يا الغنجة يا بنت العاصمة....قصتي معاك شحال قديمة ....رحتي بلا ما قلتيلي حتي كليمة....جودي عليا بالوصال...انا من حبك طال سقامي... بغيتك تصفي ذاك القلب...نجيب لميمة...نكتبو لكتاب... و تكوني حلالي.

2


بلادي ممو عينيا نحبك مهما بخلتي عليا

ما نخلي البراني يهدر عليك ولا عدو يدنى ليك

بغاو الحساد يخربولي فيك بعد ما تنهدتي و تنحات العقدة علينا و عليك

بصح كاين ربي العالي الفوقاني سبحانه وكيلهم

ياخذ الحق لينا و ليك

3


خالد يا خالد انت كنز الدنيا كي عرجون التمر لي يشوفك مايمل ويبقاغير يتامل هدا غير في التمر مبالك تبينلهم من حنانتك لي كي لعسل ربي يحفضكم وي بقي عليك الستر.

4


طلّت مـن التـاقـة .. بانت شوشتها .. بيوضتها غلبت جلدتها ..

قلتلهم واش يصبر قلبي على محبتها ؟؟

الفال: افرحي يا العدرا .. و ربي يهنيك .. راني نوصيك .. عمرك ما تنساي لي يبغيك

5


الدار قدام الدار .. و التاقة قدام التاقة .. و القلوب تـوَّاقـــة .. يا عباد الله .. ما أحلى القلوب كي تتلاقى .. لحبيبي راني مشتاقة ..

الفال : ربي يطفي الجمرة .. و يلاقيك بـحــبــيـــك في الستـرة ..

6


الناس طبايع

فيهم وديع و طايع

و فيهم وضيع و ضايع

إذا دخلت للبير طول بالك

و إذا دخلت لسوق النساء رد بالك

إلّلي فاتك بالزين فوتو بالنظافة

ولي فاتك بالفهامة فوتو بالظرافة

القمح ازرعو و الريح يجيب غبارو

و القلب الا كان مهموم الوجه يعطيك اخبارو

و للي راح برضايتو ما يرجع غير برضايتي

ولا تلبس حاجة موش قدك

و لا على حاجة فارغة تندب حظّك

و ما يحكلك غير ظفرك

وما يبكيلك غير شفرك

7


يا يما .. يا بابا .. راني رايـحــة نقـطـع البحـور .. و ما تـزيـدوا تشوفوني .. و إذا جـيـتــو تحبوني .. بحبيبي زوجوني .. هكذا نتهنى .. و تهنوني ..

الفال : ما عندك وين تروحي .. دارك .. ترفد هبالك !!

8


سبحـان من صـورك .. و خـلّاك فتنة للنـاس .. ما ولـدوك في البهجـة .. ولا مراكش .. ولا فاس .. فاتحة على خدك سبع حباس .. ورد و ياسمين وقرنفل وباس .. ديتي كامل السّر واش خليتي للناس ؟؟

9


فال يا فلفال يا فاتح سبع قفال ... اجبرلي سعدي مهما كان .. من الشرق و لا من الغرب ولا من الشمال .. وقولو لَـلِّي ضاق صبرو يشد في حبال الرجا .. و علاش يتنكد .. يتكل على الله ياك ربي العالي ما يضيع حد ..

الفال : يـا رب ارض عـنـا و رضـيـنــا .. و افـتـحـلـنــا بـيـبــان الخـيــر ..

10


زغرتوا وفرحوا يا جيراني...

حبيبي لي راح جا اليوم وداني...

أنتوما حبيتو تفرقو بيناتنا ربي وكيلكم يا عدياني...

والله ما نسمح فيه ياك أنا بغيتو وهو بغاني...

11


بالنيّه يفتح الزهر...و أيامنا مدفيه....الي جوزتو معاك مرّ....نذو بو بالشويه...و نفو تو حياتنا سكر...غير أنا و انتيا ...بالحب و طول العمر ...تحلى العشريه...يصفى الليل بشعاع الفجر ...يا النجمة القطبيه...برضاك الربيع ينور ....يا الوردة العكريه....

متجدد
12

طلّت مـن التـاقـة .. بانت شوشتها .. بيوضتها غلبت جلدتها ..

قلتلهم واش يصبر قلبي على محبتها ؟؟

الفال: افرحي يا العدرا .. و ربي يهنيك .. راني نوصيك .. عمرك ما تنساي لي يبغيك