منتديات الشروق أونلاين - نحكيلك يا بنتي سابع حكاية/ ماضلا رداح ما ضلا رداح لوكان ما الشيب لاح والفم طاح

منتديات الشروق أونلاين (http://montada.echoroukonline.com/index.php)

- منتدى الشعبيات (http://montada.echoroukonline.com/forumdisplay.php?f=297)

نحكيلك يا بنتي سابع حكاية/ ماضلا رداح ما ضلا رداح لوكان ما الشيب لاح والفم طاح

http://store1.up-00.com/2015-06/1435503035071.jpg

http://store1.up-00.com/2015-06/1435503035212.jpg

قالك ما قالك على هداك السلطان - لا سلطان الا الله - كان كل مرة يتزوج بمرا وما يرزقوش ربي بالولاد حتى عرف أنو العيب منو ومش في نساه، قام اعتزل الجميع حتى زوجاتو واعتكف في غرفة من القصر تاعو، وعاد دايما يدعي في ربي ويبكي ويقولو يا ربي ارزقني لي يحمل اسمي في هاد الدنيا، لهداك النهار صلى ودعا ربي وغفا، في هاديك اللحظة لي غفا فيها شاف في الحلم روحو عطشان عطشان وما قدرش ينوض كل ما يجي ينوض ما يقدرش، بقى ينادي على الخدم تاعو واحد ما جاوبوهش ويزيد ينادي على زوجاتو وحدة ما تجاوبو كي حس بروحو راح يموت بالعطش جاتو وحد الوصيفة صغيرة من وصيفاتو جابتلو كاس تاع ماء وراحت انصرفت هو جا يمد يدو للكاس تاع الما وهو اختفى ، والمنام فاق بيه .
ناض من النوم مفزوع نادى على الخدم تاعو قاللهم شوفولي في البلاد احسن مفسر للاحلام، راحو جابولو مفسر حكالو المنامة تاعو قالو المفسر بلي لازمك تتزوج بالوصيفة لي جابتلك الما هي الوحيدة لي تقدر تجيب منها ولد يحمل اسمك وانو الولد هدا راح يكون عندو شان كبير بصح راح يضيع منك ويلحقو بيه متاعب كبيرة في حياتو .
بقى السلطان حيران واش يدير يتزوج من الوصيفة ويجيب ولد حتى ولو كان راح يعيش في الحزن والشقاء، ولا يبقى عاقر ويموت وما يخلفش ذرية !
ايا نادى للمدبر تاعو قالو تدبر ما يصير ولا راسك يطير ! قالو مسكين ما يكون غير الخير ، قالوا السلطان قولي واش ندير نتزوج بوصيفتي ونخلف ولد يضيع من بين يدي ويعيش حياة شقية ، ولا نبقى على حالي ونموت ويتنسى اسمي في الدنيا ؟
قالوا يا مولاي شقا الدنيا عقبا والعقبا للرجال ، اتزوج وجيب وليدك وخليه يعيشها كيما كان الحال .
قام السلطان تزوج بوصيفتو لي شافها في المنام ، وبعد اشهر صدق تفسير المفسر و جاب منها ولد زي فلقة القمر كبر في عزو ودلالو وزاد بهاه وحلا في النظر، ايا بنالو قبة كبيرة حيطانها من الجوهر والاحجار الكريمة وسقفها من الزجاج ، كي عاد عمرو اربع سنين جابلو العلماء لهاديك القبة عادو يعلموه فيها وقرر بلي ما يخرجوش خلاص برا القصر وما لازمش يشوف تراب الارض ولا يخالط العباد العاديين، ايا ترعرع هداك الولد مع العلماء وزاد جابلو لي يعلمو الفروسية تاني في ساحة القصر حتى كبر وعاد عالم تبارك الله عليه علم وخلق وزادو الحظا بها وهيبة .
مشات الهدرة من الخدم تاعو وخرجت للناس وتناقلو خبارو قالك السلطان عندو ابنو كبر عاد راجل يزعزع الجبل من بهاه ومخبيه علينا قالك السلطان عاد عندو ابنو عالم العلماء ما بغاناش نشوفوه، والفضول ديما يحكم النسا كتر من الرجال ايا قالك تفاهمو عدد من النساء تاع هاديك البلدة فيما بيناتهم وقالوا ماناش حنا لكان ما خرجناش ولد السلطان وشفناه . حكمو راحو لوحد العجوز شمطاء يقولوها " الستوت " قالولها نعطيولك المال وخرجينا ولد السلطان نشوفوه لازم ديريلنا حيلة وتخرجيهونا ايا شرطت عليهم القدر تاع المال لي حابة عطاوهولها وراحت لبست كل شيء اخضر الفولارة تاع راسها خضرا الجلابة خضرا وصبغت العصا بالاخضر وراحت قاصدة قصر السلطان ..

وهنا طلع الصباح والديك صاح وسكتت الجدة اماني عن الكلام المباح

يتبع