أنا اللــــي كنـت نـايم علـى وذاني واضنيت روحـي شبت والزمان نسـاني
بعد ربعين خريف ها هو خــضـار جنـاني ... والقلب ما عدت نتحـكم فيه لبعيد أداني
غرام كحلة لنعاس علــــى غـفـلة جاني ... ما صبت عليه وين ذا عجــاجه اعماني
راح النعاس وطال الليل علـيا مقــواني ... نتقلب في فـراشي مفتون ما ني هــاني
قلبي الرهيف قدامها افضحـني وعــراني ... عطشان شتا وصيف اشربت البحر ما رواني
يا الفــاهم أنا مــولا جرحي بـراني ... جــاي من بعيـد فالاصل ما هو وهراني
يا اللايم لا تزيـــد في عذابي بـركاني ... حبي عـفيف مــاني فاسـق ما ني جان
انا تاريخــــي نظيـف ربي نجـاني ... من قبيلة الشـهامة والنيف انا أبويا ربـاني
انا االأمي عمري ما قريت شوقها قـراني ... بلقيس جــات بالخميس ريحها روحاني
قالت يا ساكن الذات واك انت تـهواني ... تكلم يا الفارس يا مـروض الجنون با حناني
اعذرني واحـــط روحك في مـكاني ... لو ارفضت الخطـاب واش يقولوا عدياني؟
معمدة جيتك اليوم القــب ما هـناني ... نخافك تسمع من بعيد وتبطـــل تلقاني
محـــتمة وجـا ريح الشــرق أداني ... يا مذوب النار والحديد مقدرة عليك تنساني
أدي مفاتيح القلب معاك يا السامعـني ... بلا ما نتــــكلم أنت من زمان فاهماني
أيوب وصابرين شاهدين على حـزاني ... بلا بيك الــــــدنيا ما هي لازماني
تبقي أنت وحدك في القلب يا المالكني ... ســيرتك تبــقى ديما علــى لساني
ساط الريح وتكـسروا غـصــاني ... هــذي قســـمة الله وهذا ما اعطاني
جيتكم ضـيف يا شـــيوخ زماني ... اللي ما اداه الريح اليوم يديه غدوة كيما اداني
فـتـكم فالـــديث خليته بلعاني ... انا عمري ما بكيت ذا غرام مريم بكـــاني
نختم بالصلاة هذا الحديث الوجـداني ... لي ما يهزه فراق لحباب و ما يضحي يتسمى أناني