منتديات الشروق أونلاين - بسم الله واسمك

بِسْم الله وَ اسْمَكْ يا حْبِيبْ المُولَى يا تَاجْ الأُوْلِيَاء يَا خَاتَمْ الارْسَالْ

يا غُوثْ الأُمَّة المُفَضَّلَة ** صَلَّى الله عْلِيكْ يَا نُورْ انْجَالِي

نَسْتَفْتَحْ القُولْ فِي مدِيحَك وَ ثْنَاء اوْصَايْفَكْ يَا قُرَّةْ لَنْجَالْ

نَنْظَمْهَا تُحْفَة امْفَصّْلَة ** وَ كُلْ ارْجَايَا تْلِيقْ بَمْقَامَكْ العَالِي

نَمَّدْحَكْ بَالقَلْبْ و َالجُوَارَحْ فالسَّرِ وَ الجَهْرْ مَا احْيِيتْ الدَّهْرْ وَ مَا طَالْ

يَا مَنْ صَلَّى عَلِيكْ فَالعُلَى ** المُولَى وْ الَمْلاَكْ دَرْتْ مَدْحَكْ فَالِي

عَاسَى انْفُوزْ بَرْضَاكْ اتْجِيرْنِي وَ تَرْفَقْ بِيَّا لِيلَةْ قَبْرِي عَنْدْ السُّؤَالْ

بَوْجُودَكْ الخُوفْ يُنْجَلَى ** انْجَاوَبْ المَلاَكِينْ بَفْصِيحْ اقْوَالِي

يَا المَبْعُوثْ لَثَّقَلِينْ رَحْمَة يَا شْفِيعْ الخَلْقْ جِيرْنِي كِي يظْيَاقْ الحَالْ

يُومْ انْ تَكُونْ النَّفْسْ حَاصْلَة ** فِي شَدَّاةْ الذِّيقْ ارْفَقْ بِحَالِي

صَلَّى الله عَلَى شْفِيعْنَا وَ الرِّيضَا عَالْأنْصَارْ كَافَّة وَ اصْحَابُه وَ الألْ

صَلاةْ مْدِيدَة وْ طَايْلَة ** مَطْيَبْهَا فِي اللِّسَان لَذَّةْ تَحْلاَلِي

اعْتَقْنِي يَا غُوثْ كُلْ مُذْنِبْ يُومْ انْ لاَ يَفْدِي العَاصِي إبْنْ وَ لاَ مَالْ

يَا مُنْقَذْ مَنْ جَاكْ مُبْتَلَى **خُفْتْ مَن ذَنْبِي الثْقِيلْ ؤ سُؤْ افْعَلِي

يَا مَنْ خَصَّكْ الله بَالشَّفَاعَة مَنْ دُونْ الخَلْقْ كَافَةْ وَ الانْبِياء وَ الارْسَالْ

يَا مَنْ صَلاتَكْ اتْحَايَدْ البَلاَء ** لُو لاَ انْتَ مَنْ يَكُونْ سَنْدَة لأمْثَالِي

يَا مَنْ تَرْجَاكْ سَايْرْ الخَلاَيَقْ يُومْ الحِسَابْ اتْفُكْهَا مَنْ شَدَّةْ لَهْوَالْ

نَفْسِي فِي الاوْزَارْ وَاحْلَة ** ارْجَايَا فِي الله وَ فِيكْ اتْفُكْ اخْبَالِي

يُومْ وُقُوفْ الخَلْقْ يَا شْفِيعْ العُصَاةْ نَرْجَى افْضَايْلَكْ كِي تَحْظَرْ لَعْمَالْ

وَ النّْفْسْ مَرْعُوبَة وْ ذَاهْلَة ** انْظُرْ لْحَالِي النَّحِيلْ وَ لْظَعْفْ احْيَالِي

مُعْصِيَاتِي الظَّاهْرَة وْ الخَافِيَة مَنْ حَمْلَهَا كَلِّيتْ يَا الهَادِي وَ الحَمْلْ اثْقَالْ

احْمُولْهَا عَلَى لَكْتَافْ نَازْلَى ** مَنْهَا رَانِي مَرِيضْ وَ اقْوَاتْ اعْلاَلِي

صَلَّى الله عَلَى شَفِيعْنَا وَ الرِّيضَا عَالأنْصَارْ كَافَّة وَ اصْحَابُه وَ الآلْ

صَلَاةْ امْدِيدَة وْ طَايْلَة ** مَطْيَبْهَا فِي اللِّيسَانْ لَذَّةْ تَحْلاَلِي

تَعْتَقْنِي مَنْ هُولْ لَخْرَة يَا مَنْ جَاء لِيكْ البَعِيرْ هَارَبْ مَنْ الضّلاَلْ

الغُزَالَة مَرْعُوبَا وْ وَاجْلَة ** فِي يَدْ الصِّيَادْ تَشْتَكِي بَالدَّمْعْ احْمَالِي

يَا مَنْ رُوِّيتْ الجُيُوشْ مَنْ اضْمَاهَا مَاء عَذْبْ زْلاَلْ صَافِي مَنْ كَفَّكْ سَالْ

وَ الغَمَامَة جَاتَكْ مُظَلَّلَة ** فُوقْ رَاسَكْ الشَّرِيفْ دَارَتْ اظْلاَلِي

يَا مَن ْ فِي يَدَكْ الحَصَى تْكلَّمْ انْطَقْ بَالتُّوحِيدْ وَ الشَّهَادَة بَفْصِيحْ اقْوَالْ

وَ الجَدْعْ ابْكَى وَ النَاسْ ذَاهْلَة ** يُومْ انْ اتْرَكْتُه وَ اصْعَدْتْ فُوقْ مَنْبَرْ عَالِي

صَلاتَكْ هِيَ ذَخِيرْتِي وَ اعْوِينِي وَ الزَّاد للصَّفَر وُ هِيَ رَاسْ المَالْ

دُونَهَا كُلْ الاعْمَالْ بَاطْلَة ** بِجَاهَكْ نَرْجَا القَبُولْ عَنْ كُلْ ا سْألِي

اصْلاَّتَكْ هِيَ تْمَامْ فَرْحِي وَ اهْنَايَا وَ عَزْ فُخْرِي وْ رَاحَتْ البَالْ

وْ تَرْيَاقْ الْنَفْسِي الضَّالَة ** تَسْنَدْنِي يَا سْنِيدْ مَنْ لاَ لُو وَالِي

صَلَّى الله عَلَى اشْفِيعْنَا وَ الرِّضَا عَالأنْصَارْ كَافَّة وَ اصْحَابُه وَ الألْ

صَالاَةْ امْدِيدَة ؤ طَايْلَة ** مَطْيَبْهَا فِي اللِّسَانْ لَذَّةْ تَحْلاَلِي

فِي اصْلاتَكْ النَّجَاتْ وَ الشّْفَا لْمَنْ هُوَ مَثْلِي سَقِيمْ طَايَحْ فَانِي مَعْلاَلْ

وَ دْوَا لَفْكَارِي المْهُوْلَة ** يَا مَنْ حُبَّكْ سَاكَنْ مِيرْ ادْخَالِي

يَا مَنْ عَلاَّ قَدْرَكْ رَبْ لَعْبَادْ وَ اصْطَفَاكْ عَلَى الوَرَى مَا تُوجَدْ لِيكْ امْثَالْ

يَا مَنْ ابْنُورَكْ الانْوَارْ شَاعْلاَ ** وْ كُلْ مَا هُو فِي الوُجُودْ بَضْيَاكْ ايْلاَلِي

لِيمْتَا تَأذَنْلِي انْجِيكْ زَايَرْ رَانِي نَرْجَا اعْيِيتْ صَابَرْ وَ ارْجَايَا طَالْ

ؤ تصْفَى شْوَاقِي المخَبْلَة ** يَا طْبِيبْ العَلَّة الخَافِيَة فِي الإدْخَالِي

نَسْعَدْ بَالزُّورَة لْرُضْتَكْ قَطْعَة مْنَ الجَنَّة يَا سَعْدْ مَنْ شَاهَدْهَا بْالانْجَال

نَسْتَبْشَرْ وَ النّكْدْ يَنْجْلاَ ** تَبْرَدْ نَارْ الظَّمَاء ؤ سَعْدِي يَزْهَالِي

نَطْلُبُو مْنَ لاَ ايْرَدْ طَالَبْ يُوفِي قَصْدِي ايْقَرَّبْ لِيَا المِجَالْ

نَرْجَا فَضْلُو عَالِي العُلاَ ** مُولْ المُلْكْ العَظِيمْ يَقْبَلْ سؤالِي

صَلذَى الله عَلَى اشْفِيعْنَا وَ الرِّضَا عَالأنْصَارْ كَافَّة اصْحَابُو وَ الألْ

صَلاةْ امْدِيدَة ؤ طَايْلَة ** مَطْيَبْهَا فِي اللِّسَانْ لَذَّة تَحْلالِي

يُوفِي مَرْغُوبِي سَامَعْ الدُّعَاء نَبْلَغْ ارْجَايَا انفُوزْ بَالمَقْصُودْ وَ انَّالْ

كِمَا نَالَتْ قُومَانْ سَائْلَة ** ؤ ظَفْرَت بَالقَبُولْ مِنَ الله العَالِي

بَعْثَكْ نِعْمْ الكْرِيمْ رَحْمَة نُوَّرْتْ قْلُوبْ غَارْقَة فِي الكُفْر وَ الضَّلاَلْ

بِيكْ صَبْحَتْ الأُمَّة مُفَضّْلَى ** أحْسَنْ أُمَّة فِي الكُون الأوَّلْ وَ التَّالِي

يَا مَنْ نُورَكْ الكُونْ بِهْ ضَاوِي سَاطَعْ وَهَّاجْ لاَمَعْ مَا اخْفَاهْ احْيَالْ

وَ كَاذَاكْ المَخْلُقَاتْ كَامْلَة ** ابْنُورَكْ اهْتَدَاتْ يَا النُّورْ الجَالِي

يَا مَنْبَعْ الخِيرْ وَ الهَنَاء وَ افْضَالْ اكْثِيرَة عَلَى الوَرَى مَا يَفْدِيهَا مَالْ

يُومْ انْ تَفْنَا العُمْرْ وْ تُبْلَى ** كُونْ لِي سَنْدَة وْ كُلْ مَنْ اعْصَاوْ ابْحَالِي

بَصْلاَةْ المُصْطَفَىى اخْتَمْتْهَا وَ ارْجِيتْ المُولَى ايْعَدْهَا مَنْ صَالَحْ لَعْمَالْ

يَجْعَلْهَا لَلْمِيزَانْ امْثَقْلَة **بْجَاه الصَّدِيقْ ؤ عُمَرْ وَ بِذِي النُّرِينْ وَ السِيَّدْ عَلِي

جَاوَزْ عَالعُوصَات ذَنْبَهُمْ وَ امِي معَ بُويَا وْ خَاوْتِي ؤُ كَافَةْ آلْ رِيَّالْ

يُومْ انْ اتْكُونْ الجُثَّة امْقَبْلَة ** فِي اللَّحْدْ عَلَى الثَّرَاء وَ امْلاَكْ اسْوَالِي

صَلَّى الله عَلَى اشْفِيعْنَا وَ الرِّضَا عَالأنْصَارْ كَافَّة وَ اصْحَبٌه وَ الآلْ

صَلاَةْ امْدِيدَة ؤُ طَايْلَة ** مَطْيَبْهَا فِي اللِّسَانْ لَذَّةْ تَحْلاَلِي

تمت بفضلِ الله (محمد رِيَّالْ)