تسجيل الدخول

واش نحكي يا خوتي لخيار

مَاللي عشته هذي سْنينْ

هموم تحرق في قلبي نار

وجرح ما قدرت على نسيانو

****

عجبني زينها تغار منو لقمار

وصوتها كالهمس دافي حْنينْ

وحْياها مَالخدود يسيل أنهار

وكْمال خصالها فالعينين يبانو

****

قلت هذي معاها نبني الدار

تربي لولاد وتتهلى فالوالدين

معايا تعيش حتى تفنى لعمار

ولاَّ المكتوب يبلَّع علينا بيبانو

****

يا سيدي كنت نوزن قنطار

الخد مْدلـِّي والوجه سْمين

بين الكتاف قد خمس شْبار

وجسمي بالكاد تهزو سيقانو

****

من همها نقصت كيما المسمار

تحسب ما كليتش عندي سْنين

عظامي يتحسبو ووجهي مصفار

وفمي طاحو منَّو كامل نيبانو

***

كنت يا سيدي مقاول مالكبار

و رجل أعمال عنده وزين

نصرف مليار ونخبي مليار

وخيري مغرَّق جاري وجيرانو

*****

هذي رجعتني نحرث كـِ لحْمار

عايش بالتخبية هارب مَ الدين

نصرف دينار وما نخبي دينار

والعنكبوت في جيبي نسج خيطانو

سيدَ القاضي معاها عقلي احتار

ما تدير طواجين ما تدلك عجين

ما تغسل لمواعن ما تنفض لغبار

منها الضيف تناسى بيتنا وعنوانو


****

سمحت فيَّا بزاف وسمحت فالصغار

كي تغذينا نهار , تصومنا ليلتين

السامط تملحو والحلو تكثرلو الحار

وطيابها باين من بنة حرقو ودخانو


****

من الزواج وليت نشوف العزاب حْرار

والمتزوج زاوش في قفصو سجين

واللي راه بين وبين يستناه لمرار

ربي يخفف عليه لهيب الزواج ونيرانو

****

يا سيدي ما ظنيتني نوقف نهار

في دار الشرع والناس شاهدين

نطلب الطلاق و نكشف لسرار

عدويا يتشمت واولادي ينهانو