منتديات الشروق أونلاين

بقلمي
هدية الزواج ....لكل مقبل على الزواج

بسم الله الرحمان بديت ........ومربوح إللي عليه يتوكل
وعلى محمد سيدي صليت ......وعلى أهلو صلاتي تكمل
ياربي على الزواج نويت ......عيني بفضل وعليا سهل
(اسم المقصودة)بنت الاصل اديت.......حياتي معاها تولي عسل
شفت بعيني وبقلبي بغيت......ذي الطفلة وراني معول
نكمل ديني ونبني بيت.......واجعل حياتي بالفرح تجمل
(......)من هواك فنيت......وبالحنانة عليك مانبخل
أنا وردة من حبك تسقيت.....لبخلتيني بالمحبة نذبل
تكوني حذايا هذا إلي تمنيت......كوني امرة صبارة ماتتحيل
إذا اديتك نحلف تهنيت.......والهنا معانا يكبر ويطول

محنتني الدنيا وفيها قريت ......وعرفت عليها ماكنت نجهل
أنا في وسط الرجال تربيت......وعذاب الغربة ردني نعقل
تعذبت وكيما هفوني هفيت.......وللي صرالي في عقلي مسجل
نكذب إذا قتلك ما شقيت.......فوت محاين تشيب الطفل
وقرب النهار اللي ستنيت.......نلقى الحلالية بيها نكمل
كنتي ماكتوبي ومادريت.......والمكتوب يجي علاه نتعجل
(......)كوني كيما حبيت.....طايعتني فالرخا ويوم تتهول
(......)من العزوبية مليت.......وحياتي معاك راح تتبدل

وعلى أما تكلي ما وصيت.....رضاها رضايتي وعليك نعمل
بالمحبة لاقيني إذا وليت .......والبسمة من وجهك ماتهمل
وسا يسيني لكان جفيت........وماتزيدي الحلفة للنار كيتشعل
وربي ولادي كيما تربيت.......واحفظيني في غيابي كينرحل
والشرورة اللي منهم تكويت.....القعدة معاهم فيها مشكل

وهدرة الناس منها رشيت ....ولدرتي على هدرة تتخبل
وسر الدار احرزي مانسيت......لخرجتيه عذرك ما نقبل
وسامحيني لكان جرحتك وتعديت.....وخلي حياتنا بالمحبة تسهل
واقنعي بللي اعطيتلك وهديت......النفس الطماعة محال تمل
ودمي همي بيهم تبليت.......وللي كرهتو لداري ما يدخل
وللي حبيتو وعليه رضيت.......لجاني مرحبا وبابي يتحل

وخاوتي كبرت معاهم وتسليت.........ومن زارني منهم يتفضل
وأهلك منهم ما تنويت.........نفرح بيهم وبالورد نستقبل
هذا قولي وبحكامو قضيت........ويا(......)نبني معاك مستقبل
ياربي على الزواج نويت......عيني بفضلك وعليا سهل
باغي نتهنى راني عييت.....ودنيا بلا امرة والله تعل
وعلى محمد الهاشمي صليت......وعلى أهلو صلاتي تكتمل