|
أحصد غلتك و هند في المنجل =* بقلمي *=
أتمنى أن تنال اعجابكم و رضاكم و لا تبخلوا علينا بالردود و التشجيعات أحصد غلتك و هند في المنجل....واسحذر بلاك لعقوبة تشيان لاتقصب لاتقول الحال يطول....وما تدي غير الكاتبة يا فلان ها...بلاك تريد تقفز و اتعول....دير الخير كون حاضي للفدان لا تتسرع بالحماقة راك اتزل....كون رزين واثقل في الميزان مول الصابة على خيراتو يسبل....ما يقضبشي ما يجي زعفان ذوركة زرعك طاب هاهو قسل....وبعد الخضرة لحصادو يزيان تتفكر عمرك تلقى نص اكمل....ويلا دار الحال شاور للعوان وانظر للخيال في القبلة خمل....زود في عوينك للسفر يمتان سابق للخيرات اطريقك تسهل....لا تقسى في سيرتك لا تليان ميز للحطوط و اعرف كي تنزل....من بعد الرحلة خمم للمكان لا تتعلى لا تجي في لأسفل....واتماهل لا تجي وسط الكيفان ما تنزل فالواد يخدع ويحمل....ولا تسصغرشي التالي فالوديان لا تامن لبحر عندك يتهول....اتهمدن لصفاوتو و دير الآمان وبلاك من الابل و منها لفحل....ويلا قشك قاديرو فالحسبان نعتو نعت الذيب يجي يسهتل....وفي رمشة وحدة يقيس النيبان أفهم معنايا و لحديثي كيل....لا تكونش نعجة وسط الخرفان دير القدرك شان لا تتذلل....كون عفيف طاهر لا طمعان الطامع فالرب عليه يعول....مول القدرة هو مول الشان لا تصاعر للناس ليهم لاتجهل....ياك الرازق حي سبحان الديان اعمل الدنياك امقيم وراحل....واحرص الأخراك مسافر مالآن لا تاخذ لراي التالف جاهل....وحرز دينك كي تتخلط لك لديان تبقى في ظلمة تايه تتململ....ما تعرف روحك صاحي لا سكران رافق عالم نحرير باين مهلهل....صاحب حكمة نايرة في القرآن امنور كي ثرية منين ايطل....وينصح بالمعقول في حق الرحمان مانلوم ازمانا و نقول اتبدل....هذا هو وقتنا من بكري للآن ابنادم هو الجاهل يتحول....غير في الفطرة و تبع الشيطان الناظر لفعالنا يلقها تخبل....و الصاغي لقوالنا مملوءة ايمان فرطنا فالفايدة وتركناها ترحل....وشدينا فالراذلة و تهنا فالعصيان والداني فينا يفتي و يسهل....ها بلاك اتكذبو وتقولو غلطان لاتاخذنا يالله بسافه مايعمل....وسهل لينا انعاونوه بالهديان راني نطلب فيك يامن لايغفل....احفظ ذالأمة حالتها تزيان ياربي ياخالقي دعوتنا تقبل....شافي كل مريض فالصحة تعبان بجاه النابي مصطفى لفحل....و قدما مدحوه السور في القرآن بجاه اصلاح ولنبيا و ارسل....ننده بيهم كاملين يكونو عوان تهدي كل عاصي فينا و امدهول....و من هو شارد تايه فالنسيان ترحمنا بامطور الرحمة واتبل....كل ما هو جاف فالبرور وعطشان تحمل بالخيرات الصحرا و التل....و تنور لفجوج بربيع و آمان اروينا بمزون فيها الخير اكمل....بالبراكة التامة تعمر ذي لوطان سلك يا ربي هاذ الغزل اخبل....مايفكو فكاك من غيرك ياحنان نتوسلك بالمحمود فينا ماتبهدل....ولا اتسلط عنا جور السلطان يا خالق لكوان انتايا لول....يا عالم بالجاية هونها تهوان ارضى عن امي و بويا واعجل....افتح ليهم باب الجنة الريحان وسع ليهم فالقبر زيد وكسل....و اعطيهم قد ماشافت لعيان لا اتبهدلهم يا الله في ذاك المدخل....وارزقهم من كل ثمرة فالجنان تمت بقلمي chawki dz |
رد: أحصد غلتك و هند في المنجل =* بقلمي *=
أثبت مرورك أخي و قل كلمتك واترك بصمة على صفحتي بارك الله فيك
|
رد: أحصد غلتك و هند في المنجل =* بقلمي *=
راقت لي كلماتك من أول عنقود لآخره دمت في حمى الرحمن تقبل وافر أحتراماتي |
رد: أحصد غلتك و هند في المنجل =* بقلمي *=
شكرا للأخ شوقي عـلى قصيدته الشّعبية النّـونيّـة .. تبدو تحفة من الشّعـر الملحون ، فقد جمعت بين الإرشاد الديني والتحذير من شرور ومساوئ الدنيا . :16: |
رد: أحصد غلتك و هند في المنجل =* بقلمي *=
مشكورين على المرور دام قلمك و الله يعطيكم العافية
|
رد: أحصد غلتك و هند في المنجل =* بقلمي *=
أسلوبك من السهل الممتنع جامع بين الأصالة والحضارة،لا تنقطع عن امتاعنا،وبارك الله فيك.
|
رد: أحصد غلتك و هند في المنجل =* بقلمي *=
جميلة جدا هاته الابيات بورك فيك وفي قلمك
نتطلع لجديدك معنا بارك الله فيك |
رد: أحصد غلتك و هند في المنجل =* بقلمي *=
:16::16:روعة:16::16:
|
| الساعة الآن 11:06 AM. |
Powered by vBulletin
قوانين المنتدى