منتديات الشروق أونلاين - قصيدة "" بــريــكــة ""

بـــــــــريـــــــــــــكــــــــــــــة

بـريـكـة فالصيل راي حضنية ** ناسها معروفين بالكرم و الجود
عند الغيارة قالو هزية ** و الغيرة اترجع مولاها حسود
لمليح والحاير في كل ناحية ** ذا حال الدنيا قسمها المعبود
الولاية لوراس ماهي مخفية ** بـريـكـة بلاد الخيل موطن البارود
نقدملك تعريف مني هدية ** ونحكيلك واقع كاين اوموجد
مبرك الجمل هذي تسمية ** في حرب التحرير كي صمدت صمود
اقرى على عزيل اورد اعليا ** الـبـريـكـي واش دار في ذوك اليهود
القذافي وش قال في ذيك المحكية** بـريـكـة كي ضنات جابت الأسود
في حمل الأثقال لينا أقوية ** تاريخنا معروف فالخارج مشهود
اولادها موجودين في كل اثنية ** الـبـريـكـي تلقاه في كل الحدود
معروفين بالنيف مانا ذمية ** منحطوش الراس اوديما مرفود
اولاد سحنون رجال سال الحمدية ** و فسرلي معنى النجع او لحشود
الغالط معانا يدفع لخطية ** ايسلكها غالي وفهم المقصود
طـبـنـة في التاريخ ماهي منسية ** حتى ممدوكال فالقصة معدود
ارجع للتاريخ قصة حيزية ** بداها بالجزار للمتكعوك عود
حرايز و مهاميل ردوها حية ** مينقصنا شي اوكلش موجود
وسحاري بيطام سكنو البادية ** حتى النعجة صيل لفلاحة مردود
التربية و الدين اضنات الخذرية ** بـريـكـة بلاد الصيل و الزين المقدود
عبد الله فالدين جاب الأتقية ولاد ** لخضرة و غانم الضرافة و الذود
اولاد عبد الرحمان ولاد العمرية ** ميرة وشريفة من جد الجدود
ولاد عيسى و صمامت قالو اذكية ** وولاد امحمد السحنون ازنود
شلاهنة ولاد عمار فيهم النية ** دقاقشة ولاد سالم هامولاد مسعود
سحاميد وعيضات ناس المالية ** ضحاوي وقشايش والدخان بعود
قوادر وزميرات ماهم حيلية ** وحيي بـريـكـة متخليلي رود
سلالحة في لحديد ليه خصية ** وفي طريق الجزار منقوصك موجود
حيي لي الموتى وجميع الأولية ** كامل السكان مشيخ للمزيود
اونكار الصيل فالعرف اولية ** والدالية كيفاش تنكر العنقود
تستاهل بلادي مدرت مزية ** اولد الصيل ميكونش جحود
هذي بريكة يا سامع ليا ** و هذا بنها البار قدم المنشود
الصادق غربي يمدح بالنية ** اويفتح في طريق للناظر مسدود
و هذا الجواب مني تحية ** و تحيا بـريـكـة ملحد الحدود
نبقيك على خير ونطلى فيا ** وطلبلي التوفيق من عند المعبود

هذه قصيدة تحكي عن نسب و حسب مدينة بريكة و سكانها حيث تعتبر بطاقة تعريف لمدينة بريكة وعروشها .
ديوان الشعر الملحون : المواهب المكنونة في القصائد الملحونة ( أزيد من مائة قصيدة و قصيدة ) الشاعر الصادق غربي القصيدة رقم 39 ص 85 دار النجاح للكتاب والتوزيع برج الكيفان 2012 .

بتصرف : جعيل أسامة الطيب . بريكة .