منتديات الشروق أونلاين - هايارَبي صَلْحْ الْحْوالْ***/من تأليفي

أسْمْ الغَني الْكْرِيمْ فَالْ *** نِعْمْ الْقِيومْ فِيهْ دَ رْتْ إتِكالي
سُبْحانَهُ ذُو الْجَلالْ *** يَشْرَحْلي صَدْري نَفْقَهْ اقَوَالي
بِيه التُوفيقْ في كل حال *** ثُمّ الصّلاةْ على الزّكي نُورْ انْجاليي
مُحَمَدْ سَيْدْ الْفْضَالْ *** صَلّى الله عْليهْ خَاتَمْ الأرْسَالي
يا رَبي صَلّحْ االحْوالْ *** واْعْفو عن ما عْصِتْ وامْحَقْ زْلالي
يا رَبِي صَلّحْ الْحْوال *
بَسْمْ الله فَالْ دَرْتْها لمَا نَنْشَدْ *** و الصّلاةْ على الهاشْمي سيّدْ لَسْيادْ
ما دَامْنِي في الحْياةْ نَمْدَحْ محمد*** حتى تَفْنَى الرُوحْ و انْعاشَر لَلْحادْ
طَهَ المَكّي االشّرِيفْ ما كِفو سِيّدْ *** أخْتَارُه الله لَمْتُه شَفَعْ نَقّاذْ
أهْديني لْصالْحْ االعْمَالْ *** وْنُوّرْ لِيَ االطّرِيقْ في سَايَرْاعْمَالي
و انَالْ ما نالْتْ الْفْضالْ *** يَسّرْلي يا كْرِيمْ و من يَسْغالي
يا رَبّي صَلّحْ الحُوالْ *
يَسّرْ يا خالْقي بْحَقْ الصّالِحينْ *** اللّي باعُو الفانْية في طَاعَةْ الرّحْمَانْ
تَرْكوها خَلْفْهُمْ و مَسْكو في الدّينْ *** تابْعِينْ طْرِيقْ من يَشْفَع في العُصْيانْ
وَ انا ما نَفّلْتْ وَالُو بْرَكّعْتِنْ *** وَ لاَ مَرّة صُمْتْ يَوْمْ بْلا رَمْضَانْ
وَالمُلَىى ما خْفاهْ حَالْ*** يَعْلَمْ ما جْهَرْتْ بِيهْ وَ ما في ادْخَالي
و النّفْسْ اهْوَلْها اهْوَالْ *** تَائْمَرْ بَالسّوؤ زَيْنَتْلِي المُحَالِي
يا رَبّي صَلّحْ الحُوال*
النَفْسْ الخَايْبَة تَهْوَى المَعَاصِي *** من يَتْبَعْها تْغَرْقُه يَوْمْ القِصَاصْ
أعُذو مَنْها بِربْ الناسِ*** و من شَرّ الوَسْواسْ الخَنّاسْ
لا تْمَكَنْها يا الخَالَقْ لَنْفاسي *** لُوْمَا لَطفَكْ يَعَمْنا ما كان خْلَاصْ
في يوم شْدايَدْ الهُوالْ *** أسئلْتَكْ يا الله تْرْفَقْ بْحالي
جَاوَزْ عن ذَنْبي ثْقالْ *** يا ذَالْحِي الجَلِيلْ اقْبَلْ سؤالي
يا ربي صَلّحْ الحُوالْ *
لو ما لَطْفْ الجَليل ما يَنْجَىى مُذنِبْ *** يوم انْ يْكُونْ فيه المِيزَانْ مَنْصُوبْ
في نْهارْ عْظِيم الخَلايَقْ تَتْحاسَبْ *** خَمْسِينْ ألفْ عام ما فيهاشْ غْرُوبْ
الشّمسْ فُوقْ الرُؤوس حُمّانْها يَلْهَبْ*** من شَدّةْ حَرْ صَهْدْها لَجْسادْ تْذوبْ
وَالخَلْقْ اوْقُوفْ لَلْقْبالْ *** واحَدْ كْتابو على اليَمِينْ و لاخَرْ شْمالي
يَومْ انْ لا يْفيدْ فيه مال *** ارْجَيا فيكْ توبْ و اعْفُو يا عَالي
يا رَبي صَلّحْ الحْوالْ *
اسْئَالْتَكْ يا من هُو عَالَمْ بَلْخَافي*** ثَبّتْ قَلْبِي ما نْرا رُعْبْ وْلا خُوفْ
عُفْوَكْ يا من هُو بَالعَفْوْ تْكَافي*** أُمَةْ لَسْلَمْ غيثْها يا ذالرّؤوف
سَبْحانَكْ لا إله إلا انْتَ تْعَافي*** تَعْلَمْ ما في الكْنانْ خَافي والمَكْشُوفْ
اعْصينا و شْيانْتْ الفْعَلْ*** ما فينا حَدْ رَاهْ بَضْمِرُه سألي
وَ صْبَحْ حْرَامْنَا حْلال*** وَانْقَلَبْ الدَّهْرْ صارْ فُوقِي لَسْفَالِي
يا رَبِي صَلْحْ الحْوال*
أنْقَلَبْ الدَّهْرْ وَ الزَّمَانْ لْعَبْ بينا *** وْ المارَدْ قادنا من ظَعْفْ الإمانْ
لا رُجُولَة بْقَاتْ لا نَخْوَة فينا *** بَالْجُمْلَة عاصْيِينْ شِيّابْ وَ شُبّانْ
غِيرْ من تَلْقاه شَادْ الخُوهْ ضْغِينَة *** وَ اْنْتَشَرْ البَغْضْ بِينْنا وكَثْرَتْ لَفْتَانْ
مَا بْقَاتْ بَرَاكَة فْمالْ *** لا قِيمَة لَلنّفِسْ أرْخَسْ الغالي
ما بْقَا فَي اسْواقْنا رْجالْ *** لا صَدْقْ وَ لا وْفَا فْذَ الزّمانْ التالي
يا ربِي صلّحْ الحُووال ***

لا قيمة لَلْكَبير قَعْدَتْ لا حُرْمَة *** لا رَئْفَة بَالصّغيرْ وَ لا قَلْبْ رْحيمْ
ما بْقَى مِيثَاقْ لا عَاهَدْ لا كَلْمَة *** إلاّ ما ارْحَمْ رَبْنا الحي الرّاحيمْ
النِّسَاء بْنَصْ اللّباسْ يَمْشُو لا حَشْمة*** وَ االرّاجَل دايْرْ المْنَقَشْ كي الحَريمْ
هَاكْذا و قَالُو حْنا الرِّجالْ*** الدّاني مَرْفُوعْ وَ الشَّهْمْ اصْبَح تَالِي
وَ انْخَفْضَتْ قيمَتْ الفْضَالْ *** سَامَحْنِي إذا خْطِيتْ يا من تَسْغالي
يا ربي صَلّح الحُوالْ *
أسْأ لْتَكْ يا الله يا خَالَقْ الأعْمارْ*** يا من لا يَخْفَى عْلِيكْ أمْرْ من الأُمُرْ
ألْطَفْ بَلْمُمْنِينْ جُمْلَة يا غَفَّارْ*** و اهْدِينا للصّلاحْ بِجَاهْ المَبْرُورْ
لا تْحَافينا بْذَنْبْ يا مَاحِي الأوْزارْ*** ضُوِّي نُورْ القْلُوبْ اللِّي في الصُّودُورْ
بَالْهَادي سَيّْد البْطالْ *** ابُوبَكْرْ عُمَرْ عُثْمانْ و علي
و التّابِعينْ بَالْكْمالْ *** وَالْكُورْسِيي والقَلَمْ والعَرْشْ العالي
يا رَبِي صَلّحْ الحْوال *
اسْأ لْتَكْ يا إلَهْ بَمْلايَكْ عَرْشَكْ*** وَ اللأنْبِياء وَ الأرْسَالْ يا ذالمَليكْ
جَاوَزْ عَلْمُبْتَلَي و انْقَذْ عْبيدَكْ *** وَارْحَمْ المُمْنين في هَذِه وْ هَاذيكْ
يوماً لا ييْكُونْ فيه ضَلْ إلاَ ضَلَكْ*** يا غُوْثْ المُسْتَغيثْ دَرْتْ رْجايا فيكْ
ثَبّتْني في ليلْتْ السُؤال *** قُدامْ المَلاكين نَفْصَحْ أقْوالي
في لِيلَة رَعبْها هْوَالْ *** كي تَحْظَرْ العْمال توقَفْ قْبالي
يا ربي صَلّحْ الحْوالْ *
يا من بِمَا خْفِيتْ عالَمْ وْ دَارِي *** جِيتَكْ بَالْهاشمِي البَاشِرْ النَاذِيرْ
يَوْمْ يْكونْ الحِسابْ قايمْ يا باري *** أنْظَرْ لْضَعْفِي و سامَحْ يا قَدِيرْ
اغْفَرْ لَلْوالْدِينْ و الأوْلاَدْ و جَاري *** و أُمَةْ لَسْلامْ نَجِّها من السَّعِيرْ
نَشْهَرْ في نْهايْتْ المَقالْ *** أسْمي لَلْعارْفينْ تَرْتيبْ أشْغَالي
ريال ميمينْ حاء و دَال *** واسْلامِي بَالمَسْكْ وعْطَرْ وغوالي
لْأرْبابْ الْفَن و الزّْجالْ *** هَامَتْهَمْ كَالطّودْ الشَامَخْ عالي
قيمَة ما حْجَبْها حْيال *** يَقُوتَة فُو قْ تاجْ مَلِيكْ تْلالِي
يا ربِي صَلْحْ الح *** و اعْفو عن ما عْصِتْ و امْحقْ ازْلالي
يا ربي صَلّحْ الحُوال

تمت بعون الله و فضله
تاليف محمد ريال.