تسجيل الدخول

جار عليا وحشك يا الغايبة
ضالي مدة مانظرتك ياولفي
طاحت الدمعة عن جفني رايبة
كتبت حروف اسمك في كفي
الكبدة من نار وحشك طايبة
جمرها حبط قلبي وقدا شقفي
دمقت قع جواجيا من حرها ذايبة
مشعول قادي ياليعتي وش يطفي
ذي سوامر معتاها فيا لاهبة
حليلي نجاوق من صهدات جوفي
نسمة حبك عن جمري هابة
وحيالها بعدن قيمتو كان مكفي
هوضتي فيا غرامك نارو ثاقبة
في وسط اللهاب يقدي عرفي
عادت جنودي مع جنودك متصالبة
جيوش كبيرة وجدتها في صفي
يوم القحار ندنق قبالي هايبة
حت من قايدها اسوخر متخفي
حركتها تولك ولات مكاسير عايبة
شاو معارك رندات مشلول زحفي
عشات جنودي في الرجعة خايبة
واصبح قايدها عن وطنو منفي
يانور ياشبيهة النجمة الثاقبة
يانور الاصطاح واه هيجت حرفي
يا محبوبة صورتك عالبال راكبة
كلما نذكر اسمك يزيد لهفي
متعذب من حبك محنتي شايبة
ذا الدمع المفروع مالقمو كفي
واه خواطري من لوعتك قالبة
حت سعدي ضالو مدة مقفي
سلت عليك قع الطيور العاقبة
وجميع لخطار لامن نباني موفي
اودادة ظني محبتي جاتك قاصبة
ذا من هبال ولا من قلة عرفي
انا عطيتها لك ممخوضة رايبة
وسقيتك حسوات من كاس عطفي
ريح لقدرة لاحني ليك ذي كاتبة
درتك عمري وغلا حبك في جوفي
ضركة قولي فيا ماكش راغبة
ولا قلبي صار عن حبك مكرفي
يامحبوبة حالة محبوبة صاعبة
يتلاوح متركن ماهوشي معوفي
محموم جسدي الوان فيا متقالبة
والطبيب ليشوفني يصد مقفي
نباني بحالتي قال ندير الواجبة
ورمالي كلمات فيهم عارف ظرفي
ذا خبير متمكن مارماهالي زاربة
عارف صفة حالتي ومقدر ضعفي
حين شاف فزع حالتي راهبة
فسرلي سبة غبني جاب وصفي
قالي بيك مرض حب الغايبة
ودون حبك لاعقار لضرك يشفي
تقدا حالتي تول خليلتي هاربة
ونناجي شفاية لعطاب يزل خوفي
بر لغواط قاطناتو المحبوبة راتبة
وطن الجدلة زاخر بالوانو معفي
نمشي ليه راكب على السايبة
ولا على الملجوم صابح متخفي
يالغواط الزين جيتك ودموعي رايبة
بيا وحش غزالي عنها مدة منفي
امحبوبتي يهون عليا ماراك طالبة
ويلا عينيا حلال فيك يا ولفي
مانزهد في حبك لسنين العاقبة
ويوم نسيانك ساعتها راني متوفي

للشوق ماثر و مقاصد جميل ما انشدت

والاجمل مرورك الطيب قلم مسافر....تحياتي