حكًــــــــــــــــــاية زمان اسمها ،،،،، الفحـــــــــــام
27-02-2021, 10:53 PM
راني جيتكم اليوم يا آلِ الشروق بحكاية زمان اسمها الفحام ،،،،،،
....
كان يا مكان فوحد الزمان ، وحد الفحام فقير رزقوا ربي بسبع بنات و دراري، البنات كانو يحشمو بباباهم كي يشوفوه هكاك موسخ و حوايجو غير فحم و ماكانوش يخدمو فالدار ، لاتيات غير برواحهم ، غير ختهم الصغيرة ، كانت شاطرة بزاف و تحب باباها ، تخدم شغل تاع الدار و تطيب ، و كي يجي باباها تقابلو عند الباب تنحيلو الصباط و لحوايج تغسلهم و تحطلوا ياكل ، و الطفلة هاذي كانت معروفة بالذكاء ديالها ، كانت تعرف تهدر بالمعون و تحل الالغاز ، حاجة ماتخفالها .فالبلدة هادي اللي ساكنين فيها هاد العائلة حاكم دكتاتوري و صعيب وشنوا كان يموت على العاب الذكاء و منهم الالغاز ، و تالمووون كان ديكتاتوري ، كان كل سمانة يجمع مجموعة من الناس و يمدلهم لغز باش يحلوه ، و كان لازم واحد فيهم يلقى الحل ولا يموتوا كاملين، ايا من زهر الفحام طاح فالمجموعة نتاع السمانة الجديدة ؛ رااحو عند الحاكم و بقاو يستناو واش يقول .
نطق الحاكم :‹ يا سكان راكو عارفين علاش جمعتكم اليوم هنا يتسما بلا منطول ، شجرة عندها 12 جذع، و كل جذع عندو 30 غضن ، و كل غصن عندو 5 ورقات ، يا السياد وشنوا الحل؟›. سكتوا كامل ، قال :‹ معليش عندكم الوقت مي نتمنا نهار نتلاقاو يكون عندكم الحل ولا الريوس يطيروا›. ايا خرجووا كامل من عندو حيرانين كامل يخموا و يتشاوروا ملقاوش الحل ، سمانة كاملة والوا ، ايا ليلة مقبل الميعاد راح جمع الفحام عايلتوا و ولادوا بش يخليلهم وصايا ، ايا نطقت الطفلة الصغيرة قاتلوا؛« مالك يا بابا توصي و تودع مهموم خير؟» قالها :« يا بنتي الحاكم عطالنا لغز وواحد ما لقا الحل و راكي بنت البلاد و تعرفي الباقي » قاتلوا :« خبرني واش قالك الحاكم و انا نلقالك الحل » قالها :«اخطيك ابنتي تكسري راسك و متلقايهش» ايا قاتلو جربني، اسيدي احكالها اللغز ، قاتلوا هذا مكان يا بابا ، دوك نمدلك الحل و غدوة قولو لسلطان ...، ايا جا الصباح و تستفت المجموعة قدام الحاكم ، بدأ يجوز عليهم واحد واحد ، وكل دقيقة يرد واحد للطرف ، هكاااك حتى وصل للفحاااام ، ضحك باستهزاء و قالوا وش يلفحااام زعما تسلك راسك و راس الرفقاا ، قالوا يا سيدي انا نقولك وش عندي و انت احكم ، قالوا ابدا ، قالوا يا سيدي الشجرة مولات 12 غضن هي السنة ، خاطرش فالسنة كاين 12 شهر ، و 30 غصن هوما 30 يوم فالشهر. ....
و 5اوراق هوما 5 صلوات فاليوم ، و لكن يا سيدي السلطان الكلمة الصحيحة معرفتهاش ، خزر فيه السلطان و قالو مبروك عليك ياالفحام سلكت راسك و راس صحابك ، وشنوا قولي معااونك حتى واحد باش تحلوا!؟ ؛ هنا الفحام حار ، خاف لوكان يخبر على بنتوا كاش ما يديرلو و يديرلها ، و خاف لوكان يكذب يفيقلوا و يقتلوا ، ايا قرر يخبروا الصح ، قالو يا سيدي السلطان ، عاونتني طفلة ،؛ طفلة !!!! قررت تتزوج بيها . الفحام خلععع قالوا متقدرش ، شنف عليه السلطان قالوا واش يمنعني؟، قالوا اسمحلي يا مولاي وشنووو الطفلة صغيرة و زيد بنتي ( قالها حشمان) ، خزر فيه السلطان و ضحك قالوا قولها على عام توجد روحها نجي نديها...
راح الفحام و قال في سروااا ، السلطان يتزوج ببنتي يا حسراااه باينة يامات و ينسى . جازو يامات و شهور و ما صرا والو ، كي قرب يكمل العام راح السلطان وجد ثلث صنادق كبااار و كل واحد بواش عمروا ، الاول معمر بالمجوهرات ، و الزاوج بالويز والذهب ( العملة) و الثالث بالرييحة و العطور عيطط للخدامين و أمرهم يوصلوا الجهاز لبنت الفحام و قال : كل كلمة تقولها و حركة ديرها توصلوهالي و يا ويلكم تنسااو كاش حاجة.
ايا يتمشاو يتمشاو ، واحد فيهم قالهم امشو نطلوا ، تشوفوا واش بعت السلطان ، كي طلوا ، لقاو كل الخير ، راحوا سرقوا من كل صندوق شوية شوية .
المهم وصلوا ، دقدقوا ، حلتلهم الباب ، قاتلهم انعم ، قالوا لها حنا مبعوتين السلطان وين رآه باباك ؟ قاتلهم« راح يرمي الماء داخل الماء» ، ما فهموا والو ، قالولها و يماك؟ قاتلهم « راحت تشوف اللي عمرها ما شافتوا» ؟ قالوا اوااه هادي مهبولة ، قالولها صحا و خاوتك؟ قاتلهم « راحو يضربوا و ينضربوا» كي كملت قتلهم يدخلوا لدار بيد ما يجو مواليها ، ايا كي وصلوا مواليها ، بدات تحط فالماكلة.....
كي وصلت الجاج راحت يمهاها تقسموا قالتلها لالا يا يما انا نكمل مزيتي ، ايا بدات تقسم ، سبقت ف باباها مدتلوا الرأس ، يماها الظهر ، خياتها الجنحين ، خاوتها الصدر و الحراس الرجلين ..، الحراس حاروا ، ايا كلاو و كملوا ، كي جاو رايحين ، قاتلهم مذابيكم توصلوا رسالة لسيدي سلطان ، قالولها ايه معلوم ، قاتلهم قولولو :« السلام عليكم يا سيدي السلطان ، حبيت برك نقولك ، السماء ما عاد فيها النجوم كيما كانو ، و البحر ما عاد فيه الما كيما كان ، و الوزة ما عاد فيها الريش كيما كانت يا سيدي السلطان » فالولها هذا مكان ، قاتلهم ايه ، قالولها بسلامة ، ايا ودعوهم ووصلوا لقصر لقاو السلطان بستنى على احر من الجمر...
قالهم ايا ايا ازرع ينبت ، احكولي كلش و بلاكوا كاش ما تنساو .
قالوا يا سيدي السلطان كي وصلنا لقيناها وحدها فالدار ، كي بدينا نسقسوا فيها بدأت تجوبنا بغرابة ،
قالهم واش قالتلكم؟
قالو كي سقسينا على باباها قاتلنا راح يجيب الما باش يرميه فالماء..!
قالهم اييييه باباها راح جاب الماء من الواد بش يخدم الطاحونة ديالوا ، و الطاحونة كي تحبس الما ديالها يخرج و يولي الواد .
قالولوا صح سمعنا بلي راح يطحن .
قالهم كملوا ..
قالوا ، زدنا سقسينا على يماها قاتلنا راحت تشوف واش عمرها ما شافت .
قالهم ايه يماها راحت حضرت زيادة مولود جديد اللي عمرها ما شافتو .
قالولوا صدقت يا مولاي ، و سقسينا على خاوتها قاتلنا راحوا يضربوا و ينضربوا .
قالههم امم خاوتها خرجوا للحومة و يلعبوا مصارعة حرة .
قالوا هاديك بالذات ، و يا سيدي سلطان كاينة حاجة خرى .
* وشنوها؟
_ كي جينا ناكلوا قسمت الجاج ، باباها مدتلوا الرأس ، و يماها الظهر و اخوتها الصدر و حياتها الجنحين و حنا الرجلين .
قالهم* اممم هاذي قسمة مليحة ، باباها مدتلوا الرأس خاطرش هو رب العائلة ، و يماها الظهر خاطرش مسؤولية وعبء الدار كامل على ظهرها ، و حياتها الجنحين خاطرش يجي نهار و يطيروا لديار رجالتهم و خواتها الصدر خاطرش هوما اللي يدافعوا على الدار و نتوما الرجلين خاطرش على رجليكم جيتو و على رجليكم وليتوا.
للخدامين نخلعوا من حكمة الطفلة ، قالهم هذا ما كان .
قالولوا يا سيدي السلطان ، راهي بعتتلك خبار و قاتلك يا مولاي السماء ما عاد فيها النجوم كيما كانت، و البحر ما عاد فيه الما كيما كان و الوزة ما عاد فيها الريش كيما كانت....
#الفحام_2
بسم الله بديت و على النبي صليت و بالورد و الزهر حبابي رشيت
ماااالا كي وصلو عندو و حكاولو واش صرا و زادو قالولو على اللغز لي بعثتلو....... فاااق بيهم و قاااالهم ااااااه يا واحد البنديااا وصلتوا الأمانة كيما وصيتكم ؟
بدااااو يتأتأووووو : اييييييه يا سيدي السلطان و كيفاه ؟
* و كيفاااااه ااا ، يا وحد السراقين هاي كشفتكم يا وحد البهايم ، النجوم اللي نقصوا هوما المجوهرات اللي خونتوهم ، و الما اللي نقص من البحر هوما الروائح يا كلاااب ، و الريش هوما الويييييز .
هادوك بداو يشطحوا بلا محارم ، بداو يبكوا ر يركعو : اسمحلنا يا سيدي اعفو علينا و الان ما نعاودوها غير اعفو علينا .
*قالهم روحوا اليوم هاي زاهيتلي ، راني عافي عليكم ، مي لوكان تعاودوها ميشقاش نقول واش راح يصرالكم ، و أمرهم بالخروج.
السلطان كان فرحان بزاف كي لقى اخيراا واحد بش يشاركواا الالعاب ، مي كان عندو شكوك و متخوف يجي نهار و تتمادى فالذكاء ديالها . الحاصووول ، دارلها عرس سبع ايام و سبع ليالي ، كي جابها فليل قالها ....
* شوفيي يا بنت الحلال ربي شاهد شحال راني فرحان بييك و شحال راكي عاجبتيني ، وشنوا نقولك كلام حطيه مليح في وذنك و عمرك لا تنسايه ، هنايا انا هو السلطان الملك ملكي و الشور شوري و الحكم حكمي ، عمرك تخلي الذكاء تاعك يخليك تتعداي الحد تاعك ، خاطرش نهار ديريها يكون هذاك هو الفراق بيني و بينك ، فهمتي ؟.
- قاتلوا كلمتك مفهومة و مسموعة يا سيدي السلطان ، حد ما يعلا عليك غير المولى سبحانوا .
- قالها يرضى عليك و سلم عليها من الجبين ..
جازوا يامات و السلطانة تتاقلم مع حياة القصر . وحد الليلة خرجت لتراس و قعدت تشوف المملكة ، حتان سمعت زوج رجال يحكو ، واحد كان يشكي همو للي جالس معاه . قالوا
راهو كاين واحد درت فيه لامان و درتو كي خويا غدرني وودالي الفرس تاعي و داه يبيعو و كي هدرت معاه كذبني و حقرني قدام الناس الكل وبدا يقولهم هو سيد هاذا جا يتبلا فيا من بعد، جاو داونا للسلطان ايا السلطان بعد ما سمع لكلام هذا كنت عارف رح يميل ليه خاطرش الخداع بلعطوا بالهدرة، قالي السلطان احكي نتا ، ايا حكيت كامل لحكاية. .........
.
السلطانة سمعت ڨاع الهدرة و غاضها السيد بزااف ايا راحت تخبات ف الظلام و بدأت تعيط
السلطانة: يا فلان يا فلان .
الغلام : بسم الله الرحمن الرحيم ، انتي انس و لا جن.
السلطانة: ما تخافش يا غلام ، انس راح يعاونك
الغلام : وين راكي يا مولات الصوت مانيش نشوف فيك .
السلطانة : ميهمش ، اسمعني اذا حاب ترد حقك ، طبق واش نقول ، غدوة صباح بكري كي ينود السلطان روح ليه و قولو******
الغلام : ايييه صح ، غابتلي هاذي ، الله يعطيك ما تتمناي ، غدوة باذن الله نصبح عندو.
الليل كامل مرقدش ملفرحة ، صباح كي طلعت الشمس ، كان عندو ....
دخل السلطان المحضر ، قالو
السلطان : اااو ماشي نتا لي جيت البارح ، واش جاااابك مع صباح ربي ، ولا داير ديڨا وحدوخراااا ! 😡😡😡
الغلام: لالا يا سيدي السلطان ، جيت نشتكي برك ، هذا مكان .
السلطان : انطق يا وجه البومة .
الغلام : يا سيدي السلطان ، انا كنت زارع الماييز على شط البحر ، ايا كي طاب ، خرج الحوت ملبحر و كلاهولي ، و انا جايك طالبك تلقالي حل يرضيني و يردلي حقي.
خزرر فيه السلطان مليح و قال للرعية ديالو
السلطان: واش قلتوا، واشنووه الحكم في هاذ الحالة ؟
الرعية : نصيدوا الحوت و نقتلوه .
خزر فيهوم السلطان و قالهم:
* بهااااااايم نسيتوا واش قالوا ناس زمان لوكان يخرج الحوت م لبحر ، تنڨر الدنيا ، زيد يا لحمير الحوت يموت لوكان يخرج ، ونتا يا فلان جاي تحرش بياااا!
الغلام: حاشااا يا سيدي السلطان، ما عاش اللي يحرش بيك، واشنوا يا سيدي نتا تان نسيت واش قالوا ناس زمان ، لوكان الجحشة تجيب فرس ، تنڨر الدنيا، زيد يا سيدي الجحشة عقيمة ، حمار و ماجيبوش .
هنااا السلطان حسن كيشغوول واحد ضربوا بكف و فطنوا.....
السلطان: صح يا غلااام عندك الحق ، العيا نساني و لهاني اسمحلي ، حقك درك يولي كيما تحب .
الغلام: كتر خيرك يا سيدي السلطان كان علابالي بلي تعدل و متحڨرش .
السلطان : ايه ، وشنوا اصبر ، هاذ الحاجة لاه مفكرتنيش بيها البارح ، شكون قالهالك؟
السلطان كان داخلو شك بلي مرتو هي لي حكات .
الغلام: الله غالب يا سيدي السلطان ، حتى الليل باش جاتني الفكرة .
السلطان: و لوكااان نقول بلي الفكرة ماشي ديااالك...؟
هنا الغلام بدأ يتقلق ، خاف السلطان يجبدلوا الكذب قالوا : يا مولاي تحب الحق ، الفكرة ماشي ديالي ، صوت مرا جاني م سما هو اللي عطالي الفكرة .
السلطان: يا غلام ، تتمسخر بيااا صوت يجيك م سما يمدلك فكرة ، أهدر الحق 😡😡😡.
الغلام : و الله يا مولاي ما راني تكذب عليك ، تحب نجيبلك شاهد يشهد نجيب .
السلطان : صحت قولي وين كنت نهار جاك هذا الصوت .؟
الغلام: تحت قصرك يا مولاي ، عند الحيط ، جاني صوت مرا ، جابلي ربي من لتراس .
!!!!!!!!! هنا السلطان تأكد بلي هي ، تملك روحو و قالو دراهمك يولولك و المهر ديالك كيف كيف ، روح دركا .
كمل السلطان شغلو و طول النهار يخمم ، مع العشية غير دخل ، قابلتو مرتو .
السلطانة : على سلامتك يا تاج راسي ، كي جاز نهارك راك عيان .
السلطان: ايييه جازو عليا بزاف قضايا منهم هذيك تع الغريب و مول الفرس .
السلطانة متحمسة : ايييه و.وش حكمت .؟
السلطان : بالعدل ، الغلام خرج برئ و رديتلو حقو .
السلطانة بانت الفرحة في وجهها ، قالت : الحمد لله ، انت سلطان عادل و ربي يحميك و يخليك تاج راسنا . و جات خارجة
قالها : اصبري ما زال ما كملللتت.
مع الاول توسوست مبعد قالت بلاك على الخداع
قالت : يا مولاي ، بيك هذاك الخداع ، اسمحلوا بلاك الحاجة هيا اللي خلاتوا يدير هكاك .
قالها : بياا نتي . يا بنت الناس تشفاي ليلى زواجنا .؟
جاوبت : ايه باينة .
قالها : و تشفاي واش قتلك ؟
هناا بدأت تفهم ، قاتلو : اييه معلوم كيشغل البارح .
قالها : يتسمى متفكرة ة هكاك و درتي رايك ، اتفكري ايهمال وش قلت كامل ، و خليني نقولك ابداي تلمي قشك ، ادي كامل وش عزيز عليك و تحبيه و غدوة صباح توض ملازمش نلقاك .
جا رايح ، قاتلو: سيدي معليش نطلب طلب و تحققهولي .
قالها: كولش غير انك تبقاي .
قالتلو : لالا ، حابة غير نتعشا اليوم اخر عشا معاك
السلطان قبل ، و هي راحت مع خدماتها توجد وش تدي و العشاء.
وصل وقت العشاء ...
تحط كل الخير على الطابلة المواكل ، المشروبات كامل انواعو، الديساار، بداو ياكلو بسكات، غير صوت المغارف اللي يتسمع .
السلطان كان يأكل ياكل ، حتى حس بلي بدأت تديه عينيه (كيما راكم نتوم دركا😂) و دوور بيه الدنيا ، حتان طاح دايخ فوق الطابلة ،ىاحت السلطانة جابت صندوق كبير و تعاونت مع الخادمات حطت السلطان داخل الصندوق ، و دات معاها صنادق آخرين حطت فيهم كامل واش تحتاج ،و راحت لوحد الدار كانت شراتها بعيدة على القصر .
كي وصلت الدار ، قالت الخدامات يدخلوا الصناديق للصالون و هي دخلت صندوق السلطان لشمبرتها و خلت عليه بش يتنفس .
جاااز وقت حتان ناض السلطان مدڨدق ، شافها قدامه قالها : واش صرا ؟ وين راني ؟
قاتلو : مولاي ، اسكوو راك في حالة تخليك تتفكر وش قتلي البارح ؟
قالها : معلومم، علابيها راني نقولك واش رآه صاري .
قاتلو : مولاي قتلي ادي كل حاجة تحبيها و عزيزة عليك ، و انا ما كانش حاجة احب و اعز عندي منك ، علابيها حطيتك في صندوق و جبتك معايا 😁.
خزر فيها باعجاب بذكائها و بحب
قالها : ارواحي يا وحد الشيطانة عندي ارواحي ، حضنها و سلم على رأسها ، قالها ايا نولوا لدارنا .و قال للخدامين: ارفدو صناديق رانا راجعين .
قاتلو : مولاي ، فهاذ الصناديق جبت العفايس اللي تحبهم ، نهار يضيق خاطرك و تعيا من مشاكل الشعب ديالك ارواح لهنا و ريح ، شريت هاذ الدار ليك ، و نتمنى نهار جي جيبني معااك .
خزررر فيها بمعزة و قالها معلوووم سلطانتي .
و هما عاشوا فرحانين و مرتاحين ، و حكم السلطان وش حكم و خلفو وليدو بعدو ، و اخيرااااا كملت لحكاييية اللي شيبتكم و شيبتني😂، نتمنى تكون عجبتكم الحكاية، المهم أن شاء الله تاني تكونو ديتو العبرة ، الي هي ماشي غير الزين اللي يخليك تكسبي راجلك مي فهامتك و قفازتك هوما الصح ، و اسمحولي كي طولت عليكم، ملتقانا في وحدة اخرى من حكايات زمان ،،،، تحياااااااتي
التعديل الأخير تم بواسطة دائمة الذكر ; 27-02-2021 الساعة 11:15 PM