منتديات الشروق أونلاين - قَمْرْ اللّيلْ

قَمْرْ اللّيلْ.. منقول ..

قَمْرْ اللِّيل خْوَاطْرِي تَتْوَنَّسْ بِيهْ ** نَلْقَى فِيهْ أوْصَافْ يَرْضَاهُمْ بَالِي

يَا طَالَبْ عَنْدِي خْلِيلَة لِيهْ شْبِيهْ ** مَنْ مَرْغُوبِي فِيهْ سَهْرِي يَحْلاَلِي

انْبَاتْ انقَسَّمْ فِي اللِّيالِي نَنْظَرْ لَيهْ ** يَفْرَقْنِي عَنُّه الحَذَارْ التَّالِي

خَايَفْ لاَ بَعْضْ االسَّحَابَاتْ تْغَطِّيهْ** إذا غَابْ ضْيَاهْ يَتْغِيّرْ حَالِي

يَا سَايَلْ عَنْ خَاطْرِي وَاشْ امْسَهِيهْ** اللِّي جْلَى قَلْبِي جَالِي

يَا تَهْوَاسِي خَاطْرِي وَاشْ ايْنَسِّيهْ ** وِينْ الطُّبْ اللِّي يْنَاسَبْ لَعْلألِي

ضُرْ مْعَاشَرْ كَبَّدْتِي وَ انَا خَافِيهْ ** صَابَرْ لَلْحَمَّة شْدِيدَة مَا ذَا لي

هَذَا المَرْسَمْ كَانَتْ الخَدَّاعَة فِيهْ ** مَسْبُوغتْ لَنْجَالْ خَلَّاتُو خَالِي

يَا مَهْبَلْنِي جَيتْ لَلْمَرْسَمْ نَشْكِيهْ ** مَا جَاوَبْنِي مَا سْمَعْ لْسُؤالِي

مَرْسَمْ وَلْفِي كي خْلاَ وعْعَلاَهْ انْجِيهْ ** نَتْفَكّرْ مَا فَاتْ يَثْقَبْ مَشْعاي

يَا مَرْسُولِي سَرْ بَجْوَابِي تَدِّيهْ ** يَمْكَن بْيَدْ الظَّرِيفة وَ عْنَالَي

هَاتْ اخبَارَ الخِيرِ لِنَا كُونْ نْبِيه ** و المَارَة اللِّي بِينْنَا وَ رِّهَالي

سَالْ عْلَى مَحبُوبْ قَلبِي سَال عِليه ** سَالْ عْلِيهَا سَالْ شَطَّانْتْ حَالِي

قُولْ لْهاَ وَعْلاَهْ مَحْبُوبَكْ تَنْسيهْ ** غَايْضَانَا شَكيـت مَا كِيشْ تْسَالي
وَ نْشَرْتِ ثُوبْ المَحَبَّة وَ طْوِيتِيهْ ** وَاهْ جْدِيدْ مْحَبَتَكْ يَرْجَعْ بَالِي

قَدَّاشْ مَن مَرْسُولْ ليا شَقِّيتِيهَ ** كَرْهٌوكْ الحُسَّاد بُغَضْ عْلى جَا لي

جَرّعْتِيلِي مُرْ مَا كُنْتَشْ نَشْتِيهْ ** ذُقْتْ انْوَاعْ الحُبْ مَنْ دُونْ اجْيَالي

ابْعِينْ كِي نُوْعَدْ المَرْسَمْ نَخْطِيهْ ** يَتْغلّبْ مَنَّي المِيزْ و يَغْدَى لِي

يَتْفَكَرْ قَلْبِي زْمَانْ كُنَا فِيهْ ** سَتْرُونَا لِيَامْ و الوَقْتْ مْوَالي

يَاكْ حْلَفْتِلِي يْمِينْ و وَفِّتِيهْ ** قلْتِ لِي مَازَالْ تَشْتاَقْ خْيَالِي

صَحْ مْنَامَك بَالْوْفَا كِيمَا شَفْتِيهْ ** تَفْسِيرُه مَا بِينَنَا ظَاهَرْ جَالِي

أنْتِ شَفْتِ ذَا المَنَامْ و فَرِّتِيهْ ** وَ اعْلَمْتِ بَالْجَايَّة قُلْتِهَا لي

يَا عَالِي القُدْرَة البَالِينِي تَبْلِيهْ ** وَ اجْعَلْ حَالُه في المَحَبّة كِي حَالِي

أتْزَيْلَفْ قَلْبْ الحَبِيبَة وْ تَكْوِيهْ ** وَ تْثَقَّبْ مَشْعَالْها كِي مَشْعَالِي

اتْدِيرُه شَطْرِينْ على النَّصْ تْسُوِّيهْ** قَسْمَة تَدّيهَا قَسْمَة تَبْقَىى لي

بَاشْ تْشُوفْ الحُبْ وَ تْلُوحْ مْوَلِيهْ** تَعْرَفْ قَدْرْ اللّي صْبَرْ كِيمَا حَالِي

حُبَّكْ عَنّي جَارْ مَا طَقْتَشْ نَخْفِيهْ ** مَنْ نُوَّايَةْ خَاطْرِي هَذا حَالِي

تَمَّتْ بِتُوفِيقْ مِنَ الله.نَقَلْهَا كَمَا وَرَدَةْ إلَيْنَا والله أعْلَمْ بِالصَّوَابْ

قَصِيدَة رَائعَة لِشّيخْ عَبْدُ االله بَنْ كَرِّيوْ.

رَحِمَهُ الله ..عَاشْ فِي القَرْنْ العَشْرِينْ م.