منتديات الشروق أونلاين

يا سلاااااااااام ما احلى الجو هون ..جل ..وغبره ...وقشره... وعطر من ابو التلاته بليره

اااااااه هي الحياه ولا بلاش .. كل يوم بصحى بتمشى بين الشعر وماخده راحتي عالاخر

اكل ومرعى وقله صنعه ..وهدا الولد اللي عايشه بشعره اسمه خالد ...ولد امور وبجنن

كل شهر بغسل راسه مره ..بس شاطر يحط جل ...كل يوم بده علبه ..بس انا بحب الجل

وصرت متعوده عليه..

خالد سنه اولى بالجامعه وبدرس جغرافيا والظاهر انه نجح بالواسطه ...اليوم كان قاعد هو وابوه

وعمه...وكان عمه يحكي انه في ازمه مثقفين بالجيل الجديد يا زلمه بتلاقي الشاب مخلص

توجيهي وما بعرف عاصمه الكويت ...خالد ضحك وقال والله يا عمي هدول هبايل عاصمه الكويت

معروفه طبعا الامارات...عمه وابوه بحلقوا فيه باستغراب وانا صرت ادق على راسه ولك انا القمله

بعرفها وانت بالجامعه ومش عارفها ...خالد الظاهر شعر بنمنمه براسه وبلش يهرش واجا بده

يفعصني من كثر ما حك...ابوه وعمه فكروه انه بفكر ...قام ابوه قاله بدي اسألك سؤال يابا:شو

عاصمه فلسطين ...برضه ضحك خالد وجاوب بثقه :له يابا هدا سؤال؟ معروفه..طبعا غزه

ابوه زعل كتير وراح ضربه على راسه ولولا الجل كان انفعصت كمان مره وقاله: قوم **** ابوك وابو

اللي اعطاك التوجيهي

خالد قام بسرعه وهرب وكان مبسوط انه فلت من ابوه وعمه ...زي اللي بتحكله على جرب

لأنه كان عنده موعد مع حبيبته شيرين تحت الجسر ..وطبعا انا كنت مكيفه لاني بشوف صاحباتي

اللي بشعرها قموله وام السيبان ..والله اشتقتلهم..

اجت شيرين عالموعد وكانت لابسه اللي عالحبل ..وشعرها بلمع لمع..ابصر شو صار بقموله وام

السيبان اذا غسلت راسها شيرين ...المهم خالد سلم عليها وقالها كيفك وشو اخبارك ومن

هالحكي

وهي كانت تتدلع عليه ...طبعا التنين كذابين... لانه هو كان يقولها انه ساكن بعبدون ..وهي كانت

تقوله انها ساكنه بالصويفيه ...بس انا سألت قموله عنها وقالتلي انها ساكنه بعد الزرقا بشويه

والتنين بعرطوا على بعض وكله كذب بكذب

المهم انا مش شايفه صاحباتي وصرت انادي..قموووووله....ام السيبااااااااااان...لكن لا حياه لمن

تنادي....ابصر وين راحوا...معقوله رحلوا على شعر احسن... مش معقول...والله لو يلفوا البلد كلها

ما بلاقوا مكان احسن شعرها يعيشوا فيه ...وصار خالد يقرب راسه على راس شيرين...وله خالد

استحي ..شو بدك تساوي؟وصار راسهم قريب على بعض كتير وبتمايل وساعتها شميت ريحه

شعرها ...اووووف كااااازز...روحي صارت بدها تطلع...ولك يا خالد خلص ...ابعد راسك عن راسها

الله لا يوفقك بدي اموت من الريحه...لسه ريحه التنر اللي بتشمه احلى بكتير من هالريحه

وساعتها عرفت انه صاحباتي انتقلوا الى رحمه الله نتيجه عمليه ارهابيه

وانا انخنقت عالاخر لولا انه ابعد عنها شويه....وهي وجهها احمر ابصر ليش وهو بهز براسه

دوخني اكتر من الاول وسألها:حبيبتي انتي شو نوع العطر اللي بتحطيه ريحته بتجنن

قالتله هدا اسمه كازار من لاكوست حبيبي والجلن قصدي العلبه بميت دينار

قالها فعلا حلو خلص بدي اشتري متله...انا صرت ادق على راسه ...وين تشتري متله؟

بدك تقتلني يا اهبل؟ الله لا يوفقك يا شيرين مش بكفي انك قتلتي صاحباتي قموله وام السيبان

شكله اخرتي راح تكون على ايدك..المهم خلص الموعد وراح خالد عند صاحبه الجرافه

والجرافه هدا اسم على جسم ...قد البغل ...بس بموت بالتنر ... وخالد متله بشم تنر

يعني الليله زي قاع الكيله ....وبلشوا التنين يشموا تنر ويكتموا وانا كمان صرت احب التنر

صرت مدمنه انا من هالملعون ....حتى اني بصير احك لما ما اشمه ...المهم انا دخت وخالد داخ

وحنكه ارتخى وبطل يعرف يحكي...وانا كنت ماسكه شعره ومدقره فبها لاني حسيت حالي بدي

اوقع من راسه..وبعد شوي اجت الشرطه ومسكت خالد وصاحبه وطبعا اكلوا قتل لما فرقوا عالجيران

وانا اكلت اكم من هوايه بس خفاف..شكله الشرطي بعرف وين يضرب ...واخدوا خالد حطوه على

كرسي واجا واحد بلش يحلق براس خالد وكل ما يحط الماكنه على راسه يضربه ضربه او ضربتين

حتى انه اجت ضربه فيي وكسرتلي ثلاث رجلين ووقعت مع الشعر عالارض...وهيك خلصت

حياتي مع خالد