منتديات الشروق أونلاين

*بُوجَملِينْ*

يَا عَاشْقِينْ كِيفْ اعْمَالِي *** رَانِي افْنِيتْ وَ الضّرْ اسْكَنْ لَدْخَالْ

نَدِيتْ يَا حْنِينْ اسْغى لِي *** يَا مُوَنَّسْ الغَرِيبْ فِي الوْطَا و جْبَالْ

رَبِّي اعْطَاكْ قَدْرَكْ عَالِي *** تَنْدَهْ بِيكْ لَلْغِيثْ نْسَاء وَ رْجَالْ

خَفَّفْ لِيعْتِي و اهْوَالِي *** أنَا غْرِيبْ جِيتَكْ وَ بَغِيتْ انَّالْ

جَاهْ الكَرِيمْ شُوفْ لْحَالِي *** لاَ تْخَلِّي القُلُوبْ علِييَا تَكْحَالْ

اعْزَمْ بَالدّْوَا لَعْلاَلِي *** يَا غُوثْ كُلْ مَلْهُوفْ طُبْ المَعْلالْ

لَلَّهْ فِيدْني يَا وَالِي *** بُو جَمْلِينْ رَانِي جِيتَكْ سُوَّالْ

لَلَّهْ فِيدْنِي يَا وَالِي ***

بُوجَمْلِينْ جِيتَكْ زَايَرْ *** فَاجِي كُرْبَتِي وَ اضْرَارِي

هَوْلِي كْثِيرْ مَانِي قَادَرْ *** وَسْطْ الدَّلِيلْ لَهْبَتْ نَارِي

الفَكْرْ طَاشْ صُرْتْ امْحَيَّرْ *** وَ الشّوقْ هَزْ لُبْ افْكَارِي

ضُوِّي الطَّرِيقْ لِيَا تَظْهَرْ *** وَ اجْلِي الظَّلاَمْ عَنْ تَفْكَارِي

بْلاَ سُؤَالْ شوفْ لْحَالِي *** فَانِي مْنَ الجَفَا مَتْهَرَّسْ مَعْلاَلْ

وَ الهَوَى صْعِيبْ رَادْ قْتَالِي *** بَجْيُوشْ صَاقْلِي وَ عْصَاكَرْ غَلْغَالْ

وَ اهْزَمْ سُلْطَانْ ادْخَالِي *** بْقِيتْ غِيرْ جُثَّة وَاقَفْ خْيَالْ

لَلَّهْ فِيدْنِي يَا وَالِي *** بُوجَمْلِينْ رَانِي جَيتَكْ سُوَّالْ

لَلَّهْ فِيدْنِي يَا وألِي ***

ابْقِيتْ غِيرْ جُثة وَاقَفْ *** بَارُو الحِيَالْ دِيرْ امْزِيَة

يَا شِيخْ جِيتْ لِيكْ اتْصَرَّفْ *** اعْزَمْ بَالعْلأجْ لْدَايَا

حَنَّنْ قَلْبْ وَرْدَة يَعْطَفْ *** اللِّي مْشَاتْ وَ بْلاَ سِيَا

خَلاَّتْنِي هْمِيمْ مْصَادَفْ *** وْبْلاَ وْدَاعْ سَمْحَتْ فِيَا

انْوِيتْ فِيكْ دَرْتْ أمَالِي *** بْجَاهْ هِيبْتَكْ يَا بُو زُوجْ جْمَالْ

وَ بْجَاهْ مَنْ جَعْلَكْ وَالِي *** رَضِّي الجَافْيَة مَسْبُوغَةْ لَنْجَالْ

مَنْ وَحْشْهَا كْثَرْ تَهْوَلِي *** الصَّبْرْ ظَاعْ مَنِّي وَ جْفَاهَا طَالْ

للّهْ فِيدْنِي يَا وَالِي *** بُو جَمْلِينْ رَانِي جِيتَكْ سٌوَّالْ

للهْ فِيدْنِي يَا وَالِي ***

وَحْشْهَا اخْذَا صَبْرِي مَنِّي *** وَ العِينْ بَاكْيَة صَهْرَانَا

نِيرَانْ فِي ادْخَالِي تَسْنِي *** وَ القَلْبْ مَا اقْدَرْ يَتْهَنّا

دَمْعِي عْلَى الخُدُودْ افْضَحْنِي*** نَرْجَى افْضَايْلَكْ تَجْمَعْنَا

انْدَهْتْ بِيكْ قُولْتْ تَنْجَدْنِي *** فِيك الرّجَا اعْطَفْ عَالْمُوضْنَى

مَنْ حَالْتِي اقْرَا سُؤالِي *** حَالِي نْحِيلْ يَنْبِي عَنِ السُؤالْ

حَالَتْ الغَرِيبْ مَالُو وَالِي *** لاَ أهْلْ لاَ اوْنِيسْ لاَ مَنْ عَنِي سَاالْ

وَإذَا اشْتَكِيتْ مَنْ يَسْغَى لِي *** دُونَكْ غِيرْ رَبِّي يَعْلَمْ لَحْوَالْ

للهْ فِيدْنِي يَا والِي *** بُوجَمْلِينْ رَانِي جِيتَكْ سُوَّالْ

للهْ فِيدْنِي يَا وَالِي ***

لُو صَبْتْ مَنْ ايْجِيبْ خْبَرْهَا *** انْكُونْ لُو اخْدِيمْ انْطِيعُو

وَلْفِي مَنْ شَاعْ بْهَاهَا *** وَرْدْ اللِّقَاحْ شَاوْ رْبِيعُو

الغُصْنْ غَارْ مَنْ طَلْعَتْهَا *** سُبْحَانْ مَنْ انْشَاهْ وصَنْعُو

عَنْدْهَا اسْرَارْ فِي اوَصَايَفْهَا *** الزِّينْ وَ الأخْلاَقْ أنْجَمْعُوا

حُسْنْهَا البَدِيعْ زَادْ هْبَالِي *** زِينْهَا فِي جِيلْنَا ظَرْبُو بِيهْ امْثَالْ

مَلَاكْ مِنَ الجْنَانْ العَالِي *** مَثْلُو فَرِيدْ مَا لَمْحَاتُو لَنْجَالْ

وَ انَا انْكُوَاتْ بِيهْ ادْخَالِي *** مَصْهُودْ مَنْ هْوَاهَا جَمْرِي شَعَّالْ

للهْ فِيدْنِي يَا وَالِي *** بُو جَمْلِينْ رَانِي جِيتَكْ سُوَّالْ

للهْ فِيدْنِي يَا وَالِي ***

نِيرَانْ فِي ادْخَالِي لَهْبَتْ *** وَ العَقْلْ طَارْ شُورْ الجَافِي

خَلاَّتْنِي عَلِيلْ وْ راحَتْ *** بَعْدْ الوَفَاء اتْرُومْ خْلاَفِي

أعْطَاتْنِي العَاهَدْ وْ خَانَتْ *** وَ انَا كَانْ حُبِّي صَافِي

نَهْدِيلْكْ هْدِيَّة إذَا رَجْعَتْ *** رَانِي عَلى العَاهَدْ وَافِي

تَمِّيتْ يَا الفْقِيهْ اقْوَالِي *** و اسْمِي انْبَينُو يَا فَاهَمْ لَقْوَالْ

يَدْرِيهْ كًلْ مَنْ يَسْغَالِي *** اسْمْ السَّعِيدْ بُويَا وَ الجَدْ رِيَّالْ

مَنْ أهْلِ الكَرَمْ رْجَالِي *** مْعَمْرِينْ كُلْ مِيدَانْ أسُودْ ابْطَالْ

مَا تَلْقَاشْ فِيهُمْ تَالِي *** مْعَ الَحَقْ يُوقْفُو ضَدْ االظُّلْمْ رْجَالْ

للهْ فِيدْنِي يَا وَالِي *** سِيدِي الفَقِيهْ رَانِي جِيتَكْ سُوَّالْ

لَلهْ فِيدْنِي يَا وَالِي ***

*تَمّتْ بِعَوْنْ الله*

*مُحَمَّدْ رِيَّالْ*