مع الخالق...