الغيرة الكبيرة
 

هذي وحدة حطت تصويرة بيتزا في الفيسبوك انتاعها. أختها طلبتها في الوصفة...
قاتلها: حطي 2 كيسان فرينة الكاس كيما لي شرالك خونا محمد كي دخلتي لديارك و مرتو زعفت كيعاد ما شرالهاش كيفهم + و زيدي عليهم مغرف كبيرة خميرة من هذيك لمليحة لي مرسوم فيها طباخ و فوق راسو الطاقية على خاطر علابالي بلي انت مجحاحة و تشري غير بورشرس + و 2 مغارف سكر و شوي ملح، هاني قتلك شوي برك لا تلتاي مع تيليفون و تلوحي برك + و قيس فنجان زيت ( الفناجل كيما لي شرالك بابا نهار عرسك كان منعو و ما كسروهمش ولادك ياخي شواطن و انت ما ربيتيهم ما عندك وقت تربيهم نهار كامل قاهدة تكونكتي) و 2 مغارف حليب غبرة ( علابالي ما عندكش نوضي هذاك الشحط نتاع راجلك يروح يشريلك خير من نهار كامل هو متكسل تقول عندو الماء في الركايب) + و اعجنيهم أكل في جفنة كبيرة كيما لي كانت في دار جدي و تقابضو عليها في صباح العيد حتى جاء عم بابا و فرالهم المشكل و سمحت فيها عمتي و قالت انا اصلا عندي جفنة كيفها ما عندي ما ندير بيها) + من بعد كي تتعجن غطيها بسرفيطة نظيفة و خليها تخمر
كي تخمر حطي عليها الصلصة و فرماج شيدار كيما لي داراتو بنت عمنا نزيهة في البوراك في عرس خوها كي زوج صاحبتو لي كانت تقرا معاه في الجامعة و هي ما عجبهاش الحال و فات العرس أكل و هي مشنفة.. و لوحيها تطيب
هههه هذا على قرصة بيتزا جابت العيران نتاع العايلة :) :) :) لو كان بربوشة راهي جابت عيران العرش الكل 😂 هههههه

رد: الغيرة الكبيرة
 

تبعت الوصفة كيما كتبتيها بصح ماجاتنيش بيتزا ما فهامتها مطلوعة فيداخلها محاجب نمزح معاك بصحتنا كامل تبعنا الوصفة كامل من البداية إلى النهاية

رد: الغيرة الكبيرة
 

اضحك الله سنك في الجنة
تحياتي

رد: الغيرة الكبيرة
 

هههههه باين عليهم يسكنوا في باطيمة والله تبهديلة ضرك البيتزا خرجت بطعم التبهدايل باين بنينة بزاف وتسمع بيهم دومينوز بيتزا تحاولهم باش يبيعوا الوصفة السحرية ههههههههه

رد: الغيرة الكبيرة
 

اضحك الله سنك
شكرا للمرور تحياتي