منتديات الشروق أونلاين - ***رسالة تضامن***

******************رسالة تضامن*********************

البارح اناقلبي سال دمعو *** ذاخبر مشوم هزلي اعرافي
وخواطري جملة راهم تولعو *** نطلب في ربي الهم يشافي
هزو ايديكم يالحباب وادعو *** يشفى كلمغبون يولي متعافي
صاحبو دعاكم حين تركعو *** بين السجدة ولخرى ملايكة توافي
راه فيلحين للعالي يطلعو *** ويقبلها من مول القلب الصافي
العبد الخيري للخير يطوعو *** و يعدلو طريقو المولى الوافي
كلها دخلاني يشكي وجعو *** منغير المخلوق ليقلبو كافي
وكاين ليضعيف عينيه تفرعو *** بدموع كلما فيجسدو متلافي
وحداني ريح المحبة لسعو *** وعشى مسكين قفرة فيافي
كاين ليربي علوالدين قطعو *** وتعرى حليلو من ثوب الدافي
وكاين ليخبر مشوم فجعو *** وعماو عينيه ولى نورو طافي
وكاين ليزمان علحبيب ردعو *** مزيلف الكبدة مقسومة بنصافي
وكاين ليربي ملمكايد منعو *** بيه طاعة الوالدين راه متكافي
كاين ليصابر لشدايد يوساعو *** وكاين ليشكي قال ثقلو اكتافي
ربي يجازي كل منهو طاعو *** ولي يحمدو لابد الخير يوافي
ياربي مالنا فيلدنيا ومتاعو *** حالنا معلوم عندك ماهو خافي
الخير يحصدو ليلبارح زرعو *** وليدير الشينة زرعو راه متلافي
تشفي المغبون وتطير وجاعو *** ذاعبدك ياربي لطاعتك ماهو منافي
تصحصح عضادو ويهز ذراعو *** ذا طلبي ياالمولى هزيتلك كفافي
بحاه الركع والصبيان ليرضعو *** وبجاه كل محتاج عريان وحافي
وبجاه سيد الامة وشفاعو *** صلى الله عليه قد معذر وعطافي
كاتب لقوال فيلحزة ذاصنعو *** وقال ذيلقصة راها كوات دفدافي
مول القلب الطيب ذاطبعو *** ويبلغ لكم السلام الحاج زفزافي

الله يشافي كل مغبون انشاءالله....واهديها لكل اعضاء المنتدى احبابي اخواني واخواتي...

شرح بعض الكلمات
متلافي=فاسد
قفرة فيافي=صحراء قاحلة
بنصافي=الة حديد قاطعة
متكافي= له جزاءه
منافي= ابتعد عنها
معذر وعطافي=الاراضي الشاسعة
دفدافي= جسدي...بدني