صِيَّامْ القَلْبْ وَ الجُوَارَحْ
صِيَّامْ القَلْبْ وَ الجُوَارَحْ بِسْمِ الوَهَّابْ بَاشْ نَبْدَا نَتْرَجا وَ هَبْ النّْظَامْ -- وَ اللِّيلَة لِيلَةْ الصِّيَام وَ القَلْبْ الهَادِي إمَامُه -- قَيُّومْ الأرْض وَ السّْمَاء وْ نَثْنِي بَالصَّلَاةْ عَنْ مَنْ جَانَا بَالحَقْ مَلْهَامْ -- نَابِينَا شَافَعْ لَسْلاَمْ تَبْلغْ سِيدِي إلَى امْقَامُه -- ضِي ؤ دِيجَانْ دَايْمَا وَ ارْضَاةْ الله عَلَى لَصْحَابْ فِي سَايَرْ الدَّوَامْ -- عَنْ أمَّةْ خِيرْ الأنَامْ ذُوكْ اللِّي يْرفَعُوا اعْلاَمُه -- وَ العُلاَمَاء امْلاَمَّا وَ بَعْدْ يَار مَنْ يَسْغَنِي نَقْطَفْ مَنْ غَرْسْ الكْرَامْ -- مَشْمُومْ ايْفُوحْ بَالنّْسَامْ طَاهَجْ نَهْدِيهْ فِي اكْمَامُه -- لَلْأمَّة حِيثْ صَايْمَا (الحَربَة) هَلْ اهْلاَلُه وْ بَانْ ضِيُّه شَهْر إيجِينَا فْكُلِ عَامْ -- يَغْسَلْ القُلُوبْ وَ الجْسَامْ ؤسَعْدْ مَنْ صَامُه وْ زَادْ قَامُه -- وَ اعْنَا بَاهْلِ المْرَاحْمَا (مطلَع) الصُّومْ إلَى يْكُونْ وَارَعْ -- يَرْفَعْ مُولاَهْ عَزْ رَفْعَة صُوَّمْ اليَدِّينْ مَا اتْدَافَعْ -- صُوَّمْ رَجْلِيكْ مِنَ الدَّلْعَة صُوَّمْ لَثْمَادْ وَ المْسَامَعْ -- وَ لِسَانَكْ حَقْ للِيهْ تَرْعَى (بيت) غَضْ ابْصَارَكْ عَنِ الشُّوفَة الخَبِيثَة شُوفَةْ اللِّئامْ -- شُوفْ الشُّوفَة ذَالغُشَامْ مَا جَابُوا مَا الدَّاوْ هَامُوا -- فِي الطَّاعَة وَ المسَالْمَة صُوَّمْ خَطْوَاتَكْ أ صَايَمْ ثَبَّتْ بَاصْيَامَك القْدَامْ -- تَبْلَغْ بِيهُمْ المْرَامْ ؤ قُومْ اللِّيلْ فِي اظْلاَمُه -- صَلِّي وَ النَّاسْ نَايْمَا رِيَّضْ نَفْسَكْ وَ اتْوَاضَعْ بَالسُّنَة كُونْ مُلْزَامْ -- سَلَّمْ وَ ارْحَمْ تُرْحَام وَ اللِّي يَعْنَى بْإسْلاَمُه -- يُبْعَثْ مَعَ اهْل الحْمَى مَا شَاء الله عَنْ صِيَامْ الوَرَعْ وْ مَنْ لِيهْ رَامْ -- يَظْفَرْ بَغْنَاهْ وَ المَرَامْ سَعْدْ اللِّي دَارْلُو امْرَامُه -- فِي حَالْ ابجُوعْ وَ الضَّمَاء (الحربة) هَلْ هْلاَلُو بَانْ ضِيُّه شَهْرْ إيجِينَا فِي كُلْ عَامْ -- يَغْسَلْ الَقْلُوبْ وَ الجْسَامْ سَعْدْ مَنْ صَامُه ؤ زَادْ قَامُه -- وَ اعْنَى بَاهْلَء المْرَاحْمَة (مطلع) كُلْ مَا قُلْتْ يَا السَّامَعْ -- لِيَا قُلْتُه ابْغِيتْ نُوعَى قَالَتْ لحْبَارْ قُولْ شَايَعْ -- بِينْ ضُلوعْ العِبَادْ أفْعَة فِي الحَسَانَاتْ كَا تْمَانَعْ -- للسِّيَا كَا تْزِيدْ دَفْعَة (بيت) وَ اعْلِيهَا كَا نْقُولْ لِيَا تُوبْ عَلَى فَاحَشْ الكَلاَمْ -- وَ اتْرُكْ مَنْ رَايْدْ الخْصَامْ وَ كَلاَمْ السؤ يَا اشْئَامُه -- خلأِّيهْ النَّاسْ صَايْمَا لاَ تَغْتَبْ لاَ تْنَمْ لاَ تَشْهَدْ زُورْ لاَ تُوصَلْ الحَرَامْ -- طِيعْ الرَّحْمَانْ وَ اسْتَقَامْ وَ اسْغَى لَقْوَالْ مَنْ فَهْمُوا -- وَ اسْتَعَدْ للدَّايْمَة هَدَّنْ بَاصْيَامَكْ الجُوَارَحْ وَ افْطَمْهَا غَايْتْ الفْطَامْ -- عَنْ فَعْلْ الشَّرْ وَ المَلاَمْ شَهَرْ رَمْضَانْ مَنْ شِيَّامُه -- يَنْشَرْ نَسْمَة امْنَسّْمَا وَ ايْصَفِّي الذَّاتْ مِنَ القَطْرَانْ ادْيَالْ إيَّامْ وَ ايَّامْ -- وَ اشْهُورْ افْنَاتْ وَ العُوَامْ الصُّومْ عْلاَجْ فِي احْكَامُه -- حِكْمَة وَ اسْرَارْ حَاتْمَا (الحربة) هَلْ اهْلاَلُو بَانْ ضِيُّه شَهرْ ايْجِينَا فِي كُلْ عَامْ -- يَغْسَلْ القُلُوبْ وْ الجْسَامْ سَعْدْ مَنْ صَامُه وَ زَادْ قَامُه -- وَ اعْنَى بَاهْلْ المْرَاحْمَة (مطلع) زِيدْ يَا رَاسِي قْرَا ؤ طَالَعْ -- فِي كْتَابْ الله رَاكْ تُوعَى اقْرَا ابْوَرْشْ ؤُ نَافَعْ -- وَ احْدِيثْ الرَّسًولْ مُتْعَة لاَ تَقْهَرْ حَد لاَ اتْنَازَعْ -- وَ ارْبِيعْ الوَقْتْ يَتّرَاعْ (بيت) لُو تَعْرَفْ وَاشْ رَاهْ يْرْجَاكْ لاَ كُنتْ اتْعِيفْ الطَّعامْ -- مُوحَالْ ايْجِيكْ المَنَامْ كِيَّتْ مَنْ بالجرَامْ قَامُوا -- خَسْرُوا وَقْتْ المْحَاكْمَة وِينْ الشُّجْعَانْ وْ مَنْ بْنَاوْ القُصُورْ وْ شَيْدُوا اهْرَامْ -- البَقَاء لله وَ الدَّوَامْ فُرْسَانْ اغْوَالْ وَ انْهَزْمُوا -- وَ الدَّنْيَا لِيسْ دَايْمَا لِيكْ أرَاسِي كَا انْوَصِّي تَعْمَلْ زَادَكْ بألقُوَامْ -- الطَّرِيقْ اصْعِيبْ لَلْمَقَامْ امْظَلَّمْ شِينْ لِمَنْ ظَلْمُو -- كِيَةْ مَنْ كَانْ نَاقْمَا زِيدْ أ رَاسِي حَنْ فِي أهْلَكْ وَ الضُّعَفَاء وَ اليَتَامْ -- ؤ تَمْ قَوَاعَدْ الاسْلاَمْ أَهْلْ الله فِي النَّعِيمْ دَامُوا -- مَا صَابَتْهُمْ طَامَّة (مطلع) هَاكْ آرَاوِي قَصِيدْ نَافَعْ -- لَطْرِيقْ الحَقْ بِيكْ يَسْعَى وَ ادْعِي لِيَا انْكُونْ وَالَعْ -- بَالصَّبْحْ ؤ مَا انْرُومْ بَدْعَة انْزِيدْ انْرَصَّعْ التّْرَاصَعْ -- نَطْرَبْ لَصْحَابْ كُلْ جُمْعَة (بيت) مَهْمَا الضَّامِيرْ قَالْ لِيَا بَعَّدْ مَنْ سُوقْ الزّْحَامْ -- ؤ دِيرْ الفُمَّكْ اللّْجَامْ اصْحَابْ الذِيقْ وِينْ نَامُوا -- شُرْفَاء وَ اعْوَامْ عَامَّة كَمْ مَنْ مَغْرُورْ غُرْ بِيهْ الشَّيْطَانْ ؤُ تَاهْ فِي الوْهَامْ -- مَا اغْنَمْ صَلاَتْ لاَ صِيَّامْ عَاشْ ابْهِيمَة فِي اوْهَامُه -- مَا بِينْ احْنَاشْ سَامَّا كَمَّنْ بَيْدَقْ حَاصَلْفِي وَادْ الضَّمَاء كَا يْضُنْ ضَامْ -- وُ زَادْ البَحْرْ اللّْطَامْ لاَحْتُه لَمْوَاجْ لَعْدَامُه -- غَرَّقْ نَفْسُه الضَّالْمَة غَابْ العِيَّارْ رِيتْ لَحْصَى وَ الجُوهَرْ عَادُوا اتْوَامْ -- وَ الكَلْخَة تَشْبَهْ الحُسَامْ أوَّلْ الكْلاَمْ وَ اتْمَامُه -- الصَّلاةْ عَنْ بُو فَاطْمَة وَ اسْلاَم الله للشْرَافْ الطُّلْبَا وَ افْحُلْ النّْظَامْ -- دُونْ اللِّي شَوْهُوا الكْلاَمْ سَارَقْ وَ ايْقُولْ مَنْ كْلاَمُه -- بَامْعَانِي غِيرْ تَامَّة وَ اسْمِي عُمَرْ بُورِّي رُودَانِي بَالله مُغْرَامْ -- وُ سِيدْ العَرَبْ وَ العَجَامْ عَاشَقْ زُورَة فِي امْقَامُه -- وْ نَدْرَكْ حَجَّة امْتَمْمَا نَسْعَى رَبِّي ايْكُونْ لِيَا مَنْ لاَ يَسْهَى وْ لاَ ايْنَامْ -- فِي يُومْ انْفَارَقْ الرّْصَامْ يَحْشَرْنِي بِينْ مَنْ اغْنَامُوا -- مَولاَيَا رَافْعْ السَّمَاء هَلْ اهْلالُو وْ بَانْ ضِيُّه شَهْرْ ايْجِينَا فِي كُلْ عَامْ -- يَغْسَلْ القْلُوبْ وَ ابجْسَامْ سَعْدْ مَنْ صَامُه وْ زَادْ قَامُه -- وَ اعْنَى بَاهْلْ المْرَاحْمَة تمت بعون الله. نظم الشيخ عمر بورِّي. |
رد: صِيَّامْ القَلْبْ وَ الجُوَارَحْ
بارك الله فيك
مختارة رائعة |
رد: صِيَّامْ القَلْبْ وَ الجُوَارَحْ
اقتباس:
|
الساعة الآن 09:25 AM. |
Powered by vBulletin
قوانين المنتدى