منتديات الشروق أونلاين - *هَذِه الدّنْيَا الفَانْيَا*

منتديات الشروق أونلاين (http://montada.echoroukonline.com/index.php)

- منتدى الشعر الملحون (http://montada.echoroukonline.com/forumdisplay.php?f=65)

- - *هَذِه الدّنْيَا الفَانْيَا* (http://montada.echoroukonline.com/showthread.php?t=358809)

*هَذِه الدّنْيَا الفَانْيَا*

هَذِه الدُنْيَا الفَانْيَا فِيهَا حِكَايَاتْ **** وْ فِيهَا هْمُومْ كُثْرَا مَا يَنْحَمْلُوا

تَارَة شَهْدَة صَافِيَة فِيهَا نَشْوَاتْ **** وْ تَارَة حَنْضَلْ مُرْ لاَ مَنْ يقْدَرْلُه

مَا فِيهَاشْ أمَانْ تْبَدَّلْ الصِّيفَاتْ **** كَمْ مَنْ غُرِّي ابْكَى بَعْدْ انْ ضَحْكَتْلُه

مَا دَامَتْ عَلَى حَالْهَا عَنْدَهَا قَلْبَاتْ **** مَنْ زَهَّاتُه اليُومْ غَدْوَى تَخَّذْلُه

كَمْ مَنْ وَاحَدْ لاَحْتُه فِي ضُلُمَاتْ **** وْ طَفَّاتْلُه المَصْبَاحْ بَعْدْ انْ شَعْلَتْلُه

كَم مَنْ شَعْلَتْلُه الشَّمْعَة لِيهْ اضْوَاتْ **** مَتْهَنِّي فِي مْعِيشْتُه كِيفْ اهْوَالُه

وَ كَمْ مَنْ اغْنَاتُه وَ اعْطَاتُه الخَيْرَاتْ **** شَغْلاَتُه بِيهَا حَتَّى افْسَدْ حَالُه

وْ كَم مَنْ مَسْكِينْ يَتْقُوَّتْ بَالْفْتَاتْ **** حَتَّى اللُّقْمَة اليَبْسَة مَا صَحَّتْلُه

وَ الاخُرْ مِنَ الأكْلْ مْرضْ بَالتَّخْمَاتْ **** يَاكُلْ كِالْمَجْنُونْ حَتَّى شَرْقَتْلُه

وْ وَاحَدْ ابْنَى وْ عَلاَّ عِمَرَاتْ **** وَ حْدَايَقْ وَ قْصُورْ كِيمَا يَحْلاَلُه

وْ لَاخُرْ مَاهُوشْ لَاقِي وِينْ ايْبَاتْ **** وْ وَاحَدْ عَالحَرِيرْ راقَدْ ابْنَعْلُه

وَاحَدْ مَنْ يُومْ زَادْ شَاقِي حَتَّى مَاتْ **** وْ هُوَ يَجْرِي وَراء الخُبْزَة صَعْبَتْلُه

وْ الاخُرْ يْسَاعَفْ فِيهَا كِيمَا جَاتْ **** عَايَشْ بالأحْلاَمْ وَ امْرِيَّحْ بَالُه

وَلاَخُرْ عَايَشْ فِي الحَيَاةْ بِلاَ حَيَاةْ **** كَارَهْ رُوحُه وَ المَعِيشَة اسْمَاطَتْلُه

وَاحَدْ لاَ جَهْدْ لاَ قُوَّة فِي الذَّاتْ **** ايْعَدِّي فِي المَكْتُوبْ و يَسْتَنَّا اجْلُه

يَتْعَذَّبْ يَامَا اعْطَاتُه مَنْ ظَرْبَاتْ**** امْطَيْحَاتُه وْ إذَا انْوَى ايْقُومْ اتْعَاوَدْلُه

وْ وَاحَدْ عَمْرُه مَا ذَاقْ الشَّدَاتْ **** مَا يَعْرَفْ عَالحُوجْ إلاَّ مَا قَالُوا

وْ الَاخُرْ اتْرَاكْمُوا عَلِيهْ الكِيَّاتْ **** ايْعَالَجْ كِيَّة لُخْرَا تَهْدَفْلُه

وَ الاخُرْ قَصَّتُه اتْشَابَهْ الرِّوَايَاتْ **** ايْشَفْ العَدْيَانْ مَنْ مَا يَجْرَالُه

زَهَّاتُه وَ اضْوَاتْلُه مَنْ بَعْد اطْفَاتْ **** حَاوَلْ يَفْهَمْ وَاشْ صَارِي تَلْفَتْلُه

يَا دُنْيَا وَعْلاَشْ تَلْعَبِي ذْ اللَّعْبَاتْ **** وَاحَدْ مَا اتْرَكْتِيهْ هَانِي فِي حَالُه

طَلَّعْتِي الارْذَالْ عَلَى ظُهُورْ السَّدَاتْ **** وَ اشْعَلْتِي لَلْكَلْبْ الشَّمْعَة فِي ذِيلُه

اعْطِيتِي القِيمَة لِمَنْ لاَ عَرْفُوا خَصْلاتْ **** يَعَّبْدُوا فِي العَبْدْ إذَا اكْثَرْ مَالُو

عَايْشِينْ مَعَانَا وَ اقْلُوبْهُمْ أمْوَاتْ **** مَا يْغِيرُوا عَلَى عَرْضْهُمْ مَا يَخْجَالُو

نَطَّلْبْ السَّمِيعْ المُوجِيبْ الدَّعْوَاتْ **** ايْنَجِّينَا مَنْ اهْمُومْ ذالوَقْتْ وَ اهْوَلُو

وَ ارْحَمْ وَالْدِيَا و َ سَامَعْ ذا الابْيَاتْ **** وَ اغْفَرْلُو لَرِيَّالْ وَ امْحَقْ ازْلاَلُو

تمت. محمد ريال .