منتديات الشروق أونلاين - تْبَدّلْ الزَّمَانْ

تْبَدّلْ الزَّمَانْ

اتْبَدّلْ الزَّمَانْ وَ المَعَالَمْ رَاحُوا **** وَ ثَارَتْ رِيَاحْ هَايْجَة غْزَاتْ البِطَاحْ

وَ تْلَوَّثْ المَكَانْ بِمَنْ لاَ يَصَّلْحُوا **** العُكْلِي وَ السَّفِيهْ دَخْلُوا لَلْمُرْكَاحْ

مَا يَحَّشْمُوا مَا يخَافُوا يَنْفَضْحُوا **** يَا خُويَا وَ ايْقَابْلُوا اوْجُوهْهُمْ صْحَاحْ

غِيرْ أمَسْ كَانُو بَهَايَمْ يَصَرْحُوا **** وَلَّو لَنَا اليُومْ عُلاَمَا فُصَّاحْ

لاَ مَعْنَة فِي كْلاَمْهُمْ غِيرْ إيصِيحُوا **** لاَ رِسَالَة يْبَلْغُوهَا تْجِيبْ صْلاَحْ

ولاَّوْ ايْفَسْرُوا القَصِيدْ ويَشَّرْحُوا **** مَا جَابُوا فِي حْيَاتْهُمْ كَلْمَتِينْ صْحَاحْ

مَنْ لاَلُو عِيلْمْ عْلاَهْ يْدَخَّلْ رُوحُه **** مَا يَدْخُلْ فِي حَرْبْ جُنْدْ بِغِيرْ سْلاَحْ

مَا جَاهُمْ عِيبْ فْسَادْهُمْ غِيرْ يَدّحُوا **** اصْوَاتْهُمْ نَهِيقْ وَ الألْفَاظْ قْبَاحْ

الجَايَحْ بَالذُّبَابْ مْعَمَّرْ جَبْحُه **** وَ احْسَبْ عَنْدُه عْلُومْ تْعَجّزْ الشُّرَّحْ

مَا مَيّزْ مَا خْجَلْ يَفْخُرْ بْقُبْحُه **** وْ يَلْفَظْ فِي كْلاَمْ تَهْرِيجْ وْ صِيّاحْ

يَنْهَقْ نَهْقْ الدّوَابْ و يَلْعَنْ رُوحُه **** وَ يْقطَّعْ في ثْيَابُه حُمْقْ و تَجْيَاحْ

كِي ظَهْرُو ذَالطُّبُوعْ لَشْياخ انْزاحُو**** يَتْعَذْبُوا بالسُّكَاتْ عَالوَقْتْ اللِّي رَاحْ

اغْدَرْهُمْ الزَّمَانْ كَصَّرْهُمْ طَاحُوا **** وَ سَابْ المِدَان لَلْحَثَايَلْ وَ الجِيَّاحْ

اهْلْ البِدْعَة اليُومْ هُمْ اللِّي نَجْحُوا **** وَ اهْبَطْ مَنْ كَانْ لِيهْ هِيبَة وْ شَانُه طَاحْ

انْسَاوْ اللِّي كْلاَمْهُمْ لَوْ تَشَّرْحُه **** تْذُوقْ بْوَذْنِيكْ طَعْمْ عْسَلْ لَجْبَاحْ

خَلْفُوهُمْ ذَالقْرُودْ يَبْغُوا يَشَّطْحُوا **** مَا عَرْفُوا لَلْكَلَامْ مَعْنَة لَا تُوْضَاحْ

نَفْرُوا مَنْ لَشْيَاخْ في نَظْمْهُمْ سَمْحُوا**** قَالُوا عَدَّا زْمَانْهُمْ وَ غْناهُمْ رَاححْ

الغُرِّي دِيمَا يْعَادِي اللِّي نَصْحُه **** مَعْمِي بَالْغُرُورْ مَا يَسْمَعْ نَصَّاحْ

مَنْ لَا قْرَاوْ عَلَى مْشَايَخْ مَا فَلْحُوا **** ومَنْ لاَ لُو سَاسْ مْحَصْنُه بُنْيَانُه طَاحْ

مَا لْهُمْ مَعْنَة كِي الوْجَاقْ إذَا نَبْحُوا **** شَبّْهُوا فَرْخْ الغُرابْ لَلطِّيرْ الصّدَاح

و غَاشِيهُمْ فَارْحِينْ فِيهُمْ يَمَّدْحُوا **** حَاسْبِينْ الوَرْدْ يَنْبَتْ عْلَى الصَّفَاحْ

المِدانْ كِي الجْرَادْ اغْزَاوَهْ نَزْحُوا **** لاَ أدَبْ لاَ نِظَامْ وَ لاَ افْعَالْ مْلاَحْ

لَبُدْ ايْجِي انْارْهُمْ وْ يَنْبَطْحُوا **** اوْجُوهْ الكَشْفَة لَزْمَلْهُمْ لِنْبِيطأحْ

يَتَّرْكُوا المَكانْ لَلِّي يَصَلْحُوا **** لَاغْنَا يَنْظَفْ مَنْ بْلاَهُمْ رَاهُو فَاحْ

فِي ذَالْحَيَاةْ كُلْ وَقْتْ عَنْدُه صُلاَّحُه **** وَ حْنَا فِي وَقْتْنَا مْشَايخْنَا صُلاَّحْ

نَظْمْ..مُحَمَّدْ سَعِيدْ رِيَّالْ