منتديات الشروق أونلاين

اسمع لَخطابِي

اسْمَعْلَخْطَابِي **** وَ انْتَبَهْ يا اللِّي تَأمَنْ فِي الصّْحَابْ

مَا بَاقِي صُحْبَة **** غِيرْ اللِّي يَنْظَرْلَكْ لَلْجِيبْ

احْذَرْ يَا زُغْبِي **** وَقْتْ مَا فِيهْ لاَ نِيَّة لاَ حْبَابْ

الدَّنْيَا غَابَة **** وَ المَعِيشَة وَلاَتْ انْهِييبْ

لاَ طاعَةْ رَبِّي **** لاَ حَيَاء لاَ خُوفْ مَنْ يُومْ الحِسَابْ

كُل شِي بَالنَّصْبَة **** العَبْدْ فِي دَاخَلْ جُوفُه ذِيب

جَرَّبْتْ اصْحَابِي **** فِي اوْقَاتْ االشَّدَة غَلْقُوا البَابْ

وَ الكُلْ اتْخَبَّى **** وَ المْخَيَّر قَالْ الله ايْجِيبْ

بَانْ المَتْخَبِّي **** وَ انْكَشَفْ الَسَّرْ وَ يَنْزَاحْ النِّقَابْ

شِي مَا يَتْخَبَّى **** خُوذْهَا مَنِّي بَالتَّجْرِيبْ

هَدْرُوا فِي غِيبي **** كْلاَمْ زُور لاَ مَعْنَة وَ لاَ اصْوَابْ

بُهْتَان وْ غَيْبَة **** وَ لاَ وَاحَدْ اخْجَلْ بَالعِيب

نَاوْيينْ خْرَابِي **** بَاطَلْ وْ بْلاَ سِيَّة وَ بْلاَ اسْبَابْ

مَنْ بَعْدِ الصُّحْبَة **** و بَعْدْ العَز اصْبَحْتْ غْرِيبْ

مَا خَافُوا ذْنْبِي **** وْ دَعْوَةْ المَظْلُومْ مَا عْلِيهَا حْجَابْ

مَا تْكُودْهَا عَقْبَة **** تَصْعَدْ السَّميعْ المُوجِيبْ

وَ الدَّهْرُ انْوَابِي **** لِيكْ يُومْ وَ عْلِيكْ يُومْ فِيهْ الحْسَابْ

يَا شَارِي نُوبَة **** تَنْصَابْ كِيمَا كُنْتْ اتْصِيبْ

اتَركْ عْيُوبِي **** شَوفْ لَعْيُوبَكْ وَ اتْرُكْ العْتَابْ

وَ اتْرَكْ الغَتْبَة **** انْتَبَهْ رَاكْ رَاكْ امْعَمَّرْ عِيبْ

أشْ لِكْ ابْعِيبِي **** تُوبْ لَلْمُلَى وَ ارْجَعْ للصُّوَابْ

الزّْمَانْ عْقُوبَة **** اللِّي بْنِيتُه بَالْكَذْبْ ايْرِيب

تَقْذَفْ فِي نَسْبِي **** طَاوْعَاتَكْ نَفْسَكْ وَ حْنَا احْبَابْ

وَ انْسِيتْ الصُّحْبَة **** وَ اطْعَنْتَنِي فِي ظَهْرِي بَالغِيبْ

اضْحِيتْ اطْلِيبِي **** خْصِيمِي وَ اتْفَتَّشْلِي عَلَى السّْبَابْ

مَا خُفْتْ اعْقُوبَة **** مَا جَاكْ اللِّي عْمَلْتُه عِيبْ

مَا خُفْت مَنْ رَبِّي **** انْهَارْ يَجْمَعْنَا وَ ايْقُومْ الحِسَاب

لاَ وِينْ الهَرْبَة **** انْطَالْبَكْ قُدَّامْ الرَّاقِيبْ

احْسَبْتَكْ مَتْرَبّي **** وَ افْقِيهْ دَارَسْ السُّنَة وَ الكْتَابْ

كَانَتْلَكْ هِيبَة **** حَتَّى اصْبَحْتْ مَن القَلْبْ قْرِيبْ

وَ ظْهَرْتْ لَعُوبِي **** امْظَهَّرْ البَسْمَة وَ اخْفِيتْ النّْيَابْ

نِفَاقْ وْ نَصْبَة **** وْ امْخَبِّي تَحْتْ ثِيَابَكْ ذِيب

اوْكِيلَكْ رَبِّي **** يَا الخَايَنْ العَشْرَة وَ الحْبَاب

كُل شِي بَالنُّوبَة **** ايْجِي انْهَارَكْ تَنْدَمْ لاَ رِيبْ

كِمَا تَغْدَرْ بِي **** تَنْغَدَرْ يَا مَنْ لاَ تَقْرَا احْسَابْ تَأتِيكْ الضّرْبَة **** رَاهْ رَبِي وَكِيلْ ارْقِيبْ

تَشْرُبْ مَنْ كُوبِي**** كِيفْ جَرَّعْتْلِي سْمُومَكْ بَالكُوَابْ

انْشُوفَكْ تَدَّرْبَى **** كِمَا هَيِّيتْلِي بَاهْ انْرِيبْ

اعْرَفْتَكْ صَابِي **** صْغِيرْ غُرِّي مَا تدْرِيشْ الجُوَابْ

وْ دَرْتْلَكْ رَتْبَة **** وَ ظْحِيتْلِي كِي الحِيَّة فِي الجِيبْ

مَا تَبْتْ لْرَبِّي **** لاَ خِيرْ دَرْتُه ايْنَجِّيكْ مِنَ العَذَابْ

مَا صُنْتْ الصُّحْبَة **** كِيفْ اتْقَابَلْ عَالِمُ الغِيببْ

تَنْهَبْ وَ اتْعَبِّي **** اغْوَاتَكْ الدَّنْيَا وَ اانْسِيتْ العِقَابْ

سُوقَكْ بَالرِّبَا **** كُلْ مَالَكْ بَالسُحْتْ كْسِيببْ

مَا حَمْلَكْ قَلْبِي **** يَا مَنْ تْكَافِي بَالشَّرْ خِيرْ الحْبَابْ

اغْلَقْتْ العَتْبَة **** وَ هَنِّيتْ رَاسِي من هُوْلْ اعْجِيبْ

صْفَاوَةْ قَلْبِي **** وْ نَيْتِي وَ الطِيبَة هَاذُو حْجَابْ

وَ السّْتَرْ الهِيبَة **** وْ خَالْقِي يْسَهَّلْ كُلْ صْعِيب

اوْفَى مَرْغُوبِي **** وَ الكَرِيمْ افْتَحْلِي كُلْ البُوَاب

وَ اجْنِيتْ الصّابَة **** وَ احْمَدْتُه السَّمِيعْ المُوجِيبْ

نلْتْ مَأَرِيبِي **** وَ العَدُو بَاهَتْ بَالغُمَّة انْصَابْ

طَاحْ فْي غَيْبُوبَة **** امْدَمَّرْ بَالغُلْبْ اعْطِيببْ

تَمِيتْ ارْكَابِي **** بَالصَّلاَةْ عَلَى احْمَدْ قُطْبْ القْطَابْ

السَاكَنْ طِيببَة **** وَ السَّلاَمْ امْعَطَّرْ بَالطِّيبْ

جَاوَزْ عَنْ ذُنْبِي **** وَذَنْبْ كُلْ مَن يَسْمَعْ هَذَا الخِطَابْ

وَ سِيَادِي الادَبا **** لاَ تْخَلَّفْ مَنْهُمْ أدِيبْ

يَا قَابَلْ التُّوبِي **** تُوبْ وَ اغْفَرْ لرِيَّالْ يُومْ الحْسَابْ

وَ اقْبَلْ التُّوبَة **** امِينْ يَا السَّامِيعْ المُوجِيبْ

اسْمعْ خْطَابِي **** وَ انْتَبَهْ يَا اللّي تَأمَنْ فِي الصّْحَابْ

مَا بَاقِ صُحْبَة **** غِيرْ مَنْ يَنْظُرْلَكْ لَلْجِيبْ

تمت بعون الله.. يوم 29 رمضان 1439

الموافق ل...14/06/2018...محمد ريال