|
قصة راجية رحمة ربهآ ..
بسم الله الرحمن الرحيم السلام عليكم ورحمة الله و بركاته وبدأت الحكاية من رمضان اللي فات مش اللي فات ده لا اللي قبله بصراحة عمري فى حياتى ما فكرت فى النقاب حتى اللى لابسينه ما كنتش اعرف لابسينه ليه لحد ما كنت قاعدة انا و صاحبتى فى الجامعة ما شاء الله كان فى منتقبات كتيير قلت لها ايه رايك فى النقاب قالت لى النقاب فرض بصراحة استغربت اوى فرض ازاى ده في ناس كتير اوى مش لابسينه قالت لى ايوه فرض حتى اسمعى الايه دى "يا أيها النبي قل لأزواجك وبناتك ونساء المؤمنين يدنين عليهن من جلابيبهن ذلك أدنى أن يعرفن فلا يؤذين" (سورة الأحزاب 59:33). قعدت بقى تشرحها ليا وان الجلباب يستر المرأة من رأسها حتى قدميها فما بالك بقى و احنا فى عصر الفتن فكرت فى الموضوع قلت لازم اقول لماما انى عاوزة البس النقاب قلت لها و طبعا كانت صدمة بالنسبة لها فى الاول وافقت على طول بس بصراحة انا من جوايا كنت متردده و سبحان الله ماما ر فضت تانى يوم و قالت لى مش هتلبسيه و شيليه من دماغك راجية رحمة ربها ، منتدى أحلى حياة في طآعة الله |
رد: قصة راجية رحمة ربهآ ..
و بعدين رحت الجامعة و كنت ماشية مع واحدة منتقبة كنت اول مره اقابلها كانت صديقة صاحبتى المهم الكلام جاب بعضه و فتحنا سيرة النقاب قالت لى على فكره اول ما تلبسي النقاب هتحسي قد ايه انت قربتي من ربنا بجد الكلمة دى اثرت فيا اوى قلتلها انا عاوزة البسه بس ماما مش موافقة قالت لى العيب فيكي انتي قلتلها ازاى يعنى قالت لى يعنى لازم انتي تكونى صادقة بجد قعدت افكر قلت كلامها صح انا لو كنت عاوزاه بجد كنت حاربت الدنيا كلها عشان البسه فتحت الموضوع تانى مع ماما وافقت و قالت لى روحى اعملى اللى انت عاوزاه بصراحة الشيطان ما سابنيش و حسيت بشوية تردد ماما رجعت فى كلامها تاني قلت لها طيب ايه رايك ناخد راي خالاتي لو وافقوا هلبسه ماما و افقت قالت لى ماشي و فتحت الموضوع معاهم و منهم اللي قال اللي مش لابسين نقاب دول هيدخلوا النار ؟ وقالوا كمان مش هتشتغلوا قلنا لهم مفيش حد بياخد رزق حد قالوا امال فين الاخذ بالاسباب وطبعا ده غير كرههم للمنتقبات بسبب المواقف اللي بتحصل من بعضهم ده اللي في السعوديه مابتصدق تخرج من السعودية عشان تقلعه قالوا لنا حسنوا من نفسكوا اكتر وبعدين البسوه يعني قوموا صلوا قيام ليل مش عارفين ان الله لا يكلف نفسا الا وسعها وقالولنا ده تشدد ولبسكم كده محترم احنا الحمد لله كنا لابسين الخمار بس الواحد حاسس انه نفسه يعمل حاجة احسن والمحاولات مع ماما كلها فاشله ومش عارفة اقنعها ازاي لما آجي اقنعهم مش بعرف وبحس ان انا بتردد مع ان وجهة نظرهم غير مقنعة بالمرة وعلي فكرة لو قلت لهم انه جاء في القرآن وانه فرض يقولوا الشيوخ اختلفوا في تفسير الايات اللي بتدل علي كده و فى الاخر برده رفضوا |
رد: قصة راجية رحمة ربهآ ..
و سبحان الله كانه كان اختبار ليا ربنا بيختبرنى هل انا فعلا مقتنعة بالنقاب و لا مترددة فيه قلت لصاحبتى على اللى حصل قالت لى لازم انتى تكونى صادقة من جواك قلت ياه دي حاجة صعبة لازم اكون صادقة 100 فى 100 حاولت اجدد نيتى و اقرأ اكتر عن النقاب و فعلا قريت كتير اوى على المنتدى قلت افتح الموضوع الاول فتحته معاها الموضوع قلت لها يا ماما انا عاوزة البس النقاب قالت لى مش هتلبسيه طول ما انا عايشة قعدت الح عليه طيب مش عاوزانا نلبسه ليه عاوزة تكونى عاملة زى العفريته بعد كده ما كانتش بترد عليا و قعدت اعيط و اضربت عن الطعام وكمان اخويا فى الاول كان معارض الفكرة قلت له مانت عارف اللي بيحصل قعد يفكر كده وقال خليهم يلبسوه يا ماما فماما اقتنعت قالت خلاص البسوه قلت لها احنا هنشتريه بكره الكلام ده كان بالليل بصراحة طول الليل الشيطان ما سابنيش حاسة بشوية تردد قلت مش مشكلة هلبسه وممكن بعد كده احبه صحيت الصبح سبحاااااااااان الله ماما رجعت فى كلامها تلنى قعدت اعيط لها و قلت لها طيب ليه كده انتى كنتى موافقة امبارح قالت لى هو كده و مش هرجع فى كلامي تاني ومش هتلبسوه طول ما انا عايشه بصراحة ما كنتش عارفة سبب الرفض بس حسيت فعلا ان ربنا لم يجد فى قلبى الصدق رحت الكليه و حكيت اللى حصل لصديقتى المقربة قالت لى اصبري لعل الله مش مقدرة لك دلوقتى و كل شىء باوان و قلت لواحدة صاحبتى هاتى لى نقاب لعل ماما توافق و فعلا جابت لى النقاب بس بصراحة ما عرفتش ماما انى معايا النقاب بس برضه كانت ماما مصره على الرفض برضه قعدت اعيط و انهارت جدا فى الاخر رجعت لصحبتى النقاب قلت خلاص ما فيش فايده |
رد: قصة راجية رحمة ربهآ ..
صليت استخارة كتيير اوي كنت بدعى كتيير بس بدعى و خلاص الاسم انى بدعى السنة عدت و شلت النقاب من دماغى اختى قالت لى مالك انتى شيلتى النقاب من دماغك قلت لها بصراحة اترددت فيه خلص انقلبت 180 درجة مش عارة ايه اللى حصل لى بس بصراحة كل ما اشيله من دماغى احس بالذنب مش عارفة ليه كل ما اتردد الاقى اللى يرجعنى تانى و اجازة الصيف خلاص هتخلص قلت لازم اخد قراري قعدت ادعى كتيييييييير بس دعائى المرة دي بيقين وكنت اصلى ركعتين فى قيام الليل و ادعو و الح فى الدعاء كان عندى يقين غريب اوى ان ربنا هيستجيب ليا جه الوقت عشان نشترى لبس الجامعة انا قلت فى نفسى هى دى الفرصة فتحت الموضوع تانى بس برضه ماما ر فضت و سبحان الله كل ما نحدد يوم نجيب فيه اللبس حاجة تحصل قلت سبحان الله ربنا بيسبب الاسباب ساعتها تيقنت ان ربنا هيرزقنا النقاب |
رد: قصة راجية رحمة ربهآ ..
ازاى ؟ مش عارفة ممكن تكون حاجة عمرها ما تيجى فى بالى حددنا يوم تانى سبحان الله قبلها بيوم رجلى اتخبطت جامد قوى ما كنت قادرة امشى ماما قالت لنا مش هتشتروا اللبس قلت لها مش هقدر امشى المهم قدر الله ان نذهب عند جدتى سبحان الله لقيت خالتو بتقول انا عاوزة البس النقاب قلت ياه هى دي الفرصه نفتح فيها الموضوع ساعتها بجد كنت صادقة النية و سبحان الله المرة دى ما كنتش مترددة خالص سبحان مقلب القلوب صحيح جدتى ما وفقتش ان خالتو تلبسه بس جات بالنفع علينا وبعدين ماما قالت لو خالتو لبسته البسوه وفعلا ماما وافقت وجات معانا نشتريه رحت الجامعة بالنقاب و كنت مبسو طة اوى فى بنات قالت لى ايه اللى انت عاملتيه فى نفسك ده بصراحة كانوا بيقولوا كده و انا اقعد اضحك مش عارفة ليه :) بس فى بنات فرحت قوي قالوا لي مبارك عليك ربنا يثبتك كنت بفرح قوى بالدعوات دى بجد والله اهم حاجه الدعاء و الثقة فى الله لا تنسوا الدعاء لاختنا المشتاقة للنقاب ان يرزقها الله لبس النقاب اللهم ارزق بنات المسلمين لبس النقاب اللهم ثبت قلوبنا على دينك اسفة طولت عليكوا |
Re: قصة راجية رحمة ربهآ ..
|
| الساعة الآن 01:59 AM. |
Powered by vBulletin
قوانين المنتدى