|
الشخشوخة
السلام عليكم ورحمة الله وبركاته رايحين نرجعوا للتقليدي وهاذي المرة انا اخترت نقدم لكم الشخشوخة او المفرمسة او الفطير كما يسميه البعض على طريقتي يللا اترككم مع الطريقة نحتاج سميد ناعم يعني مغربل حطي الكمية اللي تحبي + ملح + قطرات خل باه يخليها متماسكة وما تتقطعش نبلل كل شيء بالماء الدافء ثم نعجنها بالبترا او اليدين نكورها قد حبات المندرين ونغطيهم بكيس ونخليهم يرتاحوا نص ساعة ندهن الصينية بالزيت ونقرصها متوسطة ثم نبدا نكسل فيها من الوسط الى جميع الاتجاهات حتى تصبح شفافة نحملها برفق ونطهيها فوق طاجين الحديد على نار ضعيفة جدااا نقلبها بحيث تكون الحواشي في الوسط باه ينشفو وهكذا نكمل حتى ننهي جميع الكريات نحطهم فوق بعض ونغطيهم بمنديل لاحظوا كانها اوراق ديول كلها بيضاء وشفافة نلفها على بعضها ونقصها بالمقص شرائط نحلهم عند التقديم ما تفوروهاش لانها شفافة ورقيقة تمتص البخار وتزيد تسقوها تتعجن حطوا الكمية المراد تقديمها في صيبنية وسخنوها في الفرن بالنسبة للمرق عادي نحتاج حبة بصل كبيرة فلفل حار حسب الرغبة +قطع دجاج +كمشة حمص + ثوم وشحم مداوي +طماطم مصبرة وهريسة واكيد زيت ملح وتوابل نقلي البصل والثوم والدجاج والملح والزيت والتوابل مليح ثم نضيف الطماطم والهريسة والحمص ونمرق ونغلق الكوكوت ولازم المرق يكون خاثر بالنسبة للفلفل انا فورتوا وبعد ما طابت المرقة اضفت الفلفل عند التقديم نحط الشخشوخة ونضع فوقها قطع الدهان ثم الدجاج والحمص والمرق وتقدم شهية طيبة |
رد: الشخشوخة
أممممممممممممممممممم
تشهي اعطيك الصحة |
رد: الشخشوخة
سلمت يداك يا غالية
شهّيتينا :11: |
رد: الشخشوخة
رووعة
بارك الله فيك |
رد: الشخشوخة
السلام عليكم ورحمة الله وبركاته
مذهلة ... نحن نسميها النعمة اما الشخشوخة فهي شخشوخة الضفر بوركت طاطا ام رامي |
رد: الشخشوخة
جربتها وخرجت بنييييييييييينة يعطيك الصحة و الف شكر
|
رد: الشخشوخة
احلى شخشوخة جربتها بطريقتك روعة روعة روعة مع اني اول مرة نديرها لكن الطريقة ناجحة 100% شكرا يا معلمة
|
| الساعة الآن 05:59 AM. |
Powered by vBulletin
قوانين المنتدى