منتديات الشروق أونلاين - ولدي ياولدي معزّك عليّ

منتديات الشروق أونلاين (http://montada.echoroukonline.com/index.php)

- منتدى الشعر الملحون (http://montada.echoroukonline.com/forumdisplay.php?f=65)

- - ولدي ياولدي معزّك عليّ (http://montada.echoroukonline.com/showthread.php?t=202969)

ولدي ياولدي معزّك عليّ

اهداء الى أمّهات شهداء انفجار الاقامة الجامعية تلمسان

ولدي ياولدي معزّك عليّ ......حميتك من حرّ الشّمس الذّهبية
دفيتك من برد اللّيالي....غطّيتك برموش عنيا
حرستك من الجرف العالي....مدّيتلك جسور يدّيا
بعدتك عنّي بلعاني......قلت الرّجلة بالشّدة ماشي بالحنية
رحت بعيد والزّمان طواني...وقلت يارب احرسو أنت أحن علي
كبدي نار والشوق كواني...رحت نعدّ ليام المطوية
بسوايعها الثقال والثّواني...قلت قريب يرجع حبيبي ليّ
طالب العلم عزيز وغالي ...تستغفرلو الحيتان في البحور المنسية
بيبانو مفتوحة وطريقو نوراني....تحرسو عين الله وجناحات الملايكة محنية
ولدي نجيب فاهم ارفع شاني...بين النسا جلستي مضوية
سافر بعيد ماتغرّبش على وطاني...مع اخوّتو قسرتهم كل عشية
ولدي ياولدي معزّك عليّ......وهاذي سابقة سبقت ليّ
قلبي مقبوض والنّوم جفاني...ماني عارفة واش اصرا ليّ
قلتلو ياولدي ارجع راني .....مريضة وحتّى دوا مانفع فيّ
قالّي:يا ماّ راني قريب أترجايني...نطلب أرضاك ودعيوة تبرّد عليّ
قلتلو:روح يرضى عليك الله يا عياني...ويحفظك من كل بليّة

وجا الخبر من بعدالأذاّن الثاني...وليدك مات شهيد هاد قدر الله في البرية
قتلوهم :جيبوه..زفّوه ليّ....نكحل عياّني بشوفتو وبلاك تبرد الكيّة

ياربي راني حامدة وصابرة عساني...نلقاه في الجنّة العلويّة
ياربي تقبلو شهيد وخاوتوا ثاني ....واجعلهم من حور العين سبعين حورية
ولا تفتنّي فيه وعلى ديني توفّاني...واحفظنا من شر الفتن الظّاهرة والمخفية

ولدي ياولدي معزّك عليّ ...وفي سبيل اللّه والوطن تهون كل بليّة