يا وناست خاطري خافي مولاك*\\\*رشقتي قلبي ابهجرك مقواني
نوكل ربي خالقي هو يتولاك*\\\*صعبتي عني لمعيشة بلعاني

في قلبي درتي مارة لسماك*\\\*حرفك وشمتيه من داخل و انساني
يا ما عدينا ليالي انا واياك*\\\*تحت انجوم الضاوية وقمر نوراني

وين عاهد لمحبة يا مقساك*\\\*ما فيك الضنة واتبدلتي ثاني
يا قلبي عييتني بالباطل شكاك*\\\*ويلا ماكش عازها غير اهداني

ما كاين وردة من غير اشواك*\\\*واصبر للدقات سايس بركاني
اركوب المهرات واعر آش اداك*\\\*حاذر روحك فالوطى ياجاني

لكلام الحساد لا تسمع بلاك*\\\*لا تامن حديثهم فسر لمعاني
اقهرني عفريتها ما صبت اسلاك*\\\*زيرني عنتير وحشك بكاني

ماجاني بشر وننصب لو لشراك*\\\*ماجاني بالسيف وعلم الجاني
ماعندي حكمة ونرصدلو هتاك*\\\*ماعندي حكيم يفهم روحاني

مايرضى بالمال لا قيمة تسواك*\\\*عراني برهوش ساسو تحتاني
غرامك واعر يا ختي مانتحداك*\\\*دهشني قحار ولفي عياني

اخطفتي عقلي يا مقدودة لسباك*\\\*لاتلومي مخطوف مثلي و يعاني
العاشق مغبون ديمة في لهلاك*\\\*و المعشوق ايغر بزينو واسباني

أحليل الممحون مبلي لا فكاك*\\\*امزيلف بالنار تقدي دخلاني
احلفتي قداه من مرة بركاك*\\\*لا كلمة منك لا راسل جاني

ياعياية صارحيني واش نواك*\\\*ياك مادرناش العيب ياتشطاني
ما عندك حنونتي سبة لجفاك*\\\*ولا تشفي فيا الحاسد مضاني

مانزهد في غرامك ما ننساك*\\\*ولو داروني في وسط اكفاني
تتعانق لرواح وتزهى بلقاك*\\\*تتباشر بشواير الحب الفاني

تمت بقلمي medcherif03