حرام عليك *** من كلماتي
16-08-2022, 05:33 PM
@@@@
حرام عليك عيب وعار
يا عجابة واش صرى لك
الله يستر يا ستار
تنكر يماك اللي ولداتك
نسيت ياما ذاقت لمرار
وسهرت الليالي في جالك
وكيما نكرتها يا نكار
غدوة ينكروك ولادك.
@@@@
نسيت كي كانت حاملة بيك
في شهور الحمل شحال قاسات
فالنهار وفالليل خايفة عليك
وصابرة لهاذوك الوجعات
جابتك للدنيا وبقات فيك
اتربي وزادت مع اليامات
اتنحي من لحمها وتعطيك
غير باش اتكبرك هذا ما نوات.
@@@@
فاتوا عوام وبديت تكبر
عمرها ما قالت بركاني
اتوكل تغسل وتسهر
استعرف وكونك حقاني
حنن قلبك لا يكون احجر
كل شيء امسجل عند الفوقاني
قادر يبليك بدعوة الشر
الدايم ربي وكل شيء فاني.
@@@@
ياحسراه ليلة زواجك
دموع الفرحة في عينيها.
كانت خايفة لا تحضر لك
لكن الله ستاجب ليها
قدرها المولا وزوجاتك
ودارت الملزوم اللي عليها
واتمنات تشوف ولادك
انكرت الخير وغذرت بيها.
@@@@
كبرت وخانتها الركبة
قلالت صحتها ونحانت
ولات ما اتعديش العتبة
عيانة في مكانها سكنت
يا حسراه كي كانت لبة
كانت تاكلة عليك وطمعت
ما درات ادير لها ضربة
بسبابك انت اللي انضلمت.
@@@@
اكذبت عليها وخرجتها من الدار
ما درات راك ماشي بيها لوين
دهشانة وغابوا لها لفكار
ودموع عيونها مجريين
كافيتها بغرفة في سبيطار
بين قراينها منسيين
يدها على خدها ليل ونهار
اتعدي في ليام اللي باقيين.
@@@@
ادي كلامي نصيحة وافهم
ولا تنسى آش جا فالسورات
حديث النبي في قوله اتكلم
الجنة تحت قدام الامهات
بعد صلاتي على النبي نختم
سليمان فطان كاتب لبيات
عافينا يا الله ما نشوفوا هم
وخفف علينا يوم الممات.
@@@@
حرام عليك عيب وعار
يا عجابة واش صرى لك
الله يستر يا ستار
تنكر يماك اللي ولداتك
نسيت ياما ذاقت لمرار
وسهرت الليالي في جالك
وكيما نكرتها يا نكار
غدوة ينكروك ولادك.
@@@@
تمت بعون الله. 😥
الصور المرفقة
نوع الملف: jpg FB_IMG_1660670977584.jpg‏ (11.5 كيلوبايت, المشاهدات 1)