منتديات الشروق أونلاين - *يَا نَفْسِي تُوبِي*//القصيدة لم اكملها بعد

*يَا نَفْسِي تُوبِي*

يَا الأمَّارَا بِسُوءْ الفَعَالْ خَافِي مَنْ رَبِّي *يَا نَفْسِي تُوبِي * رَاكِي عَبِّتِيلِي مِنَ الوَزَارْ شِئ لاَ يَتْعَبَّا

وَانَا طَاوَعْتَكْ وَ اسْمَعْتْلَكْ كِي رَايِي زَغْبِي *يَا نَفْسِي تُوبِي * جَرِّيتِينِي لَلْفَعْلْ الذَّمِيمْ وَ تْرَكْتْ التُّوبَة

تَبَّعْتْ رَايَكْ وَ انْتِ خايْنَا مِنَ الكَافْ اتْدَرْبِي *يَا نَفْسِي تُوبِي * مَنْ كُثْرَتْ حْمَاقِي ثَقْتْ فِيكْ وَانْتِ لَعَّابَة

حَتَى الجُوَارَحْ امْشَاوْ مْعَاكْ فِي مَا تَطَّلْبِي *يَا نَفْسِي تُوبِي * وَقْفُوا فِي صَفَّكْ مَتْضَامْنِينْ لَبَّاوْ الرَّغْبَة

وَذْنِي تَبْغِي تَسْمَعْ لَلْكْلاَمْ فَاحَشْ فِي الغَيْبِي*يَا نَفْسِي تُوبِي * عِينِي تَبْغِي تَنْظَرْ لَلْحَرَامْ رَاهِي مَجْلُوبَة

وَ اللِّسَانْ قَاطَعْ كِلْمَنْشَارْ حَتَّى فِي احْبَابِي *يَا نَفْسِي تُوبِي * يَتْكَلَّمْ فِي عْيُوبْ النَّاسْ بُوهْتَانْ وَ غِيبَة

صَرْتْ لاَهِي بَعْيُوبْ الغِيرْ وَ انْسِيتْ عْيُوبِي*يَا نَفْسِي تُوبِي * زَيَّنْتِيلِي قُبْحْ افْعَالِي وَ انْتِ مَعْيُوبَة

الهَوَى و انْتِ و الشَّيْطَانْ تَبَّعْكُمْ قَلْبِي*يَا نَفْسِي تُوبِي * مَا قْدَرْ ايْقَاوَمْ طْرِيقْكُمْ اتْعَيِّي وَ صْعِيبَة

وَ ابْقِيتْ غِيرْ انْعَبِي وَ انْزِيدْ وَ ثْقَلَتْ ذْنُوبِي*يَا نَفْسِي تُوبِي * تَجْرِي وَرَاء المَلَذَّاتْ مَا خُفْتِ اعْقُوبَة انَا بِالله حَبِيتْ انْتُوبْ لِقَابْلْ التُوبِي*يَا نَفْسِي تُوبِي * نَتْرَكْ لَهْوْالدُّنْيَا وَالمِزَاحْ مَنْ هَذِه النُّوبَة

يَا الله قَوِّينِي عْلَى النَّفْسْ نَبْلَغْ مَرْغُوبِي*يَا نَفْسِي تُوبِي * نَتْرَكْ المَعَاصِي و انْقُومْ بَاللِّي مُوجُوبَة

رَانِي نَادَمْ عَنْ مَا فَاتْ فِي وَقْتْ اشْبُوبِي*يَا نَفْسِي تُوبِي * كَمْ مَنْ مُعْصِيَّة دَرْتْهَا وْرَاهِي مَحْسُوبَة

اشْحَالْ اجْرِيتْ فِي كُلْ جِيهْ وْ كُلْ الدُّرُبِي *يَا نَفْسِي تُوبِي*إلاَّ الطَّرِيقْ المُسْتَقِيمْ إيْجِينِي عَقْبَة

يَا مَا ضَيَّعْتْ مَنْ الوْقَاتْ في اللَّهْوْ وَ العُوبِي *يَا نَفْسِي تُوبِي*وَ انَا نَاسِي أنَّ المُوتْ لَلْعَبْدْ قْرِيبَة

انْسِيت لِيلَةْ قَبْرِي وَ اسْألْ مَلاَيْكَتْ رَبِّي* يَا نَفْسِي تُوبِي*كِي يَحْظَرْ نَاكَرْ وَانكِيرْوَانْتِ مَرْعُوبَة