سِيدِي محمد الرَّشِيدْ
سِيدِي محمد الرَّشِيدْ أمْرِي لله الوَحِيدْ الوَاحَدْ مُولاَيَا **** مَالِكْ المُلْكْ الفَرِيدْ نَشْكِيلُو ابْهَمْ هَمِّي وَ اعْلاَلْ اخْفَايَا **** لاَ غِيرُه عَالَمْ الرَّصِيدْ يَجَزِينِي مَا طْلَبْتْ يَسْمَعْ تَهْلِيلْ ادْعَايَا **** نَضْفَرْ بَالقَصْدْ وَ القَصِيدْ يَسْتَاجَبْ طَلْبَتِي وْلاَ ايْحَافِينِي بَاخْطَايَا **** نَدِّي مْنَ الكَنْزْ مَا انْرِيدْ ايْجَدَّدْ اعْبَايْتِي وْ تَصْفَالِي كُلْ امرايَا **** نَلْبَسْ ثُوبِي مَنْ اجْديدْ نَبْغِيكْ يُومْ القَبْرَ وَ الذِّيقْ اتْكُونْ امْعَايَا **** فِي دَارْ البَرْدْ وَ الجْلِيدْ سِيدِي مُحَمَّدْ الرّْشِيدْ (مطلع) اللهم صَلِّ عَلَى الحَبِيبْ ---- صَاحِبُ الجُودْ و السَّخَاء مَنْ عَنْدَكْ جَانَا الطَّبِيبْ ---- طُبْ القُلوبْ المُوَّسْخَا مُحِيطْ بْكُلْ شِئ قْرِيبْ ---- بِيهْ النّْفُوسْ امْوَبْخَا الكَنْزْ الغَالِي العَجِيبْ ---- وَ العِبَادْ سُومَةْ الرّْخَا (بيت) اللهم صَلِّ عَلَى النَّاجِيبْ طُبْ القَلْبْ وَ ادْوَايَا **** مَا دَامَتْ لاَخْرَة امْدِيدْ اصْلاَةْ اتْدُومْ لِيسْ لِيهَا مَبْدَى وَ انْهَايَا **** سِيدِي مُحَمَّدْ الرّْشِيدْ (مطلع) مُحَمَّدْ فَارْسْ الرَّحِيلْ ---- رَاحَةْ البَالْ وَ العَقَلْ عُمْلَةْ تَصْرِيفْ الجَلِيلْ ---- مُفْتَاحْ الكُلْ مَا انْقَفَلْ ذَا الرَّايَة جَاتْنَا جْمِيلْ ---- بِيهَا لَبْوَابْ تَنْتَحَلْ مَا شَبْهُه فَالوَرَى امثِيلْ ---- فِي امْقَامُه حَدْ مَا انْزَلْ (بيت) لاَ بَعْدْ وْ لاَ اسْبَقْ فَالأزَلْ حَدْ اعْطَايَا **** أسْمُه مَقْرُونْ بَالوْحِيدْ بَعْثُه رَب الكْرِيمْ رَحْمَة لِينَا وَ اعْنَايَا **** سِيدِي مُحَمَّدْ الرَّشِيدْ (مطلع) رَسْلُو المُرْتَقَبْ لِينَا ---- جَدَّدْ الأُمْتُه الثُّوبْ لاَ غِيرُه حَدْ لَذْ بِينَا ---- شِيفَا لَلْهَمْ وَ الكُرُوبْ وَ صَلاتُه حَرْزْ لَلْغُبِينَة ---- ذِكْرُه صَابُونْ لَلْقُلُوبْ نَرْكْبُو مْعَاهْ فَالسّْفِينَة ---- رَكْبَة لاَ غِيرْهَا ارْكُوبْ (بيت) مَنْ نُورُه اتْنَورَتْ نُورْ انْوَارْ الهِدَايَا **** مَا مَثْلُو حَدْ فِي العَبِيدْ ذِكْرُه لَلْمُمْنِينْ ذَخِيرَة فِي كُلْ رِوَايَة **** سِيدِي محمد الرَّشِيدْ (مطلع) نَعْرَةْ اعْنَايْتُه العَرْبِي ---- مَنْ عَزُّه عَالْمْ الغُيُوبْ اعْطَالُو كُلْ خِيرْ رَبِّي ---- رَحَّمْتُه عَلِيهَا ايْنُوبْ سُبْحَانْ الله مَا مخَبِي ---- مُولاَنَا سَاعَةْ العْقُوبْ نَبْغِي يْكُونْ سَعْدْ كَسْبِي ---- فِي يُومْ مَا يَنْفَعُه كْذُوبْ (بيت) مَا يَنْفَعْ عِلْمْ يُومْ لاَ تَنْفَعْ اقْرَايَة **** حَتَّى شئ ثَمْ مَا يْفِيدْ سِوَى مَدْحْ النَّبِي سُتْرَة لَنَا وَ اعْنَايَا ****سِيدِي محمد الرَّشِيدْ (مطلع) ارْقِي ذَاتِي وْ طُبْ قَلْبِي ---- حَبِّيتْ بَالمُصْطَفَى انْتُوبْ جُودْلِي بَادْوَاكْ يَا قَرِيبِي ---- مَنْ نَفْسِي لِرَافَعْ الحْجُوبْ مَا يَشْبَهْنِي فِي ذُنُوبِي ---- وَ لاَ مَخْلوقْ فِي العُيُوبْ بِيهَا امْعَمْرَة اكْتُوبِي ---- مَخْفِيَة ؤ ظَاهْرَة اعْجُوبْ (بيت) مَا دُوَّنْتْلُو القَلبْ يَكْتَبْ ايْتَمَّمْ ادْوَايَا **** يَصْدَا لُوكَانْ جَاء احْدِيدْ خُفِي نَرْحَلْ وْ مَا عْمَلْتُه نَجْبَرْ اشْقَايَا **** سِيدِي مُحمَّد الرّشِيدْ (مطلع) خُوَّفْنِي سُوء فَعْلِي ---- مَا عَنْدِي مَا انْعِيدْ لِيكْ سِوَى عَلِيكْ دَرْتْ تَكْلِي ---- يَا مُحَمَّدْ انْسَالْ فِيكْ يُومْ يَرْخَسْ كُلْ غَالِي ---- يَدِّي بْيَدَّكْ تْشَدْ فِيكْ اتْثَبَّتْنِي مَعَ اسْوَالِي ---- مَا خَابْ اللِّي ظَنْ فِيكْ (بيت) تَحْظَرْلِي فِي القَبَرْ تَعْرَفْ شَرْ ابْلاَيَا **** كَأنِي فِي نْهَار عِيد نَبْغِي كِيفْ العَرُوسْ ثَمْ ايْكُونْ القَايَا **** سِيدِي مُحَمَّدْ الرَّشِيد (مطلع) حَنْ يَا خِيرْ الهِدَايَا ---- شُوفْ الحَالِي وْ غِيثْنِي شَمْتَتْ الغُرُورْ بِيَا ---- وَ الوَقْتْ كِالسِّيفْ قَاسْنِي مَاذَا جَنِيتْ كَمْ سِيَّا ---- ابْلِيسْ الرَّاجِيمْ هَدَنِي رَاحْ الصُّغْرْ فِي ابْرِيَا ---- وَ الكُبْرْ اليُومْ لَظْنِي (بيت) الشَّيْطَانْ وَ الهَوَى وَ النَّفْسْ اشْرَارْ اعْدَايَا **** فِي شَعْبَة ابْنَاوْلِي امْكِيدْ سِوَى تَكْلِي عْلِيكْ دَايَرْ رُكْحِي وَ ارْجَايَا ****سِيدِي مُمَمَّدْ الرَّشِيد (مطلع) المَكْتُوبْ فِي الزَّمَانْ يَبْقَى ---- مَرْصُومْ فِي الصّْحُوفْ وَارَدْ مَا تَنْفَعْ يُومْ ذَا اللِّيقَا ---- مَا دَارْ يَلْقَا كُلْ عَابَدْ مَنْ دَارْ الشَّرْ بِهْ يشْقَى ---- وْ مَنْ دَارْ الخِيرْ بِهْ يَسْعَدْ مَاذَا قَدَّمْتْ بَاشْ نَلْقَا ---- وَ إلاَّ ازْرَعْتْ بَاش نَحْصَدْ (بيت) سِوَى مَدْحَكْ ثَمْ تَتْحَرَّرْ بِهْ اعْضَايَا **** مَنْ حَرْ النَّارْ وَ الصَّهِيدْ وَ اهْنَايَا غِيثْ بِهْ نَطْفِي نَارْ شُوقْ اهْوَايَا **** نَتْوَنَّسْ بِهْ يَا السِيدْ بَاخْيَارْ اهْلْ البَقَى نَسْقِي مَشْمُومْ الغَايَا **** نَطْوِي بَالحَمْدْ ذَا القَصِيدْ يَجْعَلْهَا فِي ادْخَالْ ذَاتِي شَرْبِي وَ اغْذَايَا **** فِي قَلْبِي طَعْمْهَا لَذِيذْ قَنْدُوزْ بْغِيرْ شِيخْ مَا تَسْجَا لِيهْ اسْجَايَا **** مَنْ نَفْسُه الذَاتُه ابْعِيدْ مَعْرُوفْ سِي مُصْطْفَى كُثْرِي قُطْبْ لُولاَيَا **** بَن تَكُّوكْ فَارْسْ الوَكِيدْ حَجَّاجْ يَطْرَزْ فِي اظْرَافَة يَهْدِي اهْدَايَا **** وْ يَطْعَمْ النَّاسْ بَالتَّرِيدْ سَعْدِي مَجَّدْتْ فِي قُوَافِي وَ امْدَحْتْ بَغْنَايَا **** يَاقُوتَة غِيرْهَا حْدِيدْ نَبْغِيكْ يُومْ القَبَرْ وَ الذِيقْ اتْكُونْ امْعَايَا **** فِي دَارْ البَرْدْ وَ الجَلِيدْ سِيدِي مُحَمَّدْ الرَّشِيدْ تمت بعون الله . الشاعر عبد النَّاصَر حَجَّاجْ . |
الساعة الآن 05:57 PM. |
Powered by vBulletin
قوانين المنتدى