منتديات الشروق أونلاين

حيرنا ذالزمان و أصعاب التفكير **** تغيرت قاع شوايرو وتبدل ميزانو
يا خويا ارواح تشوف واش يصير **** وسع بالك وكون صابر لمحانو
ما تتعجب و لا تتقلق وعلاش اتحير **** و لا تتفاجأ في لحباب الا خانو
و الجاهل صاحب الصهوة و التسيير**** و لوصاف البايخة قاع فيه ازيانو
دارو لو الحكمة عاد مول التدبير**** عالي قدرو راه اتقوى سلطانو
و مول الجهل سيدوه ارجع لكبير**** أهل الفتنة و انفاق رفدولو شانو
العالم تهموه بالفشل و سباب التأخير**** دارو فيه اعيوب عوجة و شيانو
واه العلم اليوم عمرو راه اقصير **** خسارة حتموه باه يهجر أوطانو
افسد اطبعو يا الخو... ابسوء التدبير**** صبحت فوضى لا من هو في مكانو
شوف الباطل... ركبوه على لبعير**** و اما الحق... اسخسرو فيه احصانو
وما الظلم من العمى ارجع بصير**** شهدوا قاع بالزور و بضي اعيانو
ويح اللي مظلوم حاير واش ادير**** و صبرو للقيوم... على جهل عديانو
و الغاني يا خاوتي ماحس بالفقير**** و المكسي كيفاش يحس ابعريانو؟
امفرش قفطان في نعمة و احرير**** وسط اقصور امشيدة علا بنيانو
ما يقنع بقليل مالو طامع في الكثير**** ما يشبع هيهات... مالي كيسانو
ازوالي مكتوم و متفرش لحصير**** و صابر للشداة القاسية مع صبيانو
راضي بالمكتوب من عند القدير**** مول الحكمة رادها ربي سبحانو
متهني قانع ابعيشو خير من الأمير**** و زاهد في دنيتو حاضي فدانو
هاذي دنيا فانية ما عندك ما ادير**** ذا اتعمرلو و ذاك أتيبس بستانو
الدنيا دالات سعدك يا من دار الخير****و اسعى دعوة خير باه يثمر اجنانو
راح العاهد راحت الضنة و التوقير****وين الحشمة والحيا؟ ذلخصايل مابانو
أهجرنا عاداتنا ابضحكة و اتمسخير****كل واحد نافر من أهلو و جيرانو
حيدنا على طريق الحق و التنوير****و العبد اتقوى بالضعف و قل ايمانو
شوف السوء أفعالنا شح التقطير****و لازم عالفرد يتوب و ينعل شيطانو
يا عظيم الجاه يا عالي يا قدير****لا تحرمنا الغيث و أمطار امزانو
من غيرك يا خالقي ما لينا نصير****تهدي ذالمحروم و اتضاعف احسانو
تصلح لو في الراي أبجاه البشير****و تستر ولدو من إبليس و عوانو
نطلب ربي في قضاه ادير التيسير****بعد العسرة راه يفرج لينا باحنانو
نتوسل لك بما اخلقت قمحة واشعير****و يا ما احياو أرواح و شبعو جيعانو
هون يا ربي علا من هو فالتعسير****و سع عنو راه في ضيق اكفانو
فرج على الأمة ماليهاش انعير****بجاه الأنبيا و الرسل عنك ما هانو

تمت بقلمي chawki dz