|
الشيخ بن المسايب
من صابمن صاب مع المليح ليلة *** والليل يكون فيه عام من صاب مع المليح فرجة *** مقيومة من كل حاجة مشاعل على كل درجة *** والكاس يدور بالمدام تراني في الحبيب نرجى *** يسقيني سابغ النيام الكاس يدور يا الفاهم *** والعود مع الرباب ينغم وكياتر يا سلام سلم *** والقانون تابع النظام القصبة واقفة تخاصم *** والكاس يصيح بالمدام الكمانجة واقفة تولول *** والطار يقول كيف نعمل ما يصفى شي إذا تخبل *** شغله يا فاهم الكلام خلي جند الملام غافل *** واجلس يا عاشق الريام اجلس يا عاشق البناوات *** تتفرج في البها الفايت بالزين على الريام فاقت *** ولفي سلطانة الريام وصفها ما دراه ناعت *** ولفي بدر من غيام من صاب مع المليح ليلة *** كيف ليال الشتا الطويلة نوريكم طرقة الخليلة *** معها مسلي يا كرام فريد قمجة بلا غليلة *** وهي مرخوفة الحزام نطقت لي بالزين كلمة *** اسمع ما ريت في المنام قلت لها آه يا فطيمة *** هذاك خير بالتمام لو كان كنت فهيمة *** ما تقضي شي بالمنام قالت مقرونة الحواجب *** ولفي هذا اشحال غايب وأنا نرجى ابن مسايب *** عن عيني حارم المنام نكار الخير والحبايب *** لعن الله ناكر الطعام من صاب مع المليح ليلة *** والليل يكون فيه عام |
رد: الشيخ بن المسايب
هاض الوحش عليـــــــــا هاض الوحش عليـــــــــا *** هاض الوحش عليــــــــــــا أنايا براني غريـــــــــــب *** لا من سال عليــــــــــــــــا هاج الوحش عليا وجـــار *** نبكي في الليل مع النهـــــار الدمعة تجري كالامطــــار *** عن خدي مجريـــــــــــــــا عقلي بهواها راه طـــــار *** خلاتني يا خوايـــــــــــــــا عقلي بهواها أوَيَّـاك راح *** باقي عابد غير النــــــــواح نبكي كل مسا والصبـــاح *** ودموعي مجريـــــــــــــــا نتفكر أمام المـــــــــــلاح *** حبها راش عليـــــــــــــــا طال الضر ولاَّلي طبيب *** نتوحش خيال الحبيــــــــب أنا نهوى غصن الرطيب *** نيرانه مقديـــــــــــــــــــــا باقي هايم وحدي غريــب *** ما ولى شي ليــــــــــــــــا ناره في القلب راها اقدات *** من تفكار امام البنــــــــــات من نهواها راها مشــــات *** لاكن بلا سيـــــــــــــــــــة صبر القلب اللي جفـــات *** يا عالم الخُفيــــــــــــــــــا نطلبك يا ربي الحنيـــــن *** راني من ذا العذرا مكيـــن حبها في حشايا سْكيـــــن *** مكوي كم كيــــــــــــــــــا من حبي ضيآ الجبيـــــن *** الغزالة الهمّيَـــــــــــــــــا يا ولفي زايدني جفـــــاك *** وأنايا صابر نرتجــــــــاك الغرار يضوي من بهاك *** والشفة عكريــــــــــــــــا سبحان الله اللي انشـــاك *** زين العذراويــــــــــــــــا الخد احمر يا سامعيــــن *** فيه الورد مع الياسميـــــن حواجب نونين متعرقين *** سلبوني يا خوايــــــــــــا نشكرها عن طول السنين *** ما دامني في الدنيــــــــــا نشكر مرقوم الحــــــــزام *** ما دامني حي على الدوام نشرب كيسان من المــدام *** في رضاها الهميــــــــــا ابن مسايب قال الكـــــلام *** على الشريفة الحسنيـــــة (هاض = فاض وكثر، براني = غريب، راه طار = إنه طار، خلاتني = تركتني، راش عليا = يعبر كالطيف، ولالي = أصبح، الغزالة الهميا = الغزال الشارد، ولفي = الولف أي التعود وتطلق على من ألفنا رؤيته من الأحبة، الغرار = الجبهة، الشفة عكريا = وصف يقال لجمال الشفة، نونين = وصف يطلق على جمال الحاجب عندما يكون رسمه على شكل حرف نون) |
رد: الشيخ بن المسايب
يا الوشام يا الوشام دخيل عليــــك *** كن حاذر فاهم نوصيك اخفض والخفض يواتيك *** منيتي بالك تاذها يا الوشام أعمل كتاب من عشر ميا *** من العرب ونجوع قويا والعساكر الكليــــــــــــا *** جابها الباي وجابها يا الوشام أعمل ألف ألف زناد *** والعساكر حتى القياد الطبول ترعد ترعاد *** والخيول تشالي بها يا الوشام أعمل البا بهجة الأسرار *** القيب معدل والديار شيد البنيان والأســــوار *** اعمل العسة تحضيها يا الوشام أعمل التا تاج مرصع *** بالكواكب نوره يسطع الشمس والقمر يتبـــع *** بين الأيام ولياليها يا الوشام أعمل الثا ثيث في الأوشام *** فايت الزنجي يكون ظلام طايح للورا والقــــــــــدام *** مايل مخبل كاسيها يا الوشام أعمل الجيم مجمع الزين *** الغُرَّا والحاجب والعين والبياض الناصح مسكين *** طابع حمورة خدها يا الوشام أعمل الحا حلة وحلي *** غير من تحَّوِف مولى علي يسعد من يبات مسلــي *** عندها وتعرس بها يا الوشام أعمل الخا خال مـــورد *** عنبري فوق بياض الخد كل من شافه وقت الصد *** خاف من لحظة عينيها يا الوشام أعمل الدال دلال بهيــج *** كأنه ياقوت يوهج وهيج فوق التيت مخلج تخليج *** طابع مناقش وذنيها يا الوشام أعمل الذال من ذال العز *** كل من جاه منه ينهز جند الروم وبــــــــــــرز *** خاف من العدو يديها يا الوشام أعمل الرا رمز المحبوب *** واجمع الطالب والمطلوب عمر الجدول بالمقلـــوب *** كل شي را اسمه فيها يا الوشام أعمل الزين زهرة الأغصان *** في العلالي من البعد تبان والطيور تحنن تحنــــــــــان *** كل بلبل جا من جيها يا الوشام أعمل الطا طير في الأدواح *** بين الأغصان يصيح صياح المخمر بكيوس الــــــــراح *** بيها النفس يسليها يا الوشام أعمل الظا ظبي التصبيـح *** بيه يتونس كل مليح طار ورباب والعود فصيح *** والكياتر بين يديها يا الوشام أعمل الكاف كتاب عجيب *** شغل سلطان حكيم لبيب كل شي جابه بالترتيــــب *** جاب تفسير معانيها يا الوشام أعمل اللام لمن يقـــــراه *** اكتم السر وافهم معناه شاين ما يطلب من مولاه *** حاجته يبغي يقضيها يا الوشام أعمل الميم مياه تفـور *** بالجنينة دور السور أعمل منازه يا مغرور *** للريام تقصر فيها يا الوشام أعمل النون نوار ظريف *** في الربيع مصنف تصنيف قبل أن يدخل حر الصيف *** جاها النطح وجا ليها يا الوشام أعمل الصاد أصحاب اللهو *** وانطرب معهم بالزهو أركب سفاين بحر السهــــو *** وسطها والداير بها يا الوشام أعمل الضاد ضيا العينين *** حد ما يوصلها في الزين شمي وقمر وبدور آخرين *** شارقين على خديها يا الوشام أعمل العين عيون وقاح *** نائمين وشفارهم ذباح المراشف للبوس مــلاح *** ريق مثل الشهدا فيها يا الوشام أعمل الغين غرفة من عاج *** سقفها والطيقان زجاج باهيا كالبدر الوهــــــــــاج *** ءاش يجمع شملي فيها يا الوشام أعمل الفا فراش أهل الجود *** فوق منزه عالي مرفود الشمع في الحسكة موقـــود *** والخيال يميل عليها يا الوشام أعمل القاف قمر ونجوم *** والبها في الجو معلوم أعمل اللازم والملــزوم *** كل من فات يراعيها يا الوشام أعمل السين سما برفاق *** وكل ما يدريوا العشاق السما وسبع طبـــــــاق *** في أوقات الله يحضيها يا الوشام أعمل الشين شهور وأعوام *** ولا تخمم فيهم تخمام أعمل الليالي والأيـــــــــام *** كل يوم في القصر اجليها يا الوشام أعمل الها هيفات مــلاح *** نورهم يضوي كالمصباح جالسين كل مسا وصباح *** عند من يجمعني بها يا الوشام أعمل الواو وكن ظريف *** ركب حروفك للتأليف بعد الواو اعمل لام أليف *** للظريفة الحلا اهديها يا الوشام يا إله اغفر لي ما فات *** أغفر للناظم ذي الأبيات بعد ميا وألف مضــات *** عام عشرين تكلم بها يا الوشام أعمل الهمزة همزة خيـر *** اجمع أيامي بالتسيير ابن مسايب يحب التحرير *** من جهنم وأهلها يا الوشام |
رد: الشيخ بن المسايب
شكرا على الموضوع
تقبل مروري سلام من أسامة |
رد: الشيخ بن المسايب
مشكوووووووووووووور أخي ... تحياتي
|
| الساعة الآن 04:27 PM. |
Powered by vBulletin
قوانين المنتدى